銅鑼灣希雲街上月有一間蕃茄濃湯店全新開張，旋即成為排隊店，即使疫情期間限聚令僅限兩個人用餐，但小店都受到歡迎，不過作為蕃茄濃湯迷嘅小編就覺得湯底有一點係美中不足。
蕃茄富含大量茄紅素等抗氧化物，蕃茄湯底紅噹噹色澤，顏色吸睛之餘亦相當有益。呢間新開張嘅蕃茄濃湯店就以蕃茄湯麵為主打，配合豬、牛或雞等材料，除咗普遍熱食蕃茄湯麵，仲有日式冷麵版，拍拖去食唔錯，打卡度極高！
秘製金黃蕃茄清湯冷麵 $88 以日式冷麵為藍本，擺盤賣相一流，最啱相機食先。除咗蕃茄冷湯，有大量慢煮雞胸絲，仲有昆布、胡麻、柚子胡椒、紫蘇、梅子金茄，而麵底亦可選蕎麥麵、和風白麵或葛絲。只需將梅子金茄以外嘅材料同蕃茄冷湯撈勻，份量可隨個人喜好調製，再搭上麵底、雞胸絲，以日式沾麵方式食用。梅子金茄雖然的骰，但好開胃，蕎麥麵偏幼身，有咬口亦容易掛湯，沾湯酸甜味十足，略有黏稠感，蕃茄味唔太濃，但入口非常清爽，原味雞胸絲肉質唔嚡口，算係健康無負擔，配搭蕃茄冷湯相當透心涼，適合翳焗嘅夏天享用。
至於主打嘅自家鮮茄濃湯底，湯底附有乾蔥、炸蒜、蔥，既可配上海麵、刀削麵、米粉、和風白麵、葛絲或烏冬，亦有多款材料可配搭，包括秘製豬扒 $62。湯底蕃茄味的確係幾濃郁，酸甜味重，但蕃茄酸味唔會過多，入口開胃醒神，湯底濃稠感亦重，基本容易掛湯，食得出以打磨方式將蕃茄打成蓉，再加入茄膏嘅質感，所以湯底充滿蕃茄蓉，偏杰身，好鮮甜。蕃茄湯既有蕃茄香，同時亦帶有幾分香料味，不過正正係呢幾分香料味，令蕃茄湯底大打折扣，湯底有種香草味，蓋過蕃茄原本濃郁味道，不過到底係配料豬扒嘅醃製調味料溶於湯底中，定湯底本身有香草味就不得而知。刀削麵偏粗身，份量偏多，麵質煙韌，質感爽滑彈牙，但排湯力一般，而豬扒份量亦正常，有香茅味，烤得惹味，皮香肉嫩，啖啖肉鬆軟唔嚡口。
| e.a.tips （1）用App點餐，遇上排隊等候入座可以先喺門口掃瞄QR code，點餐後到入座再掃瞄座位上嘅QR code，用餐後去櫃枱埋單就得。 （2）餐廳座位唔算多，不時出現排隊人流。雖然黃店比較安全，但疫情期間記得自律，排隊時最好同前後隔開1.5米安全距離。 （3）堂食有後生靚仔店員為你貼心介紹冷麵食法，記得留意吓啦。 （4）有可能要等30分鐘先可以入座，最好帶定遮、風扇仔。 （5）小店只收Cash，唔收Credit Card。 （6）有4款花茶任揀，玫瑰觀音烏龍顏色浸泡後略深色，食完麵比較適合飲啖有茶香味嘅花茶解渴 |
蕃茄仔
| 地址﹕ | 銅鑼灣希雲街5號地舖 |
| 營業時間﹕ | 12:00 – 17:00、18:00 – 21:30 |
| 電話﹕ | 6323 3458 |
在〈銅鑼灣全新蕃茄濃湯麵 秘製日式冷麵清新消暑〉中有 4 則留言
留言功能已關閉。