茶果嶺村
九龍,  兩個人影吓相,  神秘之地

碩果僅存市區古村落 茶果嶺村隨時被消失?



茶果嶺村

市區見慣石屎森林,要離開石屎森林通常都要去新界空曠地方,但其實有心搵一樣可以喺市區發掘到隱藏喺高樓大廈之間嘅好地方。茶果嶺村就係一個城中古村落,位處觀塘至藍田之間,靠近海旁,由破舊鐵皮屋到天后廟,都充滿歷史痕跡。

茶果嶺村有逾400年歷史,係一個香港碩果僅存嘅寮屋區。清朝時已經有人於茶果嶺居住,可以採掘花崗岩、瓷泥等石塊,香港終審法院、舊中國銀行大廈亦採用茶果嶺出產嘅材料建造。但點解叫茶果嶺?據了解,清末時山上有極多茶果樹,學名為血桐,而蒸茶果需大量血桐樹葉,而血桐樹又被新界居民稱為茶果樹。

二戰後,大量難民同時間擁入香港,於茶果嶺小村落與建木屋、鐵皮屋,人手興建嘅鐵皮屋逐漸成為大型寮屋區之一,最高峰曾經有三萬人居住,不過目前僅剩低約300人,有唔少係前舖後居嘅居民,榮華冰室就係其中之一。而茶果嶺村位置偏僻,曾有利偏門業務發展,當時就有唔少賭檔、私酒釀製、毒品販賣出現,所以茶果嶺村亦曾被稱為小澳門。70年代時,採石業推動經濟發展,提高本地就業人數,茶果嶺亦係擁有石礦場嘅小小地方。

其後,茶果嶺村曾經幾度經歷拆卸重建風波,香港上屆特首梁振英、現屆特首林鄭月娥都分別曾提出重建計劃,回收土地作建屋用途,上年特區政府曾有意將原先茶果嶺村300伙改為3000伙新樓。不過,茶果嶺鄉民聯誼會聯同私人發展商喺本年3月以保留4幢歷史建築、改劃5幢公營房屋同2幢私人住宅為由,向城市規劃委員會提出申請,惜5月立即被規劃署反對,稍後會再作審議,全民派一萬蚊都無咁快有回音。

目前見到嘅村落鐵皮屋好簡陋,通通為人手搭建,村內雜物甚多,小路亦狹窄難走,但畢竟鐵皮屋曾經為居民遮擋風雨,係幾有特色同價值。茶果嶺村仲有咩值得睇?當中,以花崗岩石建造嘅茶果嶺天后廟較為人熟悉,天后廟旁嘅四山公立學校則為村內校舍。羅氏大屋亦係由採礦所得嘅花崗岩建造,歷史悠久,而由麻石建成嘅聖馬可堂係早期香港路德會傳教之地。沿茶果嶺道而行,會發現一幅代表村落嘅壁畫,仲會見到逾20米、曾多次奪得冠軍嘅超長合義龍龍船,但目前因填海問題未能推到沙灘,所以已荒廢同退役。至於靠近觀塘方向嘅茶果嶺大廈亦有古舊風格,附近仲有一對求子石,有指誠心祈求可獲天賜男丁。

古村落同隔離市區繁華氣息有天壤之別,相比新樓,居住空間雖然唔多,環境睇落有幾分惡劣,例如2006年曾發生大火,燒燬多間房屋,但居民同鄰舍關係的確較親密。可惜,政府似乎仍然對茶果嶺村虎視眈眈,估計為咗安置每日150個新移民,大量興建公營房屋,將石曠場同村落納入土地規劃一部份,無視舊有時代嘅歷史遺跡。無論村民同政府達成共識,定係同發展商合作,似乎呢條古村落都無得留低。趁茶果嶺古村落仍然存在時,各位不妨兩個人去拍拖散吓步、影吓相留念,時代巨輪不斷轉動,寮屋區小村落遲早被摧殘,隨時下月就會被消失。唔通茶果嶺村真係唔可以同社區發展並存?

交通﹕

(1)由藍田巴士總站步行過去,經隧道天橋、工業邨,沿路有茶果嶺天后廟路牌,約15至20分鐘可到達茶果嶺天后廟。
(2)由觀塘巴士總站步行過去,經麗港城,5至10分鐘到處茶果嶺大廈。

e.a.tips
(1)沿路無乜遮陰位,最好有防曬或有遮。
(2)由茶果嶺天后廟至茶果嶺大廈,中間腳程大概只係10mins。
(3)茶果嶺村有居民居住,記得保持安靜,唔好騷擾居民生活。

延伸閱讀﹕滙景廣場隱藏美食區 5間藍田良心小食店一文睇清

茶果嶺村 / 茶果嶺天后廟

地址﹕茶果嶺茶果嶺道

羅氏大屋

地址﹕茶果嶺道50A、51及51A號

茶果嶺大廈

地址﹕茶果嶺茶果嶺道147號145

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛
葵涌點心燉湯專門店同區2間分店!10款足料燉湯+11款黏軟蒸飯任揀
元朗燒味人龍店賣燒鵝燒鴨叉燒塞爆飯盒 一盒雙拼飯低至$30平過酒樓!
隱藏中環橫街窄巷 OL至愛健康越式三文治
禮頓山古典復興教堂登一級歷史建築 銅鑼灣鬧市秘道通往避風塘
皇冠郵筒起步!柴灣屋邨後山藏舊式鐵滑梯 引水道側百年英式石橋點解叫猛鬼橋?
九龍寨城舊區半日遊!市建局即將拆卸重建 窺探二戰後舊式建築物 賈炳達道休息站處處
【野餐隨行】沙田瀝源超隱秘街市小店 蒸點心/雲吞麵加添自家製辣椒油火花十足