上車車仔麵
兩個人醫吓肚,  和你Taste,  港式

石門居民爭「上車」 懷舊陳村粉拼冬蔭功3餸麵激抵



要數沙田石門街坊良心店,一定係呢一間。一講上車,以為係講地產,實際上係一間車仔麵店,同時係一間經常排長龍嘅小店。

小店裝潢陳設幾傳統,以大排檔形式設計,包括地磚同牆壁,仲有牆上嘅餐牌,以木枱櫈為主,3餸車仔麵僅$38,即使叫個8餸車仔麵都係$50,當中車仔餸有幾款平時比較少見嘅款式,包括牛面珠條、原件花膠、新鮮鵝腸、仿長腳蟹棒、辣鹹酸菜等。

招牌八寶 $50有8款餸,包含溏心蛋、魚蛋、魷魚、牛腩、蘿蔔、雞翼、豬皮、豬腸,仲有菜芯,配搭腩汁好配合,湯底色澤偏深,但鹹度適中。原隻溏心蛋咬開呈流心狀,似日式嗰種溏心蛋,牛腩入口軟腍,帶有少量牛筋感,有咬口。而豬皮、蘿蔔、豬腸就比較吸收湯汁,軟身又入味,豬皮厚身而爽口,幾抵食。不過魚蛋、魷魚就一般,唔太入味同有少少硬身,唔多吸收到湯汁。

三餸麵 $38,陳村粉、冬蔭功都係極罕有嘅車仔麵配搭,餸揀咗豬紅、蘿蔔、牛面豬條,蘿蔔足足兩大舊,夠晒清甜,軟嫩無渣,而且入晒味,豬紅就比較普通,唔太特別。至於牛面豬條就比牛腩更軟嫩,有少少筋位,略帶油脂香,牛味更濃郁,有入口即溶嘅感覺,值得一試。不過,最特別之處係湯底有冬蔭功,麵底有陳村粉,同時叫晒兩種幾有新鮮感,陳村粉比較粗身,比河粉闊但比河粉薄,質感爽滑,好有懷舊味道,好掛湯。冬蔭功湯底原理原來係一羹冬蔭功醬混合基本湯底,湯底本身似係有少少腩汁,略有牛味,加入一羹冬蔭功醬後就成為冬蔭功湯底。本來湯底驟眼睇與感幾稀,無任何掛湯感,但試一試發覺味道幾濃,仲有幾分辣味,辛辣味中又夾雜少少香茅味。

E.A.Tips﹕

(1)小店位處京瑞廣場一期門口,超易搵到。
(2)每款飯或麵都可配一款飲品,有大支裝維他奶同麥精,不過所有支裝飲品都好快就售罄。
(3)限聚令下座位唔多,只得6至8個座位,一個人會比較易搵位,兩個人拍拖去都還可以,不過外賣就比較方便。
(4)每碗車仔麵以兩餸起,最低消費為$30。

延伸閱讀﹕沙田石門點心店燉湯試伏 荷葉飯一盅兩件又抵唔抵食?

上車車仔麵

地址﹕沙田石門安群街3號京瑞廣場1期地下G06號舖
營業時間﹕11:00 – 21:00
電話﹕2448 0028

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!