2020-09-21
滙景廣場

滙景廣場隱藏美食區 5間藍田良心小食店一文睇清



藍田向來並非美食地帶,要搵食比較困難,位處滙景花園之下嘅滙景廣場係最靠近巴士總站、港鐵站,交通往來極方便,係附近居民必到之處,方便學生哥放學覓食,亦係一個可以拍拖兩個人篤魚蛋嘅地方。藍田有好多連鎖店,唔想幫襯連鎮店就唯有花少少時間搵食啦,今次為大家介紹5間藍田良心小食店,當中有手卷、芝士撈麵、雞蛋仔等鹹甜小食,唔係淨係葵廣先多小食店嘅,呢度絕對係五間小店,缺一不可!

美食點(1)﹕芝C Sushi

三年前原址為大角嘴嘅芝C Sushi,主打係芝士卷物、壽司,但小編最記得係手卷,可以將魚生隨意配搭,加入手卷內,每次都超足料,老闆包手卷方式有別於坊間手卷,唔會只得表面有餸,每次食手卷,食到底都係餸!當時手卷可以兩拼、三拼,甚至四拼,價錢只係逐樣加上去,比坊間更平,可惜轉址後,似乎已經無得咁配搭。手卷無得隨意配搭,明顯比以前唔同,芝味加拿大海膽手卷 $44 同芝C卷 $38 均以芝士為主打,表面舖有濃厚芝士,陣陣芝士香向來容易令人垂涎,海膽手卷入口帶Creamy感,芝士卷物以反卷包裹芝士、三文魚、帶子、飛魚子,芝士呈流心狀,反卷頂尖再舖有一層芝士,以忌廉芝士、車打芝士、水牛乳酪芝士形成三重芝士口感,芝士迷絕對唔可以錯過!

芝C Sushi

藍田滙景道8號滙景廣場5樓66號舖
12:00 – 22:00
6528 6855


美食點(2)﹕簽上的波兒

魚蛋、燒賣係最平又最方便嘅小食之一,篤串魚蛋、食串燒賣,令人超有童年回憶,以前唔使5蚊就有,而家便利店要十幾蚊,而且係綑綁式消費,通常需要一次買兩串。呢間小食店招牌魚蛋每串有6粒,同燒賣一樣每串只需$7,魚蛋彈牙鮮美,咖哩汁唔太辣,午餐叫個香濃芝士撈麵 $13,加多兩隻瑞士汁雞翼 都係加$11,雞翼滷得入味,略嫌撈麵無乜芝士香味。

簽上的波兒

藍田滙景廣場5樓170B舖
星期一至五 11:30 – 20:00;星期六 09:30 – 20:00;星期日 11:30 – 20:00
2338 8642


美食點(3)﹕好味雞蛋仔

雞蛋仔亦係香港人童年必食小食之一,原本係因為50年代時有雜貨店免得浪費食材,將唔賣嘅蛋加入牛油、麵粉等變成蛋漿,加入模具內,烘成香噴噴嘅雞蛋仔。目前雞蛋仔演變出多種唔同口味,不過始終最原始係最正宗同美味,呢間小食店亦以雞蛋仔或格仔餅 $15 為主打,既有忠於傳統嘅原味雞蛋仔,亦有紅豆餡雞蛋仔,傳統、新潮兼備,但小編覺得終究原味係最有蛋香味,即食時雞蛋仔特別薄脆,入口煙韌又鬆軟。

好味雞蛋仔

藍田滙景道8號滙景商場5樓293號舖


美食點(4)﹕Happy Family Cookies & Desserts

食完鹹點,都要食返啲甜品,身處滙景廣場,可以去埋Happy Family Cookies & Desserts,試試小店嘅手工製作小甜品,如北海道3.7牛奶布甸、蛋花大菜糕、原味或Oreo味木糠布甸,最特別係糯米糍,分別有Oreo味、麥提莎味同榴槤味!另外,仲有泰式炒雪糕,每球$25,每兩球$28,基本可以選擇有朱古力、士多啤梨、芒果、薄荷朱古力,再自選構棉花糖、彩虹朱古力碎、曲奇碎等,雪糕製成雪糕捲,好彩唔會溶得好快。

Happy Family Cookies & Desserts

藍田滙景廣場5樓55號鋪
5402 6082


美食點(5)﹕手卷屋

滙景廣場內除咗芝C Sushi仲有另一間手卷店,手卷屋位處好味雞蛋仔對面,以手卷、壽司為主,以外賣較多,但都有少量堂食座位。壽司最平$5起,手卷就$10起,最值得試嘅係精選3食便當,每日有唔同款式,一盒只係$44,一個人食又平又方便,兩個食$90有找!便當內有3款壽司同2款卷物,又有冷麵或飯,再配一款自選小食。冷麵有招牌醬或芝麻醬,招牌醬酸酸甜甜,好開胃。小編特別推介嘅小食係厚燒玉子,玉子超厚,既有蛋香味,表層舖有香濃芝士,亦有火炙感。

手卷屋

藍田滙景道8號滙景廣場5樓183-187D號舖
5111 3431

Please Like & Follow & Subscribe /
歡迎讚好、追蹤、訂閱