茶咖宅 Congteakafe

上環特色咖啡店x茶記 中西合璧應該快食定慢食?



[sp_html5video category=”2057″]

香港咖啡店愈開愈多,要喺芸芸Cafe當中突圍而出並非易事,中西區向來多文青Cafe,今次推介一間位處上環四方街嘅Cafe,港式茶餐廳偏快食兼重食,西式咖啡店就係慢食兼輕食,將港式同西式結合,中西合璧令平平無奇嘅Cafe有特色。

從Google地圖所見,咖啡店以「茶咖宅」命名,步上樓梯後,只見易拉架,未見有叫「茶咖宅」嘅店舖,原來實際上咖啡店以「Congteakafe」命名,位置就係豪景臺樓梯旁邊,最啱文青拍拖情侶兩個人去試吓。

室內裝潢似足一般咖啡店,偌大窗戶透光度高,令一室光猛明亮,不過開放式廚房就有港式風格,採用以前街市照雞蛋嘅燈,配合食物中西合璧風格。香濃嘅咖啡有西式咖啡店style,香滑嘅奶茶就港式味道,絕對迎合鍾意嚐鮮嘅香港人。

其中一款All Day Breakfast係班尼迪蛋配英式鬆餅,係西式咖啡店必備產物,將Egg Benedict切開,流心蛋汁流落英式鬆餅中,誘惑非常。不過略嫌鬆餅偏軟,未夠乾身。茄汁豆、腸仔、沙律菜係正常質素,反而煙肉值得一讚!煙肉有別於平時嘅全塊乾到硬嘅煙肉,而係肉質大部份都係軟腍,而且黏口,只係邊位有煎過,所以邊緣位輕脆,而煙肉仍然係軟嫩,呢個位夠細心同專業。

以雞公碗盛載嘅上環叉燒炒蛋飯,驟眼看超有中式感,碗內嘅叉燒炒蛋飯極有港式味道。配搭奶茶比較似港式茶餐廳風味,但配上咖啡就超有中西合璧風格。飯量充足,餸量都唔少,絕對夠食飽肚,蜜汁可接受,但叉燒比較瘦,肉質唔可以同燒味專賣店相比,炒蛋反而值得留意,黃到金嘅炒蛋十分滑溜,入口似用鮮奶去炒,嫩滑雞蛋加上些微豉油更有港式味道。

班尼迪蛋配英式鬆餅呢種西式早餐向來都係慢食為主,坐喺咖啡店慢慢歎完早餐先開始工作或返學。相反,叉燒炒蛋飯一般係快食為主,趕緊食完即繼續工作,而且通常一羹炒蛋、一舊叉燒、一口飯同時送進口中,混合一齊先可以食到叉燒炒蛋飯嘅真諦。如果兩個人去食,一個食西式,一個食中式,速度肯定唔同,中西合璧有種分唔清係茶餐廳定咖啡店嘅感覺。

e.a.tips
無論中式定西式,強烈建議趁熱食,灘凍咗會無咗質感,特別係港式叉燒炒蛋飯。

交通﹕上環向荷里活道方向行,樓梯上去就會見到。

延伸閱讀﹕大阪過江龍人氣拉麵店抵港 全港獨有鯛魚湯

延伸閱讀﹕本地插畫師開設 上環療癒度高茶食亭主打果茶輕食

延伸閱讀﹕無雞湯欠完美 上環$45泰式水門雞飯啱晒打工仔

延伸閱讀﹕大圍純白咖啡店恬靜悠然 主打清涼烏龍麵

茶咖宅 Congteakafe

地址﹕ 上環四方街24號地舖
營業時間﹕ 星期二至日 09:00 – 18:00(星期一休息)
電話﹕ 5719 8131

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!