[sp_html5video category=”3573″]
女士們即使拍拖或結婚，都需要有私人時間，間中同閨蜜去酒店歎Afternoon Tea係好選擇，1881 Heritage內嘅ODEA係唔少人嘅下午茶選擇，見到網上唔少文章都大讚環境靚，午餐、下午茶、晚餐食物有水準，加上場地係ViuTV目前播映中劇集《暖男爸爸》取景地，劇集由良心藝人鄭中基聯合張可頤主演，小編即管去實試吓。
ODEA係一間輕法式餐廳，裝潢以白色主調、木系為主，環境打造成十足十法國殖民地風格嘅維多利亞式庭園，1997年前曾經係水警總區總站，亦係香港法定古蹟，20年前由長江實業改建成古蹟酒店。餐廳既有室內，亦有露台，正對海旁、平台花園，被植物圍繞，古蹟內歎下午茶，旁邊重有支大炮，喺環境上似歐陸式花園，的確係幾寫意，有輕奢感。
ViuTV目前播映中劇集《暖男爸爸》取景地 (ViuTV《暖男爸爸》截圖)
今次10月全新下午茶餐牌同樣貼合輕法式餐廳，三層架以銀色鳥籠設計，既有雀鳥，亦有籐葉、水果裝飾點綴，每層都以押花面設計，旁邊亦有一粒粒小珍珠裝飾，充滿大自然色彩，打卡一流！以法式鹹、甜點為主，狀甚精緻，擺盤有法式風格，大多以水果為主要食材，啖啖馥郁果香，除咗必備嘅英式鬆餅，重有5款鹹點同4款甜品，款款勁的骰……
鬆餅向來係Afternoon Tea必備之物，有原味同Cranberry Scones，今次鬆餅既配有傳統奶油忌廉，亦有無花果桑莓果醬、香橙薑果醬，clotted cream最基本，幾香滑，2款果醬唔太甜。鬆餅牛油味幾濃，唔算好鬆軟，外層有啲硬，不過味道都算合格，配2款自家製果醬比較好。
鹹點有5款，望落好矜貴嘅法國芝士提子撻，表層舖滿金箔，內餡以芝士、提子混合，不過芝士味唔夠濃，只有提子乾味。日本牛肉及椰子泡芙睇落似迷你版牛角包，內餡係牛肉碎，有肉香，幾特別。海藻日本帶子、芒果三文治係以麥包夾住內餡芒果肉，上面再擠有醬料同帶子肉作裝飾，芒果肉係幾香甜，但欠缺特色。龍蝦伴菠蘿、香草青瓜外層有香草包圍，內層有龍蝦肉同青瓜，表面有層菠蘿果肉，酸甜中有爽口龍蝦肉同青瓜。乳酪蟹餅、菠蘿蜜、蝦片就喺蝦片上放蟹肉碎，再擠上適量醬料，蟹肉幾鮮甜，蝦片要盡快食先脆口。
甜點有4款，荔枝、野草莓芝士餅造型似一粒栗子，鮮紅色配尖頂金箔，底層有餅底，入口綿軟，芝士味唔濃，偏甜。柚子芒果撻嘅撻皮好快就變得唔脆，表層係焦糖cream，內層夾雜柚子、芒果，算係幾款入面比較有果味嘅一款，都係甜。車厘子開心果法式蛋糕並非鬆軟感，反而係似cup cake嘅蛋糕感，開心果味欠奉，但頂頭車厘子變得軟淋淋，都有果味，蛋糕甜味比較輕。至於一杯白桃椰子奶凍就係中伏之選，質感屬液體狀，即使影相一段時間會溶化，奶凍亦唔應該溶到水質程度，而且入口椰子味過重，甜味亦重，但白桃味欠奉。
下午茶要歎吓茶，Earl Grey都算好選擇，有茶味，唔會好快就變淡。加$58無酒精雞尾酒/加$78酒精雞尾酒，果味特調嘅雞尾酒係有微微果味，不過太貴。
下午茶份量唔太多，鹹點味道基本唔錯，但甜品就比較難以接受，甜到膩嘅甜品，所謂層次實在唔識欣賞，液體版奶凍真係印象深刻。
E.A.Tips﹕
（1）下午茶兩個人$528，連餐飲，另需加一服務費，人均需約$290，可預先睇睇Menu先諗去唔去。
（2）可以網上訂座，預訂按此，更好係預先打電話或Whatsapp訂座﹕6737 0980，座位唔多，最好早2星期至1個月前預訂，建議選擇露台位置。
（3）上述係剛剛10月先轉嘅下午茶款式，供應時間為每日15:00至18:00，可食3hours。
（4）下午茶層架有可能會俾漏2款鹹甜點，所以最好Check吓先。
延伸閱讀﹕尖沙嘴海旁3+5下午茶 Amelia Hong Kong米芝蓮級數真係有特色？
延伸閱讀﹕落地玻璃望海景 實試尖沙嘴矜貴松露下午茶
延伸閱讀﹕尖東死場驚現文青咖啡店 藍莓味貝果勁煙韌
延伸閱讀﹕平食自助餐！ 普慶餐廳半自助甜品Buffet $120任食10款Mövenpick雪糕
ODEA
尖沙咀廣東道2A號富衛1881公館主樓地下 
12:00 – 23:00 
3988 0088
在〈《暖男爸爸》取景地 古蹟地有來頭 實試ODEA法式庭園果香下午茶〉中有 5 則留言
留言功能已關閉。