長沙灣呢個小區位置藏於荔枝角同深水埗之間，工廈林立，唔少食肆都設於工廈之內，當然設於地舖嘅良心小店都唔少，但有部份毫不顯眼，以下3間小店隱藏於隨時會錯過嘅地舖，同樣主打日式美食，相信兩個人去都會好啱食。
（1）Tea Hub
旁邊係街市嘅Tea Hub，以小茶館設計，同文青Cafe差唔多，但左右兩旁一紅一綠嘅街市檔搶盡眼球，加上馬路邊嘅發泡膠盒、筲箕，更顯凌亂，顯得以白色為主調嘅Tea Hub裝潢更簡潔，強烈對比下更顯愜意，餐廳食物、飲品則大部份以茶入饌，適合拍拖嘆吓茶。定食、輕食、茶漬飯都有招牌菜，飲品當中最特別莫過於DIY抹茶鮮奶，提供材料後，容許客人自行調製，利用茶筅攪拌抹茶粉，再加入鮮奶，有玩茶道感覺，夠晒特別。
延伸閱讀﹕長沙灣小清新茶館 自己沖抹茶鮮奶超療癒
（2）鰹烏冬
第二間更處於偏僻小巷，係日式烏冬店鰹烏冬，店內座位極少，似日本小店。以日本讚岐烏冬炮製，既有熱湯烏冬，亦有冷烏冬，麵條煙韌彈牙，稍粗，唔會有粉狀感覺。鍋仔燒熱烏冬入口暖笠笠，而冷烏冬則更清爽滑溜，酸甜味好開胃，前者適合冬天食用，而後者則適合夏天享用。
延伸閱讀﹕長沙灣正宗鰹魚香烏冬 小麥粉製麵條勁煙韌滑溜【有片】
（3）燒夜食堂
至於第三間小店雖然位處馬路邊，但門口比較隱秘，保持關門狀態，有人出入先會開門，行過都未必留意得到。行入去室內先知係黃到金，而食物主打嘅係串燒同小食。拉麵只屬一般貨色，反而沙律、炸物、串燒質素唔錯，串燒當中生燒車厘茄最啱食完肉類串燒後中和吓鹹味。
延伸閱讀﹕隱世良心小店 惹味串燒最啱佐酒
