教堂向來有種神聖意義,除咗進行宗教儀式,亦係唔少人結婚之地,兩個人由拍拖到結婚經歷滿滿,但未結婚嘅朋友都可以去教堂行吓散吓步嘅,因為香港有好多教堂建築都係值得欣賞,個個建築宏偉,富有美感。抗疫期間雖然無得去旅行,但留喺香港一樣隨時有一秒去歐洲嘅感覺,不妨去打吓卡啦!以下五個充滿特色嘅教堂,分別係香港法定古蹟、一級歷史建築,你又去過幾多個呢?
【Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】
(1)伯大尼修院
位處薄扶林道嘅伯大尼修院即係伯大尼教堂,屬香港法定古蹟,曾為香港演藝學院作校舍,係現今全港唯一新哥德式教堂。教堂設計簡單有特色,純白色為主調,潔白莊嚴,四面走廊設計,布局對稱,基座由毛石、硺石牆、裝飾扶欄、尖拱柱組遊廊構成。
地址﹕薄扶林
延伸閱讀﹕超靚新哥德式教堂 似去咗外國
(2)天主教玫瑰堂
天主教玫瑰堂座落尖沙嘴,正對香港歷史博物館,係一間最啱少女打卡嘅粉紅教堂,屬天主教堂,由天主教香港教區管理,亦係香港一級歷史建築。以典型哥德式建築設計,加上羅馬公共會堂為藍本,以藍天白雲映襯時特別有童話感覺。
地址﹕尖沙嘴
延伸閱讀﹕尖沙嘴神秘粉紅教堂 最啱少女打卡
(3)基督君王小堂
而聖保祿修院基督君王小堂就位處銅鑼灣,靠近聖保祿醫院同聖保祿學校,屬天主教教會一座教堂,設計特別有古典味,神秘又宏偉,相當亮麗,係一級歷史建築。教堂以羅馬式風格設計,圓形頂蓋加上格林多柱,柱頂雕花,柱身直立,滿滿古典色彩,祭台嘅最後的晚餐浮雕亦係由法國藝術家設計。
地址﹕銅鑼灣
(4)聖約翰座堂
靠近中環山頂纜車嘅聖約翰教堂,設計罕見,係香港聖公會香港島教區的主教座堂,以哥德復興式建築為主,屬香港法定古蹟之一,教堂將十三世紀早期英格蘭式同華麗哥德式建築融合,係香港最古老嘅西式教會建築物。從教堂觀察,旁邊全為高聳入雲嘅摩天大廈,淺黃色為主調,四個尖頂呼應圓窗同長拱形窗,教堂頓時有脫俗感覺。
地址﹕中環
延伸閱讀﹕激罕哥德復興式建築 中環聖約翰教堂打卡
(5)愉景灣白教堂
愉景灣白教堂鄰近海邊,遠離煩囂,超有渡假感覺,純白色三角形設計極吸睛,透過落地玻璃飽覽海天一色,相信係最多人熟悉嘅教堂。
地址﹕大嶼山愉景灣
延伸閱讀﹕情侶打卡地! 愉景灣海濱白色教堂超夢幻
E.A.Tips﹕
(1)教堂係神聖地方,記得打卡還打卡,要保持安靜,勿喧嘩叫囂。
(2)部份教堂內部係唔可以隨意影相,最好都係留喺戶外影啦。
在〈全港5大超靚教堂 穿越歐洲唔使搭飛機〉中有 6 則留言
留言功能已關閉。