想飲茶、食點心？坊間一般都係連鎖式茶樓，想安安落落食點心都幾困難，沙田石門就有一間中式點心專門店，可以喺小店「飲啖茶、食個包」，招牌套餐仲有蒸飯拼燉湯，單身一個人就抵食又方便，拍拖兩個人加多兩件點心就夠飽肚，仲有夜茶供應，啱晒一眾夜貓子。
石門蒸盧嘅燉湯飽受網民負評，今次小編決定親身試伏，大概合共有5款燉湯，黨蔘天麻川弓燉魚頭湯係其中一種，基本材料含黨蔘、天麻、川弓、白芷、杞子、圓肉、魚頭，有助行氣活血、平肝息風、通經活絡，可治頭暈、頭痛、月經失調、風濕、痺痛等。燉湯以一盅盅上枱，揭開蓋時不斷冒煙，熱辣辣，驟眼睇材料豐富，不欺場，只係整體偏油，略帶肥膩。燉湯顏色略深，的確係濃郁，入口即時感覺到藥材味超重，藥材有啖啖回甘味。燉湯未至於比茶餐廳湯差，但藥材散發出微酸味，估計係杞子，桂圓肉香甜味未能中和。魚頭雲滑嫩，但鮮味同香味未能融於燉湯內，就係欠缺魚味，最奇怪係湯內有一件魚頭雲，但湯內竟然毫無魚味，只有極濃藥材味，實在令人廢解。小店曾稱燉湯無添加味精，最大特色係俾客人自己添加少少鹽作調味，作為湯袋一名嘅小編表示，真正嘅靚湯其實係唔需要添加任何幼鹽、粗鹽、淮鹽、岩鹽或海鹽。不過，絕對欣賞材料夠充足，如果湯名叫黨蔘天麻川弓湯會比較高分。
套餐可以燉湯連荷葉蒸飯，南瓜鳳爪排骨飯放置荷葉表面，以大個竹籠上枱，籠仔蒸飯的確幾霸氣。除咗鳳爪、排骨、南瓜粒，仲有菜心粒粒，整體顏色鮮艷吸睛。飯粒黏口，偏濕潤，並非乾身，有輕微荷葉清香味，油份唔算多，甜豉油另上，可自行添加，不過小編覺得無需要加甜豉油。豉味鳳爪配豆豉排骨係一盅兩件必食盅飯之一，份量唔少，掛列整齊，鳳爪略有彈性，醬汁幾濃，排骨滑嫩帶酸甜，肥肉唔多，只係略嫌唔夠乾身，菜芯粒無咩青味，幾爽甜，但最美味反而係南瓜粒，軟腍又香甜，撈飯有啖啖南瓜微甜味。
晶瑩蝦餃皇喺套餐加小點價錢就有兩粒，出爐時脹卜卜，睇落好飽滿，蝦餃皮的確幾薄，晶瑩剔透，白裡透紅，雪白蝦餃皮透視紅噹噹蝦肉，表皮入口煙韌滑溜，蝦肉鮮甜，份量幾多，雖然唔算好爽口彈牙，但還可以接受。而蟹籽燒賣皇亦似乎係招牌之一，份量充足，一籠有四顆，每件都好大粒，比平時坊間食嘅燒賣大一倍，加上橘色蟹籽點綴，好吸睛。整體餡料都足夠，蝦肉、豬肉各佔一半，豬肉略肥膩，但蝦肉可以接受，質感好紮實。
腸粉賣晒，唯有轉為點選鮮竹牛肉球，牛肉球反而相對招牌貨有水準，將適量牛嘅肥肉、瘦肉攪碎，加入馬蹄粒、蔥粒，軟腍肉球帶有爽口馬蹄口感，再添加少量調味料，搓成團團膠狀肉粒，蒸起時牛肉球呈凹凹凸凸，顯現粉漿適量，質感彈牙，牛味雖唔算濃，但滑嫩黏口，喼汁相當配合。另外，潮州大粉果同蝦餃相似，一樣飽滿，粉果皮、蝦餃皮比餡料出色，餡料有爽口白蘿蔔同韮菜碎等，但唔太食到花生粒、蝦米。而薑蔥牛栢葉係周末限定，睇落夠大碟、好足料，入口味道不過不失，配料較入味，牛栢葉好有咬口，有咬口到啪入口咬咗10mins都未咬得爛。
小編發覺甜品比點心優勝，冰凍紅豆杞子桂花糕一碟三件，件件晶亮，燈光照射特別透光，最啱目前天氣炎熱下食用。將桂花糕、紅豆糕融合，底層為紅豆糕，上層為桂花糕，側面可睇到材料充足，底層有密集紅豆粒，上層舖有桂花、杞子。紅豆糕略甜，粒粒紅豆有咬口，亦幾大粒，軟心微微起沙，桂花糕散發幽幽清香感，桂花味慢慢滲出，清甜味配搭紅豆香甜味，桂花糕中和紅豆糕甜味，顯得唔算太甜。
延伸閱讀﹕點心界KOL？ 本地人爭食招牌牛肉點心 女人街一盅兩件好過去酒樓
| e.a.tips （1）下午茶時間為14:35至17:34，為最平價點心時段，價錢由$14至$30不等。 （2）全日基本分早、午、下午茶、夜市時段，每個時段嘅小點至頂點只係相差約$1至$2蚊，最罕有係夜市亦有營業，可以飲吓夜茶。 （3）全日免加一服務費，平日去可免$4茶芥，熱茶可揀香片、普洱、壽眉茶。 （4）餐廳室內位置唔多，唔建議太多人去。 |
延伸閱讀﹕點心界KOL？ 本地人爭食招牌牛肉點心 女人街一盅兩件好過去酒樓
蒸廬
| 地址﹕ | 沙田石門安群街3號京瑞廣場一期2樓225號舖 |
| 營業時間﹕ | 星期一至五 11:30 – 21:00；星期六至日 08:30 – 21:00 |
| 電話﹕ | 3460 3411 |
在〈沙田石門點心店燉湯試伏 荷葉飯一盅兩件又抵唔抵食？〉中有 4 則留言
留言功能已關閉。