2021-05-17

【黃店巡禮】沙田石門京瑞廣場食乜好? 3間最有人氣嘅本地小店

【黃店巡禮】沙田石門 3間 本地人氣小店


沙田石門嘅京瑞廣場內有唔少良心小店,數目之多,令人花多眼亂,拍拖兩個人去又食乜好?今次挑選其中3間最有人氣又經常大排長龍嘅小店,睇睇有幾平、有幾高水準?

(1)蒸盧

要飲茶食點心唔一定要去連鎖式茶樓,現時有好多中式點心專門店,可以隨時「飲啖茶、食個包」,呢間以蒸飯拼燉湯為主,方便抵食,基本上一盅兩件已經夠飽肚,小店更有夜茶供應,啱晒夜貓們!有5款燉湯之餘,亦有荷葉蒸飯,茶樓應有嘅點心亦應有盡有,水準不過不失,但編輯覺得甜品似乎更有質素。

延伸閱讀﹕沙田石門點心店燉湯試伏 荷葉飯一盅兩件又抵唔抵食?

(2)上車車仔麵

另一間就係最靠近門口嘅上車車仔麵,裝潢傳統,似大排檔,$38即有3餸車仔麵,至於8餸車仔麵就係$50,部份車仔餸有別於一般車仔麵,比如牛面珠條、原件花膠、新鮮鵝腸、仿長腳蟹棒、辣鹹酸菜等。而陳村粉麵底、冬蔭功湯底更加係罕見嘅配搭,陳村粉粗身之餘比河粉薄,冬蔭功醬配腩汁湯底有新鮮感,濃味中有辣味,辛辣味中夾雜輕微香茅味。

延伸閱讀﹕石門居民爭「上車」 懷舊陳村粉拼冬蔭功3餸麵激抵

(3)入麵

位處一角嘅入麵就以台灣菜為主打,午市比較多人,下午茶就比較少人,套餐可享湯撈麵同小食、台式飲品,當中撈麵有日式、麻香醬、口水汁、薑蔥蒜4款任揀,口水汁微辣,其後會愈來愈辣,但辣中帶麻,麻中帶香,幾醒胃。而蕃茄牛肉濃湯有大量牛肉切片,蕃茄粒、洋蔥粒等略有茄蓉感,只係感覺炮製得似罐頭蕃茄湯。至於麵條就似上海麵,爽口唔易斷,黏度唔高,粗幼尚算適中。

延伸閱讀﹕沙田石門平價台灣麵套餐 口水汁撈麵最啱嗜辣者

     

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱