2020-12-02

岩頭沙潛水勝地 「港版珊瑚島」小棕林隱藏打卡位

岩頭沙 小棕林沙灘


岩頭沙+小棕林沙灘
{"popup_fix":"false"}

平常去沙灘嫌太多人?清水灣半島附近有一處神秘沙灘,人煙杳然,附近不單可以潛水,而且風景優美,石灘景更有幾分似東平洲,沙灘既似足迷你珊瑚島,盡頭仲有一個神秘嘅打卡位,恍如西環泳棚2.0!

岩頭沙毗連小棕林,似岬角,靠近五塊田,旁邊係以白色為主調嘅香港風帆訓練協會,90年代曾由英皇御准香港賽馬會資助,岩頭沙同小棕林同樣正對牛尾洲,背面係上洋山,牛尾海嘅海岸景觀遼闊。小路有警告牌標示危險,對出牛尾洲曾經係英軍留低嘅火石洲操炮區、牛尾海操炮區,屬前軍部練靶區。

不過,小棕林珊瑚半島沙灘沿岸風景優美,非常療癒,適合暫時放鬆同避世,沙灘則比較峽長,而少數人會喺毗鄰岩頭沙潛水,探索海底嘅珊瑚、海葵、水母等,但極少人會到小棕林沙灘嬉水或散步,極其量只有零星釣魚客,適合拍拖兩個人散吓步。

至於小棕林命名源由就不得而知,記者未見到有棕櫚樹或棕林,只見沙灘面積比附近清水灣、銀線灣較細小,附近居民亦唔多,最大優點係環境靜謐,沙灘水清沙幼,除咗沙堆中嘅黃泥水。附近近乎了無人煙,仲有幾分似連島沙洲,只係岸邊遍佈岩石,一邊望西貢市中心,另一邊望龍蝦灣同大癩痢島,有興趣不妨去小灘探遊吓。

穿過恍如東平洲嘅石灘,只需略為攀爬,盡頭會見到一個以竹棚搭建嘅迷你棚架,似足小棚屋,穩固座落海岸邊,尤如西環泳棚2.0,可以於綑綁岸邊嘅小泳棚休息、打卡。與其排隊同人逼影相等到天荒天老,不如搵個無人知嘅影相位啦!


E.A.Tips﹕

(1)去小棕林海灘前,最好先上天文台查吓相關天氣狀況,因為石灘比較跣。
(2)小棕林沙灘並非由政府管轄嘅正式泳灘,並無任何救生員、防鯊網或沖洗設備,岸邊岩石數量唔少,游水似乎唔太適合,而且有安全問題,若要落水就要特別小心啦!
(3)可乘搭巴士91號或小巴103號,於清水灣道五塊田落車,落車點有唔少停車位,對面係往釣魚翁路線,見景灣指示牌可沿路向下行,出返近海邊嘅坑口永隆路,途中會見到唔少豪宅、別墅,中途有小路作short cut,直行到底就見到岩頭沙石灘,腳程約20至30mins,如果由香港風帆訓練協會返回坑口交通文匯處,uber車費約$50。
(4)揸車亦可直接沿坑口永隆路駛到沙灘旁邊,不過斜路幾斜,轉完又轉,會有迂迴感,似台灣人所講嘅髮夾彎,同時只有單程路,不時遍佈樹蔭,揸車出入要更小心。駛到岩頭沙盡頭先會見到有小型迴旋處,可以輕輕調頭,附近位置有少量空間可以停車。
(5)村屋附近有可能有狗隻出沒,出入亦要小心。
(6)小棕林沙灘需由香港風帆訓練協會對出小路直入,行到盡頭就會抵達。
(7)泳棚2.0打卡點位置喺沙灘盡頭,需要穿過石灘先會見到以竹棚搭建嘅小型棚架。
(8)沙灘無垃圾筒,記得自己垃圾自己帶走,唔好污染海洋同沙灘。
(9)沿坑口永隆路出入時要避免夜間行駛車輛或行人過路,因為除咗住宅就無街燈。


小棕林

清水灣坑口永隆路
24hours

延伸閱讀:隱藏科技大學旁 白水碗沙灘處處影相位

延伸閱讀:神秘居酒屋係鄉村食堂? 日系屏風變隔板 坑口村隱居小隱隱於野

延伸閱讀:將軍澳小夏威夷徑 小橋流水一星遊

延伸閱讀:晨運路線 直上鴨仔山山頂

延伸閱讀:將軍澳海旁Chill歎東南亞菜 超高脆餅激似一款港式小食

延伸閱讀:【黃店巡禮】將軍澳4間隱藏小店 午餐最平50蚊埋單

Please Like & Follow & Subscribe /
歡迎讚好、追蹤、訂閱

       

One thought on “岩頭沙潛水勝地 「港版珊瑚島」小棕林隱藏打卡位

Comments are closed.