[sig_post_pv label=””] 個人瀏覽過
昔日要去酒樓集團飲茶先有得食即叫即蒸點心，今日想歎一盅兩件可以輕易搵到好多點心小店。旺角女人街有一間點心專門店，既可以飲啖茶、食個包，又唔會違反記者「和你Taste」嘅原則。每款點心價錢平均$20幾，雖然食物質素可圈可點，但可以取代去酒樓，係兩個人鬧市拍拖過吓飲茶癮嘅好地方。
喜惶點心專門店宣傳功夫做到足，一篇又一篇宣傳下，吸引唔少人慕名幫襯，每日更有$6至$10一碗老火湯，餐廳中央牌匾寫有「牛肉世家」，主打牛肉點心款款新奇，近期成為本地人爭食嘅點心。
延伸閱讀﹕沙田石門點心店燉湯試伏 荷葉飯一盅兩件又抵唔抵食？
各款鎮店之寶牛肉點心包含乾蒸牛肉燒賣皇、陳皮山竹牛肉球、香滑免治牛肉腸粉、黑椒牛仔骨、秘製咖哩牛腩、燒汁牛肉蝴蝶餅、粟米煎牛餅等，以新鮮牛肉炮製點心，的確有彈性兼有咬口。
最受歡迎嘅係陳皮生竹牛肉球 $25，入口軟綿香滑，充滿肉感，入口實在，牛味突出，內含馬蹄粒夠爽口，但腐皮同陳皮味唔多，配搭喼汁就錦上添花，提鮮同去肥膩。另一款牛肉點心係黑椒牛仔骨 $33，牛肉亦好嫩滑腍身，配合黑椒汁後帶微辣味，好醒胃，撈飯食唔錯，無飯就較鹹，略嫌牛仔骨肥膏較多。
除咗牛肉燒賣，亦有蟹肉菜苗燒賣 $29，無用豬肉製作，改用蟹棒肉配蝦肉，餡料夠彈牙，加入菜苗令入口無咁乾身同肥膩，望落脹卜卜幾飽滿。
飲茶其中一樣會叫嘅就係包點類，當中竹炭熔岩奶黃包 $24 包皮以竹炭製作，有黑芝麻味，奶黃包煙韌鬆軟，餡料呈流心狀，內餡帶鹹香味，甜度適中，奶黃暖笠笠，凍咗就好難食。雖然奶黃包搣開同牆上官方拍攝圖片有分別，但奶黃包基本質素唔錯，只係圖片後製太重手。
芥末沙汁三文魚春卷 $29 就幾驚喜，將原先以蝦肉製作嘅春卷改為三文魚肉，再配合芥末沙汁，夠晒新奇，醬汁好開胃，生菜墊底後，春卷皮唔太油膩。而基本點心如魚肚四寶滑雞扎 $25 就不過不失，大大件魚肚、雞髀肉、冬菇都有，略嫌將火腿改為蟹柳，大概係成本控制問題。唔夠飽可以叫碗柴魚花生豬骨粥 $19，粥底綿滑，兩個人一碗都夠食。
至於甜品，紫薯鬆糕 $22 幾鬆軟，顏色雖為淡紫色，尚算煙韌，不過入口似一般鬆糕，比鬆糕乾身，紫薯味唔夠濃郁，大概其他甜品會更香甜。
E.A.Tips﹕
（1）小店為一間排隊店，所以建議早少少去，周末12點幾無人排隊，都重可以揀位，上層、下層任揀，2點門口已經大排長龍。
（2）下午茶時段有一人下午茶，可以試點心拼盤，其他點心、蒸飯都有優惠價。
（3）外賣自取最好提早15分鐘落單。
（4）每位茶芥$4，但鐵觀音味道稍淡，食8款點心，人均約$100。
喜惶點心專門店
旺角通菜街17號地下 
10:00 – 23:00 
2882 1683
在〈點心界KOL？ 本地人爭食招牌牛肉點心 女人街一盅兩件好過去酒樓〉中有 2 則留言
留言功能已關閉。