華富邨為南區公共屋邨之一，屋邨背山面海，景色怡人，同毗鄰豪宅貝沙灣擁同樣遼闊靚景，不單有無敵大海景，仲有一道被稱為「扶林飛瀑」嘅隱世瀑布同馳名「雞蛋仔」，由屋邨到海邊，10mins內即達瀑布灣公園。
由堅尼地城乘搭小巴23號，可直達華富邨 
華富邨落車 
落車後沿路向下行 
瀑布灣公園入口 
公園入口向右邊走到尾有樓梯直落 
樓梯盡頭有藍色圍欄 
位於香港仔嘅瀑布灣為一個狹長海灣，靠近華富邨，公園內有唔止一個神秘靚景打卡點，吸引唔少攝影發燒友、拍拖情侶，甚至家庭慕名而至。當中，最出名嘅扶林飛瀑係由於香港開埠後為解決食水問題，而興建薄扶林水塘工程，被截斷一半水流，最終形成現時瀑布灣石灘內嘅瀑布秘景，既可休憩、賞景，又可打卡影相。
扶林飛瀑又叫華富瀑布，雖然唔算太長，僅僅高約15米，流水量不及當年，但流水淙淙，傾瀉而下，水流仍然有幾分氣勢，絕對可稱得上城市中嘅神秘瀑布，相信黃昏時配搭日落加超美晚霞嘅話，環境更優美。水流之上正正係貝沙灣有錢人居住之地，風水學上據悉流水有聚財之意，小編暗付如果企喺瀑布底可以聚財就好。
從瀑布180度轉身，可以喺石灘眺望南丫島風車、發電廠煙囪、博寮海峽，海旁亦可以不時睇到喺海面緩緩移動嘅大貨櫃船、海事處同海關嘅船隻，當中大船同小艇畫面超有舊式香港嘅感覺，值得駐足觀賞。石灘旁有廢棄碉堡、軍事瞭望台，內裏有幾分陰森感，相傳日治時曾有日軍屠殺平民同游擊隊隊員，故被指為亂葬崗，其後更有水鬼等都市傳說出現。
延伸閱讀﹕南丫島大風車推動環保能源 冀保留風力發電
此外，石灘可以找尋雞蛋仔芳蹤，而雞蛋仔亦係石灘上秘景之一。事實上雞蛋仔來自石灘上嘅亂石，層次感豐富，位處石灘盡頭，小編去到時並非退潮時間，所以未能睇到完整雞蛋仔美景。不過，大陸工廠目前因疫情未有復工，天空仍然保持晴空萬里，藍天白雲配搭亂石同半雞蛋仔狀況，兩個人去石灘散吓步，同樣可以輕鬆拍攝絕色美景。
| e.a.tips （1）如果想穿越石灘，不時要澗水，所以最好帶備拖鞋、毛巾、膠袋備用。 （2）行入瀑布灣公園後，向右直行到尾，即可沿樓梯行落石灘。 （3）樓梯盡頭有藍色圍欄，可能要攀過欄杆先可以落石灘睇瀑布同雞蛋仔，如要攀過就必須小心，風雨後就不便攀過。 （4）雞蛋仔基本只會喺退潮時出現，潮漲時就較危險，容易會造成溺斃或失足，唔建議潮漲時去，而朝早或黃昏都會比較大機會影到靚景，不妨預先留意天文台查詢退潮時間。 （5）瀑布流水頗急，危險度相當高，唔好跳落水或攀爬瀑布啦。 |
交通﹕
（1）由堅尼地城乘搭小巴23號，可直達華富邨，落車後沿路向下行，5分鐘即達瀑布灣公園。
（2）可乘搭4/4X/970號巴士，喺華富商場落車，中環到瀑布灣車程約15分鐘，同樣沿瀑布灣道向下行，即達瀑布灣公園。
（3）乘搭的士或自駕都可以到達，公園近左邊會見到有停車場，車位幾闊落，同樣向右邊行到盡頭即達石灘。
公園近左邊會見到有停車場
瀑布灣公園
地點﹕瀑布灣瀑布灣道8號
在〈南區藏五星級瀑布秘景 石灘亂石隨時變雞蛋仔？〉中有 4 則留言
留言功能已關閉。