隱藏科技大學旁白水碗沙灘處處影相位

[sig_post_pv label=””] 個人瀏覽過

[sp_html5video category=”3514″]

要抓緊夏天尾巴，就要去沙灘行吓啦！不過市區大多數沙灘都人頭湧湧，即使只係兩個人散吓步都難。今次介紹一個非康文署嘅海灘，睇落遠離市區，實際上靠近香港科技大學，非常方便。

【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】

即使唔落水，去沙灘行吓都可以有透心涼嘅感覺，試吓去香港科技大學旁邊嘅白水碗、露營灣，兩者都係西貢清水灣大埔仔附近嘅小沙灘，正對牛尾海，右邊可見香港科技大學。沙灘人跡罕至，可以拍拖散步，嬉水又或曬曬日光浴，環境更舒爽。

沙灘旁邊有少量草叢，可以打卡，拍攝小清新文青相片，影出嚟幾IG-able呢！沙灘旁邊原本仲有一個海邊韆鞦，可以打卡，目前韆鞦被拆去，只留低兩條懸垂粗繩索，十足奧運吊環項目，繩索比較高，無米七、米八都拎唔到個圈。再向前行，會見到一道純白小木橋，場景好有童話感，再配合背後清新地農莊嘅話，更有趣。

從白水碗一個小碼頭，會發現有唔少年輕人特別前來白水碗附近玩扒艇、揚帆等海上活動，小碼頭主要係用作預約船隻接載乘客到白水碗或清新地農莊用途。清新地農莊內有唔少影相位，包括好搶眼嘅紅色小風車，有小動物之餘，亦有其他遊樂設施，適合親子玩樂或情侶二人世界。

而沙灘最右邊仲隱藏咗一個小樹屋，盡頭亦有一個小型海邊野餐點，大概係旁邊科技大學同學搭建出嘅小木枱同木櫈，估計係大學活動之用。

去程時只係落樓梯，但回程時就要不斷爬樓梯啦，樓梯斜度幾高，有如長命斜，不過會喺長樓梯旁邊聽到隆隆水聲，山崖邊嘅白水碗飛瀑就近在眼前，瀑布目測長達近百米，場面幾震撼，可媲美梧桐寨瀑布，沿路既可睇睇鮮為人知嘅長瀑布，又可趕走暑氣。

最初從Google地圖睇到白水碗呢個名，感覺趣味十足，所以先會搵到呢個地方，只係Fact Check翻查晒資料，都搵唔到任何名字源由紀錄，如果有讀者知道，歡迎去Facebook留言話我哋知吖！

E.A.Tips﹕

（1）毋須穿過香港科技大學，入口處喺香港科技大學北門巴士站旁邊，只需穿過小閘門，沿Nature’s Harvest 清新地指示牌落樓梯，可以一直去到白水碗沙灘，想去Campsite Bay 露營灣就要再徒步行海邊啦，不過比較危險。
（2）白水碗沙灘並非康文署轄下海灘，所以無救生員當值，亦無更衣室同沖洗設備，要落水就要自行評估風險啦。
（3）乘搭巴士91/91M/792M路線；又或小巴1/1A/11/11M/12/104/101M路線；甚至由彩虹乘搭的士，車程約$50；亦可以由白沙灣碼頭上船直達白水碗，船程大概只係15mins，不過就要先提早預約，人均每程約$30。彩虹乘搭小巴雖然睇落方便，但落車後要行一小段路先到達閘口，但坑口乘搭小巴就可以直達閘口，將軍澳嘅朋友會更方便。
（4）到達白水碗前，會見到一個Nature’s Harvest 清新地小農莊，需預約收費。
（5）去沙灘記得帶備防曬用品、充足糧水，因為並無任何士多。如果只係散步，最好穿著防滑鞋、防曬衫。
（6）白水碗沙灘嘅沙粒幾粗糙，絕對唔係幼細，而且碎石繁多，最好帶備拖鞋，而赤腳行嘅話就要小心。
（7）行去瀑布條路比較崎嶇，記得需要有充足裝備先好行。
（8）去沙灘時要愛護環境，記得自己垃圾自己帶走。

延伸閱讀﹕岩頭沙潛水勝地「港版珊瑚島」小棕林隱藏打卡位

延伸閱讀﹕神秘居酒屋係鄉村食堂？日系屏風變隔板坑口村隱居小隱隱於野