來自法國巴黎、由2018年進駐尖沙嘴海港城嘅松露餐廳 Artisan de la Truffe 松藝館向來以松露入饌，據悉該餐廳喺德國、日本東京都有海外分店，不過抗疫期間未能出城，可以先試試香港分店一款以矜貴松露為主題嘅下午茶。香港歎High Tea嘅地方唔少，到底用松露入饌嘅下午茶可唔唔以突圍而出呢？
松藝館向來以優質黑松露、白松露同季節性松露炮製美食，打造現代法國菜，價錢較親民，而尖沙嘴店可享維多利亞海景，室內裝潢簡約，僅以原木同石紋為主，設計同一般coffee shop無異，有深色梳化設計嘅卡位，亦有落地玻璃旁嘅座位，卡位空間較闊落，而落地玻璃旁就可享無敵海景。
今次松藝館嘅松露主題下午茶，各款鹹點同甜品貫徹其傳統，相當精緻，配搭精選松露，散發啖啖幽香，別有一番韻味。以松露為主題嚟講，每件的確有唔同風格，配搭尚且新鮮。下午茶可選咖啡或茶，茶品選擇唔多，今次叫咗English breakfast tea同iced tea，冰凍檸檬茶屬正常茶品，但English breakfast tea味道奇怪，有種怪異味道，有點澀，唔會再叫。
下午茶共有六款鹹點、五款甜品同一款鬆餅，鬆餅以迷你方式上枱，同一件馬卡龍大小相近，表皮夠乾，內裏保持濕潤，同一般high tea嘅鬆餅唔同，並非配搭忌廉或果醬，反而配搭自家品牌夏松露瑰花蜜，令鬆餅添上幾分甜蜜味。
鹹點比較遜色，有煙三文魚多士、蟹肉忌廉芝士三文治、水牛芝士蕃茄多士、菠菜煙肉芝士餡餅、巴馬火腿及蜜瓜、夏松露薯片，無乜松露感，而且相比其他afternoon tea較普通，亦不太出色，多士大多偏硬，芝士好在唔膩，松露薯片雖然有特色，但同afternoon tea唔太夾。
甜品就正常啲同稍為有獨特感覺，當中有雜莓撻、特濃朱古力蛋糕、藍莓芝士蛋糕、紅桑子朱古力馬卡龍、松露蜜糖奶凍，雜莓撻內係紅莓，略嫌表皮唔夠脆，馬卡龍大小比五蚊銀大少少，內餡由紅桑子味改為朱古力溶，比較特別嘅係藍莓芝士蛋糕同松露蜜糖奶凍，藍莓芝士蛋糕係一粒好似金莎朱古力大小嘅圓球狀，以餅碎墊底，內餡係軟滑芝士，可以邊食邊蘸吓餅碎，呢件蛋糕幾有趣。而松露蜜糖奶凍係比較貼合主題嘅甜品，將松露同奶凍融合，表面有兩片薄松露，啖啖松露散發嘅木質味，奶凍內松露味更香，奶凍順滑，加上蜜糖點綴，帶有甜蜜味。
| e.a.tips 拍拖去食又好，同閨蜜兩個人去食又好，最好先打電話預約，逢星期一至五都無位，基本上逢星期六及日會比較大機會Book到位。 |
延伸閱讀﹕金鐘五星級酒店疫市劈價 Afternoon Tea人均279蚊
延伸閱讀﹕Time Square秘密花園大迷宮 穿越秒歎英式下午茶
松藝館
| 地址﹕ | 尖沙咀廣東道3-27號海港城海運大廈3樓OTE303號舖 |
| 營業時間﹕ | 星期一至五 12:00 – 15:00、18:00 – 22:30；星期六至日 11:30 – 22:30；公眾假期 11:30 – 22:30 |
| 電話﹕ | 2885 2030 |
下午茶供應時間﹕15:30 – 17:30
價錢﹕HKD498 / 2位
在〈落地玻璃望海景 實試尖沙嘴矜貴松露下午茶〉中有 4 則留言
留言功能已關閉。