尋廢堡！隱藏版藍田後花園打卡穿梭五桂山茅湖山直通將軍澳

[sig_post_pv label=””] 個人瀏覽過

藍田向來係比較沉悶嘅地方，既少見良心店，亦甚少影相位，但其實向上而走，都可以係兩個人嘅拍拖好去處。從藍田公園開始，既可於觀測台賞景，亦可找尋隱藏於園內嘅草原打卡（編按﹕2021年初仍有，目前就未有草原景，可能要等多陣先有嘢睇），更可以穿梭小山徑直達五桂山，甚至沿山徑通往將軍澳方向，路段雖為靜謐山路，但尚算易行。

從滙景廣場為起點，穿過啟田商場，再經平田街公園、藍田配水庫遊樂場，途經藍田綜合大樓、德田廣場，即到達藍田公園，腳程約20至25mins。藍田配水庫遊樂場被附近屋邨包圍，景觀一般，但內有2個7人足球場，亦有緩跑徑，空間尚算闊落，而樓下平田街公園亦不時有花可睇。

由碧雲道入口起步，沿路直上靠近五桂山、1991年建成嘅藍田公園，園內空間十足，一直沿斜路、梯級上山，會見到一個又一個遊樂場、涼亭，約15mins可到達山頂觀景台，飽覽藍田、秀茂坪一帶東九龍嘅風景之餘，亦可眺維多利亞港，雖然被樹蔭遮蔽，但都算係市區後花園。

延伸閱讀﹕藍田平原激罕秋冬紫芒草媲美金黃芒草一條路線登鯉魚門魔鬼山炮台賞夕陽

延伸閱讀﹕碩果僅存市區古村落茶果嶺村隨時被消失？

而藍田公園亦隱藏一個綠油油嘅打卡位，走到藍田公園邊緣位置，會見到一道秘密小路通往小草原，小草及腰，形成一個秘密花園，打卡一流！

若要經藍田公園上五桂山，有兩個路口都可以進入，一個由藍田公園內公廁旁邊樓梯上山，沿指示牌安達臣徑出口而走，會經過地母元君廟，右邊會有小山路通往五桂山；而另一個路口可由觀景台起步，行至馬游塘中休憩處，再向前行可去到同一個路口，沿山路上山，10mins即可到達五桂山。

五桂山最高點約有304米，又叫五鬼山或黑鬼山，有傳清末時期有5名海盜盤據山上，所以有此稱呼。從五桂山航空導航反射器頂端俯視，可見五桂山比藍田公園景觀更開揚，既望維港，亦可望藍田、調景嶺、將軍澳、坑口、康城、柴灣方向，甚至遠眺東龍島、西貢釣魚翁。於五桂山繞一圈，會發現風景無遮擋，而五桂山路段四通八達，同時連接衛奕信徑第三段。

衛奕信徑第三段既可行至油塘、魔鬼山方向，亦可行到寶林、茅湖山方向，沿路都可觀賞將軍澳、維港兩岸風景，樓景、海景交替，山嶺地勢起伏，不過路線都算清晰易走。由藍田行到將軍澳，等於九龍行到新界，用對腳行路，絕對好過搭港鐵啦！

由五桂山緩緩行到茅湖山，約需30mins腳程，路段雖有唔少分岔路，但路線總算明顯，而且多為下行山路，岩石上不時會見到有人寫上石堡或畫上箭嘴指示，末端可以行到茅湖山。

由茅湖山山頂行約10mins，可到達茅湖山觀測台，亦叫茅湖廢堡，屬一級歷史建築，亦係二戰時期軍事遺跡，為士兵雕堡，用作觀測台，而落山路段僅約5至10mins。山腳可見普賢佛院，即前調景嶺警署及職員宿舍，同舊調景嶺巴士總站，再行10mins可達靈實醫院，然後回到將軍澳市區。

E.A.Tips :

(1) 有大量巴士、小巴路線可到達藍田站公共運輸交匯處，包括小巴路線17,19S,71A,71B,62S,76B、
巴士路線 40A, 252X, 6P,14,14B,14H,14X, 15,15A,15X,38,38P,42C,62X, 89D,93M,215X,216M,258D,258P, 259D, 267X,277E,277P,277X, 601,601P,606,606A,606X, 619,619P,641,671。

(2)如果唔想行路上藍田公園，可以於藍田滙景花園附近乘搭巴士路線215X,216M, 16,603,603S,889,N216，又或小巴路線63,24號去到藍田公園。

(3) 要帶備充足糧水，避免缺水或中暑。

(4) 愛護環境，謹記自己垃圾自己帶走。

(5) 藍田公園邊緣草原後為禁地，記得要自律，避免走到後方位置。

(6) 路線末端下山後可達靈實醫院方向，小巴路線107號可來往將軍澳新都城，再行10mins可出返寶林北路，有多條巴士路線可返回市區。

(7) 若黃昏時間睇完日落先落山，最好帶定頭燈，因落山要一段時間。