最近，藍田鬧市間出現咗一片紫芒草田，吸引唔少山友駐足觀賞打卡，生長於平地上嘅紫芒草其實叫紫穗狼尾草，同芒草形態有幾分相似，花田遍佈平原，拍拖兩個人影吓相亦幾浪漫㗎，絕對係「追芒族」必去嘅影相地！捕捉完紫芒草田風光，既可以穿梭至五桂山、茅湖山，亦可以從藍田走到鯉魚門，登上小山徑，前往魔鬼山，最後以鯉魚門石礦場作結，市區同樣可以玩足一日。
擁有紫色芒草田嘅係藍田公園，而位置只屬一個大平原，處於藍田公園最頂端，靠近可遠眺維港景、秀茂坪一帶景色嘅觀景台同馬游塘中休憩處，附近路段可以連接五桂山，藍田公園內只有一個小入口可以通往該大草原。當紫芒草配合昏黃光線，色調比一般芒草更為唯美而浪漫。
事實上，呢一種紫紅色芒草其實係叫做紫葉狼尾草，為台灣野生狼尾草嘅一種，大多遍及台灣地區，一般容易栽培，而且適應力強兼生長迅速，名稱上又可以叫做紫穗狼尾草、羽絨狼尾草，因色調紫紅，狀似芒草，所以一般叫紫芒草，於香港鬧市平原地帶比較少見。
而紫葉狼尾草最高可達4至5公尺，至於今次藍田公園背後平原上嘅紫芒草，就約有1至2尺，即半個人嘅高度，葉身頂端有絨毛，莖上呈紫色，花絲呈白色，花序似狼尾，多於草叢生長，顏色吸睛，飄逸彎曲，構成紫色草原，既充滿浪漫色彩，同時亦帶有神秘感覺，令人不禁想接近。
紫葉狼尾草於11月已經盛開，形態同一般金黃芒草「撞樣」，只係葉子頂端為淡紫色，而且紫色狼尾草呈毛絨狀，媲美普通芒草，同一個平原內既有紫芒草，亦有普通芒草，原來每逢秋冬時節都會盛開，毋須登山就可以尋得芒草海打卡，甚方便。如果配合下晝昏黃光線，紫芒草頓時會閃閃發光，陽光下嘅草田會更壯觀呢！
延伸閱讀﹕尋廢堡！隱藏版藍田後花園打卡 穿梭五桂山茅湖山直通將軍澳
觀賞完紫芒草田，折返碧雲道，一直向下行，可以前往油塘近鯉魚門邨方向，魔鬼山名稱狀似高難度，實際上輕鬆不過，只需步入幽靜小山路，即可輕鬆通往熱門山徑魔鬼山。大多數人會經鯉魚門石礦場直上魔鬼山，編輯建議從較少人步行嘅鯉魚門邨上山。
該山路起點可以前往將軍澳華人永遠墳場，入口位置於鯉魚門邨旁邊路段，路段左邊可見入口通往嶺南古廟，一直上行至分岔路口，靠近墳場，可眺望對岸日出康城、將軍澳堆田區。攀升約100米後，需時約20分鐘，轉右可以連接衛奕信徑第三段，上行樓梯之後再經少量游繩路段，就可以登上魔鬼山山頂。
魔鬼山僅高約222米，位於油塘至調景嶺之間，可眺望筲箕灣方向，本身被官方稱作炮台山，名稱有別於港島嘅炮台山，亦有人稱作雞婆山，據稱清代時被海盜佔據，充滿罪惡，所以被當時居民稱為魔鬼山。山頂上有魔鬼山炮台、歌賦炮台都係戰時遺跡，由英軍用作保護航道用途，現時環境有如港版吳哥窟，曾被列為香港二級歷史建築。
而魔鬼山背靠照鏡環山，於山頂觀望，可以回望油塘風景，俯首鯉魚門三家村、鯉魚門海峽，眺望對岸杏花邨、筲箕灣，另一邊則可以回望九龍半島、維港風景，而魔鬼山炮台前面就係歌賦炮台，同樣係英軍嘅軍事設施。於炮台頂端位置觀景，黃昏時份可以觀日落，晚間時份亦可觀夜景，反正折返鯉魚門石礦場方向路段全為瀝青路，危險度亦唔高。
從魔鬼山山頂落山，下行樓梯會通往馬路，左邊可以穿過馬環村前往鯉魚門石礦場，而右邊則可折返油塘大本型方向，簡單嚟講，就係剛才嘅魔鬼山入口位置。
延伸閱讀﹕三家村碼頭走20分鐘闖鯉魚門石礦場 驚現西藏梵文彩旗 荒廢石屋/廢墟石灘/大石山打卡
E.A.Tips :
❷ 於藍田匯景商場穿過啟田商場，再上行至藍田配水庫遊樂場，經德田商場，上面就係藍田公園入口。
❸ 巴士路線16, 603, 603S, 889, N216、小巴路線63,24亦可到達碧雲道，於碧雲道可以直接登上藍田公園入口。而巴士路線6P,14,14X,14D,14H, 33,33B,62X,214,259D、小巴路線24,24M,76B 則可到達油塘。
❹ 步行上行人徑，走約500級樓梯後，就可以到達涼亭觀景台，位置近馬游塘中休憩處，平原小閘口位於觀景台下面，靠近安達臣徑出口。
❺ 紫葉狼尾草位於頂論大平原內，有幾處都可以影相，毋須爭相於同一個位置打卡。
❻ 謹記眼看手勿動，唔好採摘草田間狼尾草，如果想好似編輯手執狼尾草拍攝，可以於草田間找尋已經掉落地上嘅狼尾草，色調會就比較暗淡，但總比自私採摘好。
❼ 拍攝時要小心行走，盡可能唔好踩入草田間。
❽ 如果黃昏後步行上落山，謹記帶上照明工具。
❾ 魔鬼山油塘鯉魚門邨方向入口位處高超道，前行於左面通往嶺南古廟小山路就可以連接衛奕信徑第三段，通往魔鬼山。
❿ 經過分岔路口墳場時，謹記保持安靜，勿騷擾先人。
⓫ 謹記愛護環境，自己垃圾自己帶走。
⓬ 雖然難度唔高，但都要記得帶上足夠糧水上山。
⓭ 藍田公園平原位置略有蚊蟲，可事前做足防蚊措施。
⓮ 由藍田公園碧雲道前往油塘鯉魚門邨，步程約需30分鐘。 藍田公園紫芒草位置﹕
藍田公園
藍田碧雲道/藍田連德道
2341 4755
魔鬼山
香港九龍東部
在〈藍田平原激罕秋冬紫芒草媲美金黃芒草 一條路線登鯉魚門魔鬼山炮台賞夕陽〉中有 1 則留言
留言功能已關閉。