秋季芒草:髻山
兩個人影吓相,  新界,  神秘之地

1小時登山尋芒草!元朗髻山360度無死角景觀 後山寧靜鄉郊觀魚塘賞日落

瀏覽次數:418
個人瀏覽過





秋天又係影芒草嘅時候啦!唔少人都會上大東山、飛鵝山、大帽山影芒草,今次編輯就行另一條路線,都係上山,不過只係一座簡易小山峰,海拔僅高約121米,靠近元朗、天水圍,拍拖兩個人上山頭盡覽360度景觀,路程短途之餘亦可見芒草、蘆葦草風景,觀賞黃昏日落景、晚霞景,交通同樣非常方便。

延伸閱讀﹕秋季率先賞芒草!穿梭元朗南生圍+河背水塘 毋順登山全程走瀝青路輕鬆尋芒草地

髻山位處元朗橫洲北面,原本叫丫髻山,夾喺元朗工業邨、天水圍之間,曾為沖積地嘅小島,後來經淺灘沉積變濕地。髻山旁邊有衙前山,可從三面登山,包括元朗朗屏邨、天水圍蝦尾新村,又或元朗盛屋村,山勢唔高,但山上景觀遼闊,視野清晰,包括山頂位置可近距離完全俯視豐樂圍魚塘、南生圍魚塘,眺望雞公嶺、季候鳥棲息地尖鼻咀、天水圍新市鎮、橫洲配水庫,甚至深圳海濱公園一帶,可以算係元朗後山。

由元朗朗屏邨起步,穿過朗屏商場到朗屏路,斜對面即可見山路入口,但目前第一個路口為地盤施工地帶,沙塵滾滾,只可以從第二個路口進入,對面為元朗朗屏邨東莞學校,位置離元朗工業邨附近嘅娛苑不遠。登山初段遍佈山墳,不知情嘅人從入口處未必估到繼續前行可以前往一座小山丘寶地。

延伸閱讀﹕元朗橫洲英式別墅古色古香 多次傳鬧鬼勁陰森?

步上窄小樓梯後,約5至10分鐘步程後,先會見到山友搭建嘅風雨亭,繼續依循明顯嘅山徑前進,路段寬闊易行,先經過衙前山,經山脊走,再登上髻山,連接順暢,而且四通八達,可以隨時離開。髻山沿途可回望橫洲發展區景色,眺望雞公嶺,山野間鮮見有途人,對比有人滿之患嘅其他山崗,沿路非常寧靜,同時會發現路段一直遍佈芒草、蘆葦草,配合昏黃光線會更壯觀!

芒草其實係生長於非洲、亞洲嘅亞熱帶同熱帶地區,部份會用作能源,部份為用作觀賞植物,甚至部份只會當作雜草,可人工或野外種植。芒草多生長於海拔約40至2400米嘅地方,如路邊或樹林邊,甚至荒蕪地方。芒草形態如草,直立而有分枝,高約1至2米,頂端有短柔毛,葉呈欖綠色,10至11月為芒草盛放月份。

衙前山標高柱離入口非常接近,而髻山標高處則需要步行一段時間,前者有多張晨運客嘅座椅,而後者標高處位置或沿途不僅可以觀賞360度無死角兼無遮擋風景,亦可以從超近距離俯瞰豐樂圍魚塘景色,如同大自然山水畫。髻山海拔雖然唔高,亦唔怕迷路,但山徑稍有風化,上落山都稍有傾斜,沙泥亦稍有跣腳,亦唔可以掉以輕心。

細心眼前風景時,不難發現髻山既可以近距離俯首豐樂圍魚塘,亦可眺望南生圍魚塘、大生圍魚塘,落山期間更可以觀賞黃昏日落景色,如果遇上火燒天或粉紅夕陽,景色會更壯麗。下山路段更可俯視一間間如同積木嘅村屋,煞是可愛,循小屋方向走落山,可以直通元朗豐樂圍魚塘山腳,期間有分岔路口,依編輯走嘅一段路落山會比較輕鬆。




E.A.Tips :

❶ 巴士路線276A, 69X, 74, E36A皆可到達元朗朗屏,小巴路線74A可以去到朗屏邨。

❷ 小巴路線74號可以到達盛屋村總站,位置近豐樂圍魚塘,可來往元朗福康街。

❸ 髻山雖然唔算難度高,但部份都係山路,都需要小心跣腳,最好都係穿著防滑行山鞋或抓地力較好嘅鞋。

❹ 上山前要帶備充足糧水,山上無補給站,但盛屋村小巴站有汽水機,亦可於起點朗屏商場先作補給,同時自己垃圾自己帶走。

❺ 初段有大量墳墓,謹記要保持安靜,亦唔好走入山墳位置,尊重先人。

❻ 落山路段要小心,因為沙石繁多,稍有陡峭,最好緩慢步行或依賴行山仗。

❼ 落山位置為村屋,不時有狗吠聲傳出,但總算並非野狗。

❽ 髻山不時有分岔路,部份有分高、中、低路線,如登上山頂嘅路段,最緊要係量力而為。

❾ 影相都要小心注意安全,避免站立懸崖邊緣。

❿ 芒草位置基本上遍佈山頭,隨處可見,毋須同人爭位影相。

❿ 如果由朗屏邨走到盛屋村方向,全程約需1至2小時,難度約為2星級。

❿ 山上不時有人玩越野電單車或單車,基本上完全無視行山人士安全,亦少有先讓路俾途人嘅意識,而且將沙泥掀起,所以建議上山嘅話最好都係佩戴返口罩。

髻山

  • 橫洲
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象