[sp_html5video category=”2289″]
疫情期間，酒店人流疏落，餐廳生意亦大受影響，最近連五星級酒店都有大優惠，Afternoon Tea 三層架下午茶主打草莓系列，人均減至279蚊，絕對值得疫情緩和時同閨蜜兩個人或三五知己相聚片刻。
Spring Season Afternoon Tea（英式經典下午茶）
疫情雖然緩和，酒店抗疫措施普遍仍然充足，由底層入門到踏入Lobby Lounge，合共需要量體溫兩次，同時提供消毒用品，亦為每位客人提供信封暫存口罩，仲會提供濕紙巾、紙巾等。下午茶時間，Lobby Lounge座位約125個，竟然幾乎坐滿客人，絕對令人有啲意外。
洗手間位置經此樓梯 
金鐘太古廣場入口位置 
樂聚廊 Conrad Hong Kong Lobby Lounge
今次Lobby Lounge提供嘅Afternoon Tea為「Spring Season Afternoon Tea（英式經典下午茶）」，由春季做到而家，以下午茶三層架方式表達，自家製英式美食包括六款鹹食、五款甜品同兩款英式鬆餅。
Spring Season Afternoon Tea（英式經典下午茶） 
鹹點有煙三文魚拼法式麵包、青瓜忌廉芝士三文治、黑松露蜂蜜芥末香檳火腿麥芽三文治、炸芝士意大利燉飯球配蕃茄醬、黑松露蘑菇酥盒、格魯耶爾芝士大蔥蛋批。
炸芝士意大利燉飯球比較驚喜，入口外脆內軟，內餡芝士溶於意大利燉飯內，飯粒微軟，有啲黏口，飯球底部些微蕃茄醬令味道稍清新。青瓜忌廉芝士三文治比較普通，反而黑松露蜂蜜芥末香檳火腿麥芽三文治就層次感較豐富，兩者都係三層三文治，後者餡料較吸引，啖啖黑松露香同火腿香，malt bread為麥芽粉做嘅麵包，有黏黏哋嘅口感。而黑松露蘑菇酥盒同格魯耶爾芝士大蔥蛋批味道尚算可取，蛋批啖啖蔥花香味，但芝士味唔算濃郁，酥盒就唔油膩，但入口唔太鬆脆。
炸芝士意大利燉飯 
至於英式鬆餅就有原味同提子乾口味，特別配上自家製草莓醬同忌廉，鬆餅未算太乾，不過內裏濕度仍充足，牛油味唔算太濃厚，未會太膩，略嫌提子乾口味嘅鬆餅提子乾較少。
英式鬆餅
甜品則主打草莓，包括有Amalfi檸檬草莓撻、Jivara朱古力草莓蛋糕、Grand Marnier烈酒草莓蛋糕、咖啡味歌劇院蛋糕、新鮮草莓配鮮忌廉。Grand Marnier烈酒草莓蛋糕入口比較奇怪，蛋糕過份濕潤，似被水浸到淋嘅蛋糕，反而Jivara朱古力草莓蛋糕同Amalfi檸檬草莓撻有啲驚喜，前者蛋糕較厚實，表皮為草莓朱古力，蛋糕味道較輕，而後者則有啖啖清新感，唔算太膩。而新鮮草莓配鮮忌廉可以選擇後上，杯底有冰粒墊底，保持冰凍，酸甜草莓配幼滑鮮忌廉，清新解膩，適合最後食用。下午茶甜品超多草莓，各位草莓迷絕對不能錯過！
三文治系列 
Grand Marnier烈酒草莓蛋糕 
Amalfi檸檬草莓撻 
Jivara朱古力草莓蛋糕 
咖啡味歌劇院蛋糕
新鮮草莓配鮮忌廉
餐飲可以挑選咖啡或茶，甚至五揀一嘅Specilty Drinks，其中一款係Strawberry Rouge，類似葡萄酒，無添加酒精，加入草莓芳香味十足，狀似蜜酒，杯頂邊緣有草莓點綴，Strawberry Rouge最初入口幾刺激，有些微似梅味，但繼續飲落去，酸甜味散發出嚟，反而可以接受，仲幾fresh。皇家婚禮紅茶以經典紅茶為基底，將花茶同水果結合，隨熱氣飄送，令茶中有啖啖水果香味，而花香味則似薄霧，僅僅襯托水果香甜味，花香味餘韻久久未散，紅茶中更有些微回甘味，紅茶甘醇配搭水果同花香味令人難忘。
Strawberry Rouge 
建議挑選窗邊位置
酒店Lobby Lounge設有落地玻璃，偌大窗戶令陽光充足，仲可以望到港島海景，呢個環境位置歎返個Tea勁疏乎。
皇家婚禮紅茶
交通﹕近地鐵金鐘站F出口，經金鐘太古廣場可達。
延伸閱讀﹕落地玻璃望海景 實試尖沙嘴矜貴松露下午茶
延伸閱讀﹕Time Square秘密花園大迷宮 穿越秒歎英式下午茶
| e.a.tips （1）想要最低價食下午茶，可以去網上訂座； （2）「Spring Season Afternoon Tea」嘅二人份量下午茶為HKD558，一人份量則為HKD338，而每份下午茶都包括草莓特飲、精選咖啡或茗茶，下午茶每位另收加一服務費，兩個人去人均僅約HKD279，加一後為HKD306，無論拍拖定同閨蜜去都好適合。 （3）留意下午茶時間為每日15:00 – 17:30。 （4）港麗酒店需要從太古廣場頂樓進入，只需沿扶手電梯直上，直到平台之下一層，即可沿指示牌內進，並乘電梯上L樓層嘅Lobby Lounge。 |
延伸閱讀﹕茶迷必食！ 尖沙嘴歎皇室御用Twinings茗茶High Tea
樂聚廊 Conrad Hong Kong Lobby Lounge
| 地址﹕ | 金鐘金鐘道88號太古廣場港麗酒店大堂 |
| 營業時間﹕ | 08:00 – 01:00 |
| 電話﹕ | 2521 3838 |
在〈金鐘五星級酒店疫市劈價 Afternoon Tea人均279蚊〉中有 2 則留言
留言功能已關閉。