KOKO Coffee Roaster

慢活歎Brunch 南豐紗廠小店撐本地品牌手沖咖啡



[sp_html5video category=”2335″]

南豐紗廠經活化後,向來係文青聚集地,舊工廠滿滿工業風,與本地倒模式商場有異,亦係唔少人打卡之地,離荃灣市中心僅十至十五分鐘步程,文青小店多多,不時吸引遊客同本地人。當中,有一間靠自家烘焙咖啡豆炮製手沖咖啡嘅良心小店亦受到咖啡迷歡迎,加上環境舒適,係三五知己或兩個人拍拖約會嘅好地方。

咖啡店處於荃灣南豐紗廠,由自家烘焙本地咖啡豆嘅CoCo espresso開設,CoCo espresso喺中區亦有兩間分店,上年以Koko Coffee Roasters正式登陸南豐紗廠。Cafe以貫徹懷舊工業風,樓底甚高,毫不侷促,空間寬敞,歎個Brunch,加杯手沖咖啡,極愜意。Counter旁邊可從玻璃房觀察一個小型自家烘焙咖啡豆工場,既有唔同種類嘅咖啡,亦有林林總總嘅西式麵包、糕點,如牛角包、玉桂卷等,仲有輕食可供選擇。

室內裝潢除咗以工業風設計,暗黑灰調、柔和燈光同牆身裝飾配合,頂燈透視唔少文字喺地面同枱面,增添文青氣質。同時,亦有唔同風格嘅枱櫈,包括吧枱式高腳椅、木質枱櫈、舒適嘅梳化椅,仲有樓梯底嘅戶外茶座,可以一邊享受冷氣,一邊沐浴陽光底下,可以自由挑選一個舒適嘅座位Hea上半日,休閒自在。抗疫期間,咖啡店以膠片分隔,座位之間有一定距離,保障客人,確保衛生。

KOKO手打牛肉漢堡 $128 以輕軟嘅麵包配搭手打牛肉,麵包經烘烤過,表皮光滑而輕脆,最好趁熱食。手打牛肉質感紮實,煎得香口,厚實之餘亦鎖緊肉汁,加上餡料有邪惡嘅芝士、新鮮蕃茄同椰菜,層次豐富。配菜有香脆薯條,份量唔少,的確外脆內軟,不過略嫌油味太重。

班尼迪蛋配三文魚 $88All Day Breakfast中必食嘅款式,Egg Benedict向來極吸引,賣相一流,配搭三文魚簡單之餘不失豐富感。今次Egg Benedict表面加上一層芝士,切開後蛋汁馬上洶湧而出,水波蛋蛋汁滑溜,烘烤過嘅多士墊底,吸收蛋汁後更滿口蛋香味。旁邊有大量沙律菜,新鮮爽脆,另整份Brunch帶有幾分清爽感。

咖啡係重點之一,要歎咖啡最好係飲熱飲,一來味道較香濃,二來有拉花裝飾,不過最近氣溫炎熱,都係飲杯Iced Latte爽吓先啦!咖啡夠冰凍,咖啡味苦澀甘香味比奶味重,質感亦順滑,陣陣苦澀味有些微餘韻散得較慢,而凍咖啡多咗冰粒,比熱飲稍淡都係常識嚟。而另一杯Lemonade以檸檬味為主嘅汽水,酸味較重,不過夠清爽,一啖入口好涼快。

延伸閱讀﹕南豐紗廠輕鬆文青遊 玻璃橋+綠色長櫈打卡

延伸閱讀﹕CoCo Espresso登陸九龍灣 罕見氮氣咖啡綿密有餘韻

e.a.tips
(1)咖啡店不時有客人帶同寵物到場,有啲客人會帶同超大體積嘅嘅狗隻到咖啡店,同Miss A一樣極度怕狗嘅朋友要特別留意。
(2)用餐完畢記得自己將垃圾清走,並將餐盤歸還,保持咖啡店枱櫈乾淨。
(3)咖啡店以自助模式為主,無論坐位、點餐、定取餐,甚至食完清理枱櫈,都係自行入座、用餐、離開。
(4)通常11點後會比較多人,如果想少人啲可以早少少去,避開人流。

交通﹕由港鐵荃灣站行過去約15分鐘腳程,建議搭巴士,巴士線有234A/234X/34M/40/58M/59M/61M,可直達南豐紗廠。亦可以渣車去,只要消費滿$300,即可享1小時免費泊車。

KOKO Coffee Roaster

地址﹕ 荃灣白田壩街45號南豐紗廠六廠地下G09號舖
營業時間﹕ 09:30 – 19:30
電話﹕ 2499 7255

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!