2021-01-27

邊2款甜品壓軸? Palco Ristorante尖沙嘴重開 意法下午茶矜貴鹹點夠出色

Palco Ristorante Afternoon Tea


Palco Ristorante Afternoon Tea
{"popup_fix":"false"}

由灣仔打響名堂嘅Palco Ristorante,近月轉址尖沙嘴海港城OTE,餐廳選址尖沙嘴重開,地理位置最大優勢係可享維港海景,但今次全新下午茶Afternoon Tea Set僅於周末提供,下午茶鹹甜點款式貫徹做開嘅意大利菜、法國菜、港式Fusion菜,件件似藝術品,雖然價錢相對偏貴,但食足3hours,唔單止可以拍拖去,更加適合同閨蜜兩個人談心,順便以稍低價錢一嘗高級意法創意料理。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

以環境嚟講,落地大玻璃透入自然光,配合靚海景,的確係幾舒服。據悉,餐廳由本土意法名廚劉銘佳(Ken Lau)主理,獲唔少名人加持,如周潤發、古天樂等,似乎食物質素方面有保證,不過後來翻查資料時睇到當時人曾經話佔中影響生意,小編表示為此大扣分。

下午茶鹹甜點各有6款,望落唔算好吸睛,但選材上就幾矜貴,甚至比酒店下午茶更有High Tea感,誠意度就有啦。另有放置最底層嘅鬆餅2款,Homemade Scones with Clotted Cream and Jam 即自製英式鬆餅,驚喜唔大,今次意外地Clotted Cream 比覆盆子果醬好食,而咖啡或茶都係得Earl Grey, English Breakfast Tea 等常見茶品選擇。

鹹點一律放置中間一層,食材上比較大驚喜,海膽、鵝肝醬、龍蝦肉、蟹肉、三文魚等都算矜貴食材,配搭較清嘅配料,可平衡味蕾,基本上油份唔重,大部份鹹度適中,鹹點的確係出色。另上嘅Mussel Bisque with Saffron 為青口番紅花法式濃湯,以小杯上枱,微量暖湯呈橙黃色,濃湯的確好濃,濃得愈飲愈鹹,鹹到苦癩痢。相反,Lobster Salad Croissant with Avocado 即係牛油果龍蝦沙律配牛角包,粒粒龍蝦肉爽口鮮甜,牛油果磨成蓉,入口Creamy,夠Fresh,配合得好,而牛角包咬落酥脆,夠鬆化,整體夠開胃,適合作前菜。

中層鹹點有Homemade Salmon Sandwiches with Caviar,即自家製魚子醬三文魚夾包,一般嚟講,三文魚都係三層架下午茶鹹點常見食材,三文魚帶微微油香,入口甘甜,配合魚子醬,略帶微鹹,亦提升鮮味,底層麵包片就中和鹹味。而Deep-fried Taro Chip with Sichuan Mala Crabs Meat 為四川麻辣蟹肉芋片,U形脆片內裝有一堆蟹肉,可一啖擺入口,蟹肉幾新鮮,但無四川麻辣味。

至於Foie Gras Terrine with Figs Macaroon 係肥美鵝肝醬配無花果馬卡龍,以馬卡龍托底,上面舖滿鵝肝醬,頂層再加入無花果果肉點綴,鵝肝醬綿密幻滑,鹹甜同時刺激,配搭新鮮。而Sea Urchin Tart 就係海膽撻,屬最估唔到嘅食材,呢件夠精緻,似足藝術品,撻內底層有Custard感,微微海鮮味,上面放有1.5至2塊馬糞海膽,入口Creamy,亦夠鮮甜,的確係三層架下午茶當中好獨特嘅撻!

而最頂層就係甜品,但鹹點選材太出眾,甜品相對會略有失色。當中,Earl Grey Tea Cream Swiss Roll 為伯爵茶瑞士卷,可一啖放入口,忌廉蛋糕幾軟滑,但略嫌伯爵茶嘅茶味唔夠濃。而Handcrafted Mango and Jasmine Tea Tart 即係芒果配茉莉花茶手作撻,茉莉花茶味道唔突出,反而芒果好突出,芒果嘅酸味搶過所有味道,說好的芒果鮮甜味呢?

Wildberry Puff則為綜合野莓果香泡芺,泡芺內夾有吉士醬、粒粒士多啤梨、忌廉,反而呢舊夠清新,入口唔膩。至於聽講屬招牌貨嘅Tiramisu,同一般Tiramisu狀況唔同,入口偏濕潤,咖啡味適中,同時溶化速度好快。

食到中段,侍應送上每人一份雪葩同雪糕,2款甜品壓軸出場,Black Truffle Egg, Ice Cream 係松露雪糕,頂層有少量白松露片,底層又有少量花生之類脆片,雪糕球夾於中間,同時放入口中時,順滑雪糕夾離輕脆嘅脆片之餘,僅有輕微松露香味,不過雪糕溶化速度好快。至於Lemon Sorbet 就係檸檬雪葩,造型細緻,以半個小檸檬為原型,第一啖入口勁酸,其後酸味逐漸化淡,轉為酸甜味,大概係新鮮檸檬汁製作,好清新,適合食到最後Refresh吓味蕾。

小編講吓嘢﹕

英式下午茶本來應該係午餐至晚餐之間嘅輕量餐點,Afternoon Tea原意為慢食點心餐飲,打發下午時光。不過,今次小編去食下午茶,等門口侍應講完電話再入座等足5mins,上枱時間又等足30mins至45mins,變相少咗一段時間享用茶點。加上近年女生食Tea一定係相機食先,影相都用一段時間,小編影相拍片已經好快,只用咗10mins,皆因希望更長時間歎下午茶。而享用三層架下午茶時,食到中段,連頂層甜品都未食完,甚至未開始食,雪葩、雪糕已經上枱。為免雪葩、雪糕融化,最終先食雪葩、雪糕,再食頂層甜品;或者被逼將下午茶節奏加快,極速食完頂層甜品,再食雪葩、雪糕,只有呢兩個選擇。照道理三層架下午茶一整就至少十幾個,唔會逐個即叫即整,難明時間控制上係咩原因,雖然順利完成一頓Afternoon Tea,但就似趕尾班車,似乎有違歎英式下午茶嘅原意。

延伸閱讀﹕《暖男爸爸》取景地 古蹟地有來頭 實試ODEA法式庭園果香下午茶

延伸閱讀﹕尖沙嘴K11 Afterfloom花香下午茶10:4比例失衡? 台式鹹點超飽肚 法式卡通蛋白餅萌爆!

E.A.Tips﹕

(1)下午茶供應日子只有逢星期六、日,平日無得食,供應時間為14:30 – 17:30,可於網上預訂或直接打電話預訂,最好早一個月預訂。

(2)上述下午茶款式10月先開始供應,人均$328,兩個人連加一$722,抵唔抵就可圈可點。不過,建議使用海港城Zone B $50Coupon,侍應話每次最多可用7張,每$100減$50,變相半價,Coupon一方面可從海港城消費得嚟,另一方面可上網搵人出讓更經濟實惠。

(3)每位加$138有香檳飲,叫做Louis Roederer, Brut Premier NV, Champagne France。

(4)若有食物敏感,記得預先同餐廳講聲。
(5)餐廳收開瓶費,每位$38,每支$250。
(6)餐牌只有英文,並無中文。
(7)見到網上有啲人可以坐出面露台座位,但事實上露台嘅室外座位一個人都無,餐廳只安排所有人坐室內。
(8)最後強烈建議我哋呢啲普通人去食要預早時間叫下午茶上枱,因為三層架下午茶上枱時間足足要等至少半個鐘,即使已經預訂座位。

Palco Ristorante

尖沙咀廣東道3-27號海港城海運大廈4樓OTE403-404號舖
12:00 – 15:00、18:00 – 23:00
2382 3123

Please Like & Follow & Subscribe /
歡迎讚好、追蹤、訂閱

       

One thought on “邊2款甜品壓軸? Palco Ristorante尖沙嘴重開 意法下午茶矜貴鹹點夠出色

Comments are closed.