麵尊

銅鑼灣激罕乾淨車仔麵 食材環境極衛生唔嗱喳



銅鑼灣美食多多,車仔麵都有幾間,呢間良心店嘅車仔麵人流唔少,抗疫措施做足,而且呢款車仔麵絕對顛覆傳統,好少車仔麵可以用乾淨嚟形容。

車仔麵本身又叫嗱喳麵,嗱喳有污糟嘅意思,以前係因為食材同販賣地點有衛生問題,所以先叫嗱喳麵。今時今日,嗱喳麵可以定點售賣,唔再需要推木頭車,而且合法經營,衛生環境更好。

據了解,呢間車仔麵店上環同銅鑼灣都有分店,經常出現排隊人龍,最近限聚令期間座位更減少,建議避開食飯時間去,以免等得太耐。

麵尊開正銅鑼灣美食集中地之一嘅登龍街,主打平價嘅車仔麵,有別於隔離嘅日式料理,轉角盡頭仲有間屹立多年嘅車仔麵店,喺呢個百家爭鳴位置開店必定要夠實力。

疫症期間,除咗有枱寫上「政府唔比坐」暗串政府唔封關但出限聚令,用膠片分隔食客,基本抗疫措施亦做足,包括入門口量度體溫,枱面有消毒用品提供,而餐具亦採用獨立包裝嘅餐具,相當衛生。

車仔麵湯底夠晒濃,入口有啖啖滷水味,不過若齋飲湯就會覺得鹹,需要配搭麵條同食材,配搭餸菜就好惹味。由湯底到食材都非常乾淨,同舊式嗱喳麵好大分別,麵條軟硬適中,配湯底幾惹味,食完都唔會好口渴,估計湯底應該係落咗滷水汁,但就無味精。

豬紅同蘿蔔係車仔麵必點車仔餸,豬紅唔會一夾就散,味道好香濃,本身似醃過咁,放落湯度仲好入味,蘿蔔好軟嫩,好索湯,大部份都清甜,有一舊仔有少少苦澀味。咖哩牛柏葉不過不失,入口有嚼頭,放落湯底咖哩味減少,不過都好吸收到湯汁,而五香牛腩就較遜色,入口唔似牛腩肉質,入口有啲奇怪,似罐頭牛肉。

用最乾淨嚟形容呢間車仔麵絕對無錯,食車仔麵就係要睇豬大腸呢款車仔餸係點嘅樣,豬大腸切開一粒粒都好乾淨,完全無污糟嘢,亦無咩臭味,相當神奇!

至於最值得試嘅車仔餸係酸齋,比蘿蔔同菜仲要索湯,擺喺湯底充份吸收自己所揀嘅湯底,腩汁固然惹味,辣汁更香口!

延伸閱讀﹕銅鑼灣羅馬式教堂勁有古典味 屬一級歷史建築

延伸閱讀﹕人氣餐廳Little Vegas神還原賭場 走入迷你拉斯維加斯

e.a.tips
建議先喺門口點定點單紙,寫定食咩,入門口時可以直接俾店員落單,縮減等候上枱嘅時間。

麵尊

地址﹕ 銅鑼灣登龍街18號V Point地下5號舖
營業時間﹕ 11:00 – 22:30(截單時間: 22:30)
電話﹕ 2326 3062

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!