欣澳楓香林紅葉
兩個人影吓相,  新界,  神秘之地

【秋季紅葉2021】欣澳秘密海邊樹林賞楓 10棵楓樹毋須爭位 片片紅葉媲美元朗大棠楓香林

瀏覽次數:2743
個人瀏覽過





秋「楓」起,又係時候兩個人去尋找楓葉蹤影!季節限定嘅楓葉正準備漫山遍野盛放,要數種植香港楓葉嘅地方,大多數人第一時間一定會諗到元朗大棠楓香林,又或者近年受行山客歡迎嘅大埔烏蛟騰九擔租風水林,甚至係大欖郊野公園、青衣公園等賞楓好去處,今次編輯就帶大家去更鮮為人知嘅賞楓秘地,當日現場全無他人,顯然該楓香地帶未完全曝光,值得拍拖情侶去靜悄悄觀賞紅葉風景。

要觀賞楓葉,唔一定要出國旅行,秋風起紅葉片片,香港亦有唔少賞楓之地,今次編輯帶大家去欣澳紅葉秘地,對於曾經前往欣澳露營或大玩車中泊嘅你,可能亦未必會留意到呢個全無難度嘅紅葉景點。相比觀賞楓葉嘅人氣地方,欣澳海邊樹林嘅楓葉位置更人跡罕至,甚至可野餐或露營,拍攝楓葉時亦毋須要同人爭位打卡,亦唔需要只向天拍攝楓葉,都可以影到無人嘅楓香地。

大自然往往可帶給人驚喜,一般楓葉於12月左右會轉紅,最早11月,最遲1至2月,即係秋冬時份,每片紅葉由綠轉黃再轉紅,樸素嘅綠色衣服趁秋天轉涼換上橙黃色衣裳,轉眼又換成橙紅色裙子,顏色吸睛,層次豐富,故往往種植楓葉嘅地方都係打卡勝地。

欣澳紅葉秘地為一片海邊樹林,靠近馬路邊、列車路軌,編輯於現場視察,樹林中嘅楓樹大概有10棵,而現時已經轉紅嘅楓香僅有約3棵,高度僅約5至6米,大多伸手可及,如果遲啲開滿紅葉,必可構成一道紅葉隧道!

楓葉介乎橙黃至橙紅之間,片片葉子末端尖銳,葉脈清晰,葉柄延伸,陽光照射之下更紅。由於位置偏僻,鮮見人群,楓香樹皆相當完整,生長茂盛,涼風輕吹時楓葉更帶有濃濃秋意,不時有少量楓葉落下,如同日本紅葉,畫面優美,編輯想稱該樹林為欣澳楓香林,因為絕對媲美元朗大棠楓香林。

原名陰澳嘅欣澳,為配合香港迪士尼樂園形象而被改名,而前往欣澳,通常都會於巴士站對出迴旋處轉左,既遊走欣澳石灘海邊步道,亦可前往對岸鹿頸島找尋「天使之路」,但是次只需於迴旋處轉右,即可找尋呢片欣澳楓香林。沿右邊海邊步道海堤路走,一直前行至盡頭,沿路不時見到露營人士,隨後見到列車路軌代表路線正確,此段步程約10至15分鐘。

欣澳 楓香林 秋.楓.2021 【如何前往? 按圖觀看】

依循列車路軌直走,左邊為青洲灣,直至於左邊見到露天倉庫,繼續前行會到達一個分岔路口,步程約10至15分鐘,左邊為通往大青洲長堤,右邊為行車天橋,只需轉右行並穿過天橋,向青馬收費廣場方向走。不過,2分鐘後到達第二個分岔路口,就唔係通往左邊青馬收費廣場,而係右邊列車路軌方向,到時候你會發現對面就係剛才嘅欣澳海邊步道。

再步行約3至5分鐘,即會發現左邊有一片樹林,步入樹林,一棵又一棵楓香即會映入眼簾,可以拍拖兩個人漫步「紅」樹林,全程大概需要25至30分鐘步程。欣澳楓香林一端為列車路軌,另一端則為北大嶼山公路天橋,要避開人山人海嘅楓香林,想獨佔楓香,就要挑選偏僻地方,你以為位置難搵?我可以話你知,其實唔難!

延伸閱讀﹕屯門行到錦田! 逆線行大欖涌水塘 瞰港版千島湖賞大棠紅葉 一條路線直達河背水塘




E.A.Tips :

❶ 青嶼幹線巴士轉乘站 A10,A11,A12,A21,A22,A26, A29,A29P,E11,E11A,E11B,E11S, E21,E21A,E21C,E21X,E22, E22A,E22C,E22P,E22S,E22X,E23, E23A,N11,N21,N21A,N23, N26,N29,NA11,NA21,NA29,R8 可以到達青0馬收費廣場。

❷ 欣澳楓香林可觀賞紅葉,位置靠近北大嶼山公路、列車路軌。

❸ 楓香地方離青馬收費廣場巴士站較遠,比較方便都係從欣澳前往,可以於愉景灣轉乘巴士路線DB03P,DB03R前往欣澳巴士站。

❹ 朝早時間可以確保無人到達,而下晝時間拍攝紅葉就更靚。

❺ 過多一至兩星期,紅葉全部轉紅時,相信會更壯觀呢!

❻ 雖然為郊外地方,但欣澳海邊步道不時有汽車經過,謹記要戴好口罩,避免吸入廢氣,而貨倉旁邊如有車輛經過,更會將沙泥掀起。

❼ 欣澳楓香林可以抬頭仰拍,亦可水平線拍攝,甚至俯拍。

❽ 謹記愛護環境,大自然非獨有,唔好採摘楓葉。

❾ 紅葉位置會有蚊蟲,最好進入之前做足防蚊措施。

❿ 記得唔好遺留垃圾,自己垃圾自己帶走。

❿ 勿攀爬楓樹,免生危險。

欣澳楓香林

  • 欣澳海旁
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高