銅鑼灣正宗印尼菜 必食白鱔沙嗲串燒



小編諗返有咩菜式係未試過,發現印尼菜係其中之一,兩個人咁啱喺銅鑼灣就發現呢間地道印尼菜。甫入門口店員同我哋講英文,又幾好feel。

餐牌有好多嘢食,三心兩意樣樣都想試 但怕食唔晒,所以只叫咗3款嘢食,另加嘢飲,上枱發覺全枱都係綠色嘢,感覺勁Fresh。拍拖諗唔到食乜?不妨試吓唔同種類嘅美食啦。

班蘭箭葉果蜜
班蘭香再加入蜜糖,味道偏香甜。溫提一下,嗰支箭葉記得唔好當飲管用!入面仲有青檸,入口幾清爽,最適合食完地道印尼菜再飲返杯,甜甜哋幾舒服。

柑桔青瓜冰
另一杯清涼飲品,柑桔略帶少甜味,青瓜好清爽,而且入口會同時有清脆感,感覺亦好Fresh。

印尼四大天王
有飯有魚有雞有牛有菜,咩都齊 ,適合諗唔到食咩嘅人食。雞肉滑溜,沙甸魚偏辣,牛肉香口,菜亦清甜,配班蘭飯真心高質,班蘭飯本身綠色已feel到fresh,入口好清甜,食落有少少好似椰汁味咁。

雜菜燒半雞飯
好惹味囓燒雞飯,燒雞皮薄餡靚,怕食唔晒所以只叫咗半隻,表皮燒得香脆金黃,有焦黃感,雞肉燒完都尚算嫩滑,蘸汁會更惹味,不過醬汁係偏辣。

串燒﹕牛肉沙嗲+白鱔沙嗲
牛肉沙嗲串燒其實已經好味,不過叫埋白鱔沙嗲串燒,就稍遜色。只係白鱔串燒太惹味,並唔係其他串燒差,用白鱔燒沙嗲串燒比較罕見,小編不嬲勁鍾意食魚,所以超愛呢味,白鱔表面燒得金黃色,表皮只係少少輕脆,魚肉滑溜,燒得好香口,加上沙嗲味更惹味。

班蘭葉印尼美食
地址﹕銅鑼灣糖街1-5號銅鑼灣商業大廈地下B2舖
電話﹕3188 5478

延伸閱讀﹕閨蜜談心好去處 銅鑼灣樓上cafe必食apple crumble連雪糕球

延伸閱讀﹕銅鑼灣激罕乾淨車仔麵 食材環境極衛生唔嗱喳

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!