[sp_html5video category=”2653″]
冰室係香港本土文化之一，天花吊扇配搭狹小卡位，歎杯奶茶都別有一番風味，而冰室亦係舊式港產片拍拖情節嘅熱門取景地。近年連鎖店林立，港式餐飲已經近乎絕跡，加上今年武漢肺炎肆虐，餐廳執笠情況屢見不鮮，但上月長沙灣卻有間冰室開張，Tiffany Blue裝潢加上霓虹燈牌，寫明香港嘆得起冰室，開張一個月內更推出屬於香港人嘅限時優惠。
室內亦有大大個霓虹燈牌寫明香港人，仲有力威健身學院創辦人胡力威師傅嘅口頭禪俾啲掙扎，原意只係胡師傅訓斥徒弟嘅說話，最近意外成為香港年輕人嘅熱門潮語。
香港特首唔俾我哋六點半後去餐廳堂食，香港人唯有轉為買外賣，今次去咗位處長沙灣嘅全新餐廳香港嘆得起冰室，餐廳既有茶餐廳粥、粉、麵、飯，仲有大排檔鑊氣小炒，甚至鐵板餐，以本土美食為主。飯量、小菜份量都充足，可以兩個人共享，拍拖買外賣食都夠飽肚，略嫌小菜無跟白飯、例湯，要加$12先有。不過，例湯當日係粉葛湯，幾有火喉，無味精，只係鹽多咗少少，不過疫情期間難試味，可以原諒。
小菜叫咗霸王雞$78，雞肉份量充足，大概係半隻雞，雞油滲出，雞皮爽彈，雞肉嫩滑，但唔算肥膩，蔥花好香口，醬汁濃淡適宜，意外有水準，配白飯好適合，雞迷可以揀霸王雞、沙薑雞或口水雞。
滑蛋叉燒飯$63 亦係茶記港式碟頭飯之一，將炒滑蛋平舖白飯之上，滑蛋呈半熟狀態特別爽滑，蛋汁香濃，蔥花點綴更有層次，加上軟嫩半肥瘦叉燒，有微微肉香，白飯亦夠乾爽，飯量兩個人都夠食。一口白飯連滑蛋同叉燒特別有港式味道，鹹中帶甜，懷舊感重，台式有古早味，港式亦有懷舊味，只係色澤雖鮮明，但略嫌叉燒唔夠焦香感。
飲品比較重冰室感，包括有咸檸七$23同龍鳳檸樂$23，紅紅綠綠嘅汽水冰爽涼快，夏天飲夠消暑。咸檸七係七喜配咸檸檬，酸鹹味夠開胃，而龍鳳檸樂就係可樂配咸檸檬再加檸檬，雙檸一出，味道更酸爽，好fresh，而且可以解膩。
香港冰室文化可追塑至70至80年代，甚至40至50年代。40至50年代時，香港為殖民地時代，受英國下午茶文化影響，售賣輕食、甜品同飲品，為中價位食店。直到70至80年代，冰室變成大眾化，轉為加入粥、粉、麵、飯等食物款式，類似茶餐廳，只係食物牌照唔一樣，冰室細牌唔能夠用明火煮食，不過目前大多冰室同茶餐廳已融為一體。
| e.a.tips （1）餐廳新張期內一個月仲有特別優惠，只要身分證內有6、1或4，喺指定日子出示身分證就有全單8折優惠，而括號內有上述數字亦有$50優惠，可堂食享用午市套餐，超過$50就只需補差價，上述優惠僅限堂食同需6歲以上有效身分證正本。每個數字維持2個星期，最後一個星期輪到身分證有4號嘅朋友，限時優惠淨返3日，截至7月25號，快啲Tag身分證有4字嘅朋友啦！更多詳情請參閱官方Facebook。 |
延伸閱讀﹕長沙灣小清新茶館 自己沖抹茶鮮奶超療癒
香港嘆得起冰室
| 地址﹕ | 長沙灣青山道373-379號昭德大廈地下A及B號舖 |
| 營業時間﹕ | 12:00 – 22:00 |
| 電話﹕ | 9373 7363 |
在〈俾啲掙扎！長沙灣全新冰室開張 限時優惠最後3日〉中有 2 則留言
留言功能已關閉。