上環水門雞飯

無雞湯欠完美 上環$45泰式水門雞飯啱晒打工仔



疫情未完全緩和,仍然未可以去旅行,唯有搵啲國外菜式止止旅行癮啦!上環呢間泰式雞飯專門店,就以泰國曼谷嘅水門雞飯為主打,以平食方式提供俾香港打工仔。餐廳室內空間偏細,目前主要做外賣,無堂食供應,一盒雞飯價錢最平$45,轉雞髀肉就$55,價錢都係一般中上環打工仔可以接受嘅價錢。

基本上,一盒泰式去骨海南雞飯 $45 嘅飯量都足夠女仔食用,拍拖去食嘅話,男人可能要加飯或小食,飯為白飯,而非油飯。所有雞肉已經去骨,$45嘅雞肉以雞胸為主,排得散開,份量唔算多,白肉本身比較健康,只係略有少少嚡口。配菜有紅椒、青瓜,隱藏喺盒嘅側面,有爽脆感,份量適宜。

至於泰式去骨海南雞髀飯 $55 就係雞髀肉,同樣已經去骨,切得幾大件,略為散開,份量唔算多,雞肉相對明顯嫩滑,部份有雞油香,比較惹味。兩盒雞飯,雞肉略少,有啲唔似兩個人份量。

而泰式醬汁則據稱為自家製作,入口酸甜味帶有重辛辣味,幾開胃,不過辣味甚重,實在太搶味。

以泰式雞飯嚟講,無配上雞湯絕對係一大缺口,一般係一啖雞飯、一啖雞湯,唔講味道,齋睇配搭,無雞湯而只有雞飯就只感覺到欠缺完美。

水門泰式海南雞飯專門店

地址﹕上環永樂街87號泰達大廈地下
營業時間﹕11:30 – 20:00、星期六 12:00 – 18:00、星期日全日休息
電話﹕9380 0919

延伸閱讀﹕上環特色咖啡店x茶記 中西合璧應該快食定慢食?

延伸閱讀﹕大阪過江龍人氣拉麵店抵港 全港獨有鯛魚湯

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈無雞湯欠完美 上環$45泰式水門雞飯啱晒打工仔〉中有 1 則留言

留言功能已關閉。