2021-05-17

樓底特高藏巨型機械人壁畫 葵涌工業區一杯寫意咖啡滲出北歐藝術氣息

VII Drip & Brew

210 個人瀏覽過





葵涌工業區甚荒蕪,但事實上隱藏唔少好地方,當中有一間門口搵唔到店名嘅咖啡店,室內滲出陣陣北歐風、古典藝術風格,拍拖食個Brunch、兩個人歎杯咖啡,幾寫意。

從大街走入內街,會見到一間藍白色外牆嘅小店,名都唔多覺眼,暗黑玻璃隱約透視咖啡店裝潢,呢間工業風咖啡店可算係葵涌工業區內嘅小確幸。原來呢間咖啡店已經開業多年,但一直低調地躲藏於工業區內,可謂中隱隱於市。

室內裝潢同一般咖啡店大同小異,最大分別係樓底極高,令一室空間感更強,零壓逼感,門口有一面水泥石牆,刻住咖啡種類,入面重有一幅巨型機械人壁畫,旁邊更有用磁磚砌成嘅本地圖案。而設計則偏北歐風格,但又滲出陣陣古典味,一隅更有一座鋼琴,貌似店內有愛玩音樂嘅人。店內既有高枱櫈,亦有梳化座位,感覺愜意。

     

午餐菜式每日都會更換,保證有新鮮感,Weekend有3款意粉、2款三文治、1款芝士蛋糕,當然有咖啡店必備嘅All Day Breakfast。不過,飲品全部都要俾正價,並非套餐形式,的確係比較昂貴。當中香草蕃茄海鮮扁意粉$68 嘅蕃茄味唔重,意粉稍乾,但軟硬適中,海鮮有帶子粒、蝦肉粒,蜆肉粒,皆為急凍包裝貨,稍為遜色。而烤蒜忌廉煎雞扁意粉$68 非常Creamy,有微微蒜香,煎雞軟滑,算係採用雞髀肉,忌廉醬汁黏稠而偏多,意粉掛汁,鹹度適中,但略有膩感,意粉份量足夠飽肚。

不單有一般咖啡,例如Caffe Mocha$45,表面灑有可可粉,由咖啡味飲到朱古力味,要攪勻先均勻,最終朱古力咖啡略有甜味,甚冰涼;亦有手沖咖啡,沖煮方式不一,更有幾特別嘅Flavored Coffee 風味鮮奶咖啡$40,其中班蘭味比較少見,將班蘭香油混合Latte,幼滑咖啡奶泡唔多,拉花唔特別,內有啖啖天然班蘭芳香味,雖然味道比較輕,令咖啡帶清新感,都算別具一格。

延伸閱讀﹕精品咖啡店Time Coffee進駐葵芳 全新薄荷綠蚊型咖啡店角落小確幸

延伸閱讀﹕銅鑼灣搬到葵興 商場樓上咖啡店歎寫意下午茶


E.A.Tips﹕

(1) 留意星期一至六營業時間為11:30至18:00,而每日17:30就會Last Order。

(2) Weekend比較少人,可以慢慢Hea吓,留意星期日休息。

(3) 由葵涌廣場或葵芳廣場行到工業區,腳程約10分鐘。

(4) 位置於景星工業大廈地下,位置於葵芳邨對面工業區。

(5) 大玻璃背後係車房景,馬路公眾地方有大量車呔等車房用具,景觀係比較弱。

(6) 餐具同水都係自助方式,需要自行到門口旁邊取用。


VII Drip & Brew

葵涌大連排道132-134號景星工業大廈地舖
星期一至六 11:30 – 18:00;星期日全日休息
5703 7134

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱

       

6 份內容修訂