元朗橫洲英式別墅古色古香多次傳鬧鬼勁陰森？

[sig_post_pv label=””] 個人瀏覽過

元朗橫洲有一間超神秘嘅別墅花園，以英式建築風格為主，曾被評為香港一級歷史建築，10年前被降級為二級歷史建築，但古色古香嘅小屋一度傳出靈異傳說，被指鬼影幢幢，多次傳出怪聲，甚至有怪異現象，到底係咪真係咁陰森？

位處元朗橫洲東頭圍鄉公所附近，靠近山貝河、朗屏村，目前係一間荒廢小屋。1927年起由新界鄉紳領袖蔡寶田先生建造祖居，大宅以英式建築風格設計，樓高2層，屬半別墅、半農園，命名為娛苑，門口橫匾對聯為「娛覽遠山青人畫；苑環嘉樹紅葉歸。」曾開放公眾遊園。

大宅主樓以紅磚、白樑柱建成，正門前有一個歐洲噴泉殘蹟，樓上二樓有騎樓露台，半圓形塔頂亦有歐陸風格，充滿歷史痕跡，兩個人拍拖影吓相都唔錯，大樓被荒廢少有20至30年，由80年代中期已無人居住。

室內目前淪為廢墟，既係工場，亦係擺放雜物之地，門口僅有香爐同祭品，跨過高高石階即可進入，雖然荒廢又陰森，不過仍然不時有龍友前往拍攝人像，甚至有年輕人入去探險。

娛苑主樓充滿頹廢風格，雜草叢生，背後重可以睇睇內園景，為圍村豪宅之一。沿樓梯直上，可以見到主廳連接幾個廳同房間，樓底甚高，窗戶幾通風，另一邊可前往內園。

再沿另一邊樓梯行，可以直上天台花園，會見到圓形塔頂，附近長滿雜草，未見有任何修葺或保護。唔少電影都於娛苑取景，如《胭脂扣》、《等待黎明》、電視劇《京華春夢》等。

不過歷史悠久嘅英式大宅多次傳出鬧鬼同咒語傳說，靈異故事一個接一個。80年代，有傳大屋喺一夜之間死咗7名婢女，7女齊死嘅第一個講法係屋主因多妻妾而有人令7個侍婢嫉妒，將7女推落大宅池塘，最終被淹死，期後有村民於深夜會聽到幾個女子悽厲呼救聲；第二個講法係7女只係工人，因大宅風水問題被仇人落咒同降頭，最終成屋主替死鬼；第三個講法係女主人發現丈夫出軌，查到原來係其中1個婢女，最終對7個侍婢逐一拷問，但無人承認，最終將7個侍婢都推落後園池塘活生生淹死。也有指大宅位置本身就係一個亂葬崗，曾有村民種植農作物，但亦種唔出啲乜；亦有指大宅曾於二戰時被日軍徵用作司令部，大宅有無數死人。

E.A.Tips﹕
（1）可以喺元朗大橋街市乘搭小巴路線74A，於村口附近落車；或者乘搭巴士268B,268C到工業區附近落車，步行過去腳程約5至10分鐘。
（2）鬼故說法空穴來風，傳言無從稽考，不過即使孰真孰假，最好都係唔好夜晚去探險啦。
（3）除咗樓上一層閣樓，從閣樓旁邊樓梯亦可以直上天台。
（4）經過村屋附近記得保持安靜，唔好騷擾區內居民。