屯門行到錦田！逆線行大欖涌水塘瞰港版千島湖賞大棠紅葉一條路線直達河背水塘

[sig_post_pv label=””] 個人瀏覽過

港版千島湖、元朗大棠睇紅葉都係本地人嘅熱門行山地點，大多數人都係從元朗出發，先遊大棠，再行上千島湖，而上次記者曾提到逆線而走，今次亦唔例外，想行人流極多嘅行山路線，最好方法就係從別人終點作起點，免於遇上過多嘈雜人聲同絡繹不絕嘅人群，而路段亦多石屎路，平坦易行，更可拍拖享行山之樂。

延伸閱讀﹕【逆線而行】屯門有四面佛？藍地水塘翠綠版天空之鏡夢幻彩虹欄杆打卡

掃管笏東面為大欖涌水塘，南面則為海岸方向，北面為九逕山，基本上位置屬背山面海，又有湖畔，環境清幽，加上附近都係低密度住宅就更舒適。從掃管笏起步，由掃管笏路行入掃管笏村路，步行約10至12分鐘會到達福昌士多、掃管笏陳屋村公廁，前行10分鐘可達麥理浩徑10段入口，路段不時會有小黑羊出現，再行5分鐘會到達大欖涌水塘小壩。

屯門大欖涌水塘位處大欖郊野公園，為二戰後首個興建嘅水塘，歷經5年，最終於1957年落成，儲水量有2000萬立方米。由於水塘內本身有唔少丘陵地，形成一個又一個島嶼，現時從上而下俯視，會見到小島星羅棋佈，散落唔同位置，所以被稱為「港版千島湖」。

而水塘既有收集雨水用途，亦係收集大角東江水嘅水庫之一，同時係收集蒸餾後淡水之地兼水力發電水庫。由大欖涌水塘小壩繼續前行約30分鐘，即可登上水塘西面嘅千島湖清景台，從掃管笏到千島湖清景台，距離約3.3公里。漁護署於2019年先將麥里浩徑10段觀景台正名為千島湖清景台，毋須攀碎石、泥路，只需經由木頭泥沙堆放而成嘅階梯向上行約200米，即可於山崗位置鳥瞰整個千島湖，亦可遠眺桃坑峒、小欖、大嶼山。小島邊緣似黃沙，中央呈墨綠色，望落飽滿，加上碧綠水塘，湖光山色驚艷而壯觀，似足山水畫，所以都係唔少人嘅影相位。

水塘附近四通八達，離開千島湖，沿路向元朗方向走，會經過大棠伯公廟、佛祖廟，見分岔路向山路走，為路段少有嘅山路，其後多為石屎路，其後會到達大欖自然教育徑。步行約30分鐘即可轉入大棠山道，向楓香亭方向前行，路段為觀賞元朗大棠楓葉之地。編輯於1月下旬到訪，發現人流極少，楓香幾近凋零，唔少樹上楓葉悉數掉落，不過仍然有少量楓香樹長滿紅葉，一塊塊楓葉長滿鋸齒，末端尖銳，紅葉於秋天盛放，陽光照射下顯得更紅，葉脈清晰，葉柄延伸，狀似手掌。平時人山人海，當熱潮減退時，現時已經幾近無人到訪楓香林，今次小編覺得的確係一個難得機會可以獨佔楓香。

沿大欖涌水塘北面而走，可連接元朗大棠、元荃古道郊遊徑路段，來往元朗至荃灣。於楓香亭步行10分鐘，即可經過元荃古道路段，前行3分鐘會到達一個休憩地，從Google地點會見到該地叫廢物回收點，實際上入面有一道吉慶橋，位置係大欖涌水塘末端，可獨佔風景，影相一流。

延伸閱讀﹕元荃古道石龍拱段環瞰青荃廢校水泥滑梯探秘打卡

繼續沿元荃古道郊遊徑走，毋須轉彎，只需沿大路直行，30分鐘即到達大欖隧道位置。前行約20分鐘可到達河背隧道入口，而該路段遍佈不斷被風吹得搖曳嘅芒草，絕不失為罕見打卡位。

沿路行到河背村後，即可轉入河背村路段，10分鐘可直上河背營地，再沿斜路向上行，左邊可望大欖隧道方向，約10至15分鐘可到達河背水塘。而河背水塘靠近錦田、八鄉，僅高250米，只有50萬立方米儲水量，面積極小，水塘只為灌溉水塘，用作農田灌溉之用。

事實上，60年代香港政府增加大欖涌水塘供水量，截斷錦田河水流，令錦田一帶水量大減，最終增闢幾個灌溉水塘，河背水塘為其中之一。從橋上可見，水塘環境被群山環抱，中間有一小島綠洲，水塘波平如鏡，附近滿佈林蔭，似足小湖泊，入黑前環境更清靜，俯視可見呈S形嘅十九孔溢洪大壩，壩底樓梯級於鐵鏽、流水、泥沙勾劃下，似足棕色雲石紋理，有幾分似雲石蛋糕，滿滿藝術感，難怪1998年會被選為郊野公園十大自然風景。若有時間，可繼續前行河背水塘家樂徑，30至40分鐘可圍繞水塘走一圈。

河背水塘同樣四通八達，既可去田夫子、蓮花山，亦可去雷公田，而折返河背營地嘅話，可返回河背村，亦可走營地右邊方向落山，經大窩村、元崗新村，行到八鄉路、錦上路一帶，有巴士可來往元朗、錦田。

E.A.Tips :

(1) 巴士路線 61M,53, 52X,252,261B,A33, 252X,K53,962E 都可到達掃管笏，而52X,261B只於平日提供服務，比較建議61M,53號，可於掃管笏村站落車；而小巴路線43,43S、巴士252,962E就可於星堤近掃管笏村落車。

(2) 若要從屯門乘搭的士或Uber直達掃管笏村，則大約需$60至$70車費，兩個人就最好搭巴士，但4至5人會比較化算。

(3) 路段雖輕鬆，但謹記仍要帶備充足糧水、防曬。

(4) 受護環境，記得自己垃圾自己帶走。

(5) 千島湖、大棠都屬熱門之地，最好避免假日行走。

(6) 打卡還打卡，千島湖清景台下面有大石，無圍欄或欄杆，只有矮木樁、粗繩搭建出嚟嘅圍欄，要小心安全。

(7) 掃管笏靠近屯門黃金海岸，但腳程要30分鐘。

(8) 路段雖然唔複雜，不過都要避免獨自郊遊、雨天或雨天前後行走，避免意外。

(9) 大棠山道路段為越野單車徑，要小心迎面或背後有單車行走。

(10) 從河背村乘搭71號小巴可來往元朗方向，由河背水塘落山只需約20分鐘；若行到八鄉路至錦上路，可乘搭巴士64K,64S,251A返回元朗錦田市中心方向。

(11) 提提你，據《水務設施條例》第30(2)(a)條，任何人進入構成水務設施部分水中或在其中浸洗或沖洗；第30(2)(b)條，任何人沖洗動物或導致或准許任何動物進入其中；第30(2)(c)條，任何人拋擲或擺放任何物件於其中，均可被檢控，謹記唔好破壞或污染水塘或集水區嘅水。