長洲鳥居

【2021賞花地圖】30分鐘船程穿越日本! 走訪日式鳥居兼神社繪馬打卡 一棵棵桃紅櫻花艷絕長洲



[sig_post_pv label=””] 個人瀏覽過

足足一年啦!武漢肺炎疫情令本地人全年無得去旅行,唔少香港人都日漸掛住「家鄉」日本,想去又去不得,記者今次帶大家坐30分鐘渡輪,去一趟旅程可以幻想吓身處日本嘅環境,幾個目的地通通似倒模日本,大概可以幫助各位想念日本嘅情侶們,兩個人齊齊感受一日嘅「日本」之旅,一秒穿越日本嘅拍拖旅程你哋絕不能錯過!

今次旅程目的地係長洲,好多人都去嘅地方,我哋未必去,好少人去嘅地方,我哋多數會去。長洲內原來隱藏咗一個又一個日式景點,於一個旅程走訪各景點,包括日式鳥居、神社繪馬、櫻花,確實有日本旅行嘅感覺。

第一站﹕日式鳥居

由長洲渡輪碼頭為起點,沿長洲北方向走,經大貴灣公園走到長北路,沿路走上小山,中段可以上梯級去長洲島最高嘅北眺亭賞景,大約95米高,可望東灣仔,眺望喜靈洲、南丫島等,甚至環瞰長洲全島風景,俯視時感覺有幾分似日本北海道,更可以走出海角,行到北角咀、東灣仔Coral Beach方向,不過路段就稍為崎嶇。

延伸閱讀﹕長洲避人流!樹下藏韆鞦 離島人先知道嘅秘密沙灘

而目的地叫長洲北有蓋配水庫公園,為新建公園,不出10分鐘步程,就可以到達呢個以日式鳥居設計嘅公園入口。入口處特別以仿傚日本「鳥居」牌坊,基本上揉合中日式設計,並非石屎建造,而係以原木設計,確實有日本鳥居風格,造型似明治神宮嘅「一の鳥居」。

而園內亦比一般公園獨特,內裏建有4個涼亭,甚有線條美,相當配合附近天然環境,自然和諧,陽光照射下更誘人。幾個涼亭都被假日放假嘅外藉傭工所佔,似足傭工小天地一樣。背後有一道小路可延伸到賞景地方,相比人煙稠密嘅長洲市中心,新公園總算係遠離民居之地。

於「鳥居」入口對面分岔路落山,1分鐘後會見到長洲食水配水庫,中段可望對岸雷達站,為建於山上嘅長洲氣象站,非常明顯。約10分鐘步程就可返回山腳長利公園,該公園位於北社新村旁邊,為一個長形嘅休憩處,小公園於1963年尾興建,地方唔大,內有有蓋座椅,靠近民居,據悉公園係由當時長洲長利街坊捐錢建成。

第二站﹕春季櫻花

春天去日本,當然要賞櫻啦!今次偽日本之旅亦可以睇櫻花,目的地係長洲關公忠義亭,櫻花品種為中國紅櫻花。長洲關公忠義亭係一間關帝廟,雖屬廟宇,但建築似涼亭。外面有一片櫻花林。由1975年起從台灣引入山櫻樹,每年都有櫻花盛開,品種唔同,大多係山櫻花,即鐘花櫻桃,而今年就係中國紅櫻花。

從「鳥居」落山後,只需向西面走,經東灣海灘,直至行到昇昌里或學佬巷,轉入長洲山頂道,前行會見到警署徑、香港賽馬會投注處。沿路向上前行約3分鐘,穿過一排排恍如日式小屋嘅長洲居民居所,就會到達長洲關公忠義亭入口。

長洲關公忠義亭內有多棵櫻花樹,大多集中於長洲關公忠義亭前面嘅小花園,靠近入口處嘅櫻花樹比較矮小,貼近公眾,而末端就有一棵比較宏偉嘅櫻花樹,目前正綻放中,櫻花配合蔚藍天空更有美感。

中國紅櫻花一般花期係2月上旬至3月上旬,而中國紅櫻花係由雲南櫻同福建櫻雜交而成,原產自亞熱帶地區。櫻花顏色偏向桃紅,甚至紅噹噹嘅大紅色,開花時繁花似錦,婀娜多姿,花朵半重瓣,層次豐富,拍攝時可填滿畫面,舉手投足帶嫵媚感。

延伸閱讀﹕長洲高空觀景文青遊 登小長城睇怪石抖抖氣



第三站﹕神社繪馬

睇完櫻花,不妨前往至長洲關公忠義亭,旁邊有一個以日本神社繪馬設計嘅祈願版,似足懸掛繪馬嘅繪馬架,可以打吓卡,幻想自己身處日本神社之內。眾所週知,日本神社、寺院都有「絵馬掛け所」,放上一種奉納物,繪馬大多係五角形木板,用作書寫祈願內容,再掛上繪馬架上,期望心願可上達神明或佛菩薩。

相傳日本人當馬為神明坐騎,唔少信徒將馬奉獻神社,作虔誠或祈願,不過養馬費用甚鉅,結果改為木馬、紙馬、土馬等馬形物件,最終演變為馬形木板,即繪馬。現時繪馬一般為五角形,上面會印有神社或寺院名稱,前有馬匹圖案,後有空白位作書寫姓名、願望。

長洲關公忠義亭嘅歷史同台灣台中、花蓮有關,最後於長洲建廟,而設有日本神社繪馬,感覺有如揉合中日式設計,非常特別。

延伸閱讀﹕賣飾物嘅木系文青咖啡店 長洲島中坊研歎小清新Brunch


E.A.Tips :

(1) 日式鳥居位置於小山上,但路程唔遠,離地面僅約10分鐘。一方面可由北帝廟上山,另一方面可經大貴灣公園上山,建議走大貴灣公園方向,沿長貴路、長北路上小山,路段比較少人,山路僅微斜,日式鳥居對面分岔路可直落北帝廟方向,沿途會經過長洲食水配水庫、長利公園,而長利公園下會見到唔少村屋。至於從北帝廟方向上小山,沿碼頭經長洲家樂徑走,由長利公園上山,會經過且面向一個個基督教墳場嘅墓碑而走,而且上長利公園嘅小路、樓梯比較多。

(2) 櫻花嘅花期比較短,想賞花就要盡快去啦!

(3) 長洲關公忠義亭旁邊有繪馬設計嘅願望亭,似足日本神社。

(4) 拍攝櫻花時要留意身邊多唔多人,盡量挑選少人地方拍攝,唔好阻礙他人。影相係睇技巧,有技巧嘅話,咩位置都可以影到靚相。

(5) 賞花還賞花,謹記保持安靜,附近係長洲居民同寺廟。

(6) 謹記自己垃圾自己帶走。

(7) 補給點於長洲市中心內,謹記準備充足糧水先起步。

(8) 於中環5號碼頭乘搭渡輪,可以前往長洲,船程由30分鐘至1小時不等,視乎快船定慢船,快船一般貴$6至$7,星期一至六、星期日同公眾假期亦唔同價錢,假日貴逾$10,最好星期六去。渡輪一般00分同30分都會有班次,若因客滿提早開出,有機會會有加船班次。


(9) 長洲日式鳥居要低炒先會似日本鳥居,否則會影到香港嘅綠色垃圾桶。


長洲關公忠義亭

長洲觀音灣路
24hours
6736 3778

長洲北有蓋配水庫公園

離島長洲長北路
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!