長沙灣隱藏喺鬧市中嘅小茶館，裝潢設計同一般文青Cafe無異，最特別係由前菜到主菜、鹹點到甜品，大多都以茶入饌，創意又吸睛，當中戚風蛋糕係一款被網民給予幾高評價嘅甜品。
Tea Hub樓底甚高，門外高櫈係唔少年輕少女嘅打卡位之一，門口旁邊有幾個對窗嘅吧枱位，採光度高，環境舒適，裝潢以白色同木質為主調，加上少量乾花裝飾，一室簡潔，清新得嚟有內涵，充滿文青氣息，外面繁華街道同室內清靜茶館形成對比，室內添上幾分愜意，無論一個人嘆茶、兩個人拍拖遊，定三五知己小聚，都非常合適。
查看餐牌，有各款定食、輕食、甜品、飲品，茶漬飯、沙律、窩夫、蛋糕都幾受歡迎，大多以茶為主，據網絡評價，咖啡店內有一款茶食套餐，$78有齊前菜、主食、小食2款同飲品，但當日我哋並唔見有呢款套餐，只有餐牌上嘅選擇。
前菜有蔬菜沙律、茶漬蘿蔔，沙律淋上油醋，酸味令人醒神，蘿蔔好爽口，有微微茶香味。輕食有牛油果三文魚大蝦芝麻沙律 $88，份量唔少，細食嘅女仔應該夠飽肚，三文魚雖然只得兩塊，仍有鹹香味，但牛油果份量比坊間多，大概有半個牛油果份量，牛油果新鮮、綿密軟滑，而且好Creamy。蝦仁有四隻，唔算新鮮蝦，但幾爽口，沙律菜新鮮，芝麻醬另上，可以自己淋上適量芝麻醬，少醬就更健康，但多醬就重芝麻香，沙律菜更開胃。
定食有照燒鰻魚蛋包飯 $110，白飯軟硬適中，鰻魚半條平舖蛋包飯表面，魚肉厚身，質感軟嫩，調味醬汁幾濃稠，微甜，撈飯惹味，滑蛋只係薄薄一片覆蓋白飯，但蛋汁四溢，不單有蛋香味，而且賣相一流！不過，最值得留意係伴碟嘅配菜，有甘筍粒、焗薯粒、三色椒粒等，各款蔬菜粒都烤過、炒過，鮮甜味更突出，加上香料味道更香，仲有微量茶葉調味，令蔬菜鮮甜味中帶有幾分茶香味，絕對係蛋包飯嘅點睛之筆。
飲品以原茶同現泡茶等茶類為主，唔使加錢嘅有山渣洛神花茶，入口微酸，幾Fresh。味道酸中帶甜，令人開胃醒神，夏天可解渴，同時好啱飽肚後飲用，可以消滯。
更值得一試嘅係DIY嘅抹茶鮮奶，跟餐只加$10，係一杯可以自己親手沖製嘅抹茶鮮奶。店員將抹茶粉同鮮奶分開上枱，更給予茶筅，可以自己將抹茶攪拌，直至用腕力刷到起泡沫。店員會同時放上一張小咭，有提及刷茶方法，只要跟程序就可以沖出一杯屬於自己嘅抹茶鮮奶，的確幾好玩！
攪拌完畢後，最好先試試抹茶原味，抹茶味道幾濃郁，狀似日本宇治抹茶，目前去唔到日本，唯有當玩住茶道先啦。然後先將抹茶加入鮮奶當中。當抹茶與鮮奶融合，抹茶會逐漸向下沉，青綠色同純白色結合，會出現漸層效果，極吸睛！抹茶甘香味加入順滑鮮奶，無糖，但有鮮甜味，抹茶味濃度正常，帶甘香味，唔會太苦澀，略嫌奶味太多。
| e.a.tips （1）餐廳比較多人慕名而去，最好避開食飯時間。 （2）先喺門口自行寫上名登記，記低number，有位店員會出嚟叫number，輪到就可以入座。 （3）入座後先自行去收銀處點餐，食物會隨後送上。 （4）逢星期二至五非公眾假期都有下午茶，供應時間為14:30 – 17:30，價錢介乎$30至$98。 |
延伸閱讀﹕長沙灣正宗鰹魚香烏冬 小麥粉製麵條勁煙韌滑溜【有片】
TEA HUB
| 地址﹕ | 深水埗順寧道439號順寧居地下2號舖 |
| 營業時間﹕ | 星期一全日休息；星期二至四 12:00 – 20:00；星期五 12:00 – 21:00；星期六至日及公眾假期 11:00 – 21:00 |
| 電話﹕ | 2337 7278 |
疫情營業時間及最新資訊 :
營業時間將不會受到影響 但由於配合香港政府與COVID-19勾左手指尾6點後出沒的政策 故此TEAHUB在六時起暫不接受堂食 但提供外賣自取 9折 (更新至17/7/2020)(最新店務情況可瀏覽官方FACEBOOK)
在〈長沙灣小清新茶館 自己沖抹茶鮮奶超療癒〉中有 4 則留言
留言功能已關閉。