秋季率先賞蘆葦/芒草！穿梭元朗南生圍+河背水塘 毋順登山全程走瀝青路輕鬆尋芒草地

秋季來臨，既係觀賞紅葉嘅季節，亦係找尋蘆葦同芒草嘅季節，秋天就係蘆葦同芒草最佳觀賞期，今次編輯先以一條路線帶大家去搵吓蘆葦同芒草啦！蘆葦同芒草向來係攝影不敗題材之一，情侶拍拖去影吓相亦難掩浪漫，不過芒草同蘆葦、茅草並唔一樣，大多數芒草都係生長於山上，如果唔行山其實係難以找尋得到，但事實上亦有地方係無需要辛苦上好高嘅山亦可以拍攝到！

延伸閱讀﹕【秋季紅葉2021】欣澳秘密海邊樹林賞楓 10棵楓樹毋須爭位 片片紅葉媲美元朗大棠楓香林

踏入10月，唔少熱愛行山活動嘅人都開始上山，嚟緊兩個月不妨同時登山尋芒草，全港有唔少芒草地，例如大東山、老虎頭、飛鵝山、昂坪等，今次同大家睇完蘆葦再睇芒草啦！

（1）元朗南生圍

位於元朗嘅南生圍，向來係觀賞蘆葦、候鳥嘅景點，配合水色後畫面更優美，充滿水鄉風情，不時有攝影發燒友、準夫婦前往影吓相，亦有唔少人專程到南生圍打卡。而秋天更盛產蘆葦、芒草，現時氣溫轉涼，準備入秋，蘆葦草已逐漸生長，未來將可見大片自然風景畫，絕對係秋季攝影好地方。

南生圍地方偌大，可以隨便進入水塘拍攝，步行愈入，人流愈少，畫面愈靚，當大草原拼湊草田，畫面絕對壯麗。不過，現時蘆葦草未完全生長，當日編輯仍未完全見到草田，只有少量蘆葦草風景，如果要拍攝草田風景，可能要等多幾日啦！

芒草其實係生長於非洲、亞洲嘅亞熱帶同熱帶地區，部份會用作能源，部份為用作觀賞植物，甚至部份只會當作雜草，可人工或野外種植。芒草多生長於海拔約40至2400米嘅地方，如路邊或樹林邊，甚至荒蕪地方。芒草形態如草，直立而有分枝，高約1至2米，頂端有短柔毛，葉呈欖綠色，10至11月為芒草盛放月份。

（2）錦田河背水塘

同樣位處元朗嘅河背水塘，一程小巴可以從元朗經錦田直入河背村，河背水塘亦係觀賞芒草、竹林、黃昏日落嘅好地方，水塘水面平靜，但遇上排洪情況環境更壯觀。河背水塘背靠山巒，加上附近開始有芒草，略帶柔和，倍添秋意。

河背水塘雖然位處河背村之上，稍稍需要上行，但其實路段為水泥路，只有圍繞水塘嘅河背水塘家樂徑為小山路，但家樂徑路段為平路，輕鬆而行，另一端沿小橋步行則可直接到水塘，簡單直接。

當日編輯只見到少許芒草於河背水塘家樂徑附近，如果要睇更壯觀芒草風景，可能都要等多陣啦！

延伸閱讀﹕屯門行到錦田！ 逆線行大欖涌水塘 瞰港版千島湖賞大棠紅葉 一條路線直達河背水塘

E.A.Tips :

南生圍

• 元朗橫洲東面/山貝村北面/天福圍西北面

河背水塘

• 元朗八鄉

Δ 版權為E.A.Two 兩個人醫吓肚所有，歡迎轉貼連結，勿全篇文章轉載

Δ 如果覺得我哋嘅介紹啱睇，就Like吓我哋Facebook / Follow吓我哋Instagram啦！