[sp_html5video category=”2195″]
銅鑼灣百樂中心有一間超有特色嘅人氣打卡樓上Cafe，以拉斯維加斯為主題，設計神還原賭場，由裝潢到餐牌，以至食物都加入賭場元素，絕對玩味十足！由2014年屹立至今，餐廳主打美國菜同西菜，受歡迎程度一度排長龍，近一年似乎黃到金，未行入餐廳已經聞到自由嘅空氣。
甫踏出電梯，即會見到極震撼嘅連儂牆，由走廊到牆壁，以至向天花板一直延伸，Memo紙密密麻麻得幾乎搵唔到餐廳正門口，充斥住香港人嘅心聲，場面壯觀。餐廳同時喺門口提供紙筆，俾途人自由寫低願望，五顏六色嘅Memo紙堆砌而成嘅香港人連儂牆，絕對為踏入餐廳作準備。
疫症期間，餐廳做足抗疫措施，包括為客人量度體溫、提供消毒用品等。暫時去唔到去旅行，唯有留喺香港去住主題餐廳先啦！餐廳室內色彩繽紛，裝潢極搶眼，牆上有一幅又一幅插畫同塗鴉，似乎係美式漫畫風格，餐枱都以賭具為題設計，而櫈亦使用唔同色彩，有美式casual感覺，每個角落都包含拉斯維加斯賭場元素，加入唔少小道具裝飾，極有玩味。
餐廳命名為「Little Vegas」，直譯就有小拉斯維加斯嘅意思。據了解，拉斯維加斯由西班牙人提出命名，有肥沃山谷嘅意思，背景係內華達州喺美國經濟大蕭條時以博彩業振興經濟，渡過經濟難關，最終變成一個世界賭城。餐廳不時播放舊時嘅音樂，氣氛滿滿，而盛載食物嘅餐具都唔馬虎，刻有餐廳名字，而且設計別致，相機食先都唔失禮。餐牌設計似乎會不定期轉變，slogan句句有意思，頂頭寫明「齊上齊落」，下面又有「Eat with Dignity, stand with Hong Kong, We have the freedom to choose what we eat」，內頁充滿繽紛插圖，似足入咗二次元世界。各款食物名亦超有創意有啲甚至會使用歌名設計。
眾所周知，拉斯維加斯係世界賭客集中地，亦有好多餐廳，美食應有盡有，令賭客賭完再食、食完又賭，而Little Vegas亦似乎以此為藍本，美食選擇眾多，份量十足，可以同朋友開心Share，而且款款相當抵食。現實啲睇，每款食物價錢都好公道，只係普通咖啡店嘅價錢，餐牌雖然會轉變，但唔會因為人流多而推高價錢賺錢，呢方面尚算係一間良心小店。
富士山下系列飲料係餐廳人氣之選，以Rainbow Seven（$52/1、$88/2）為名，分別有七種彩虹色飲料任揀，杯子設計經過挑選，加入飲品就似足富士山，極吸睛！每種顏色都以陳奕迅嘅歌名命名，創意十足，雖然Eason嘅立場係有爭議，不過佢嘅歌的確深入民心。今次我哋特別挑選幾乎無人提過嘅淺綠色飲料，以綠月飛霜為題，味道則以Apple青蘋果為主，顏色搶眼。綠月飛霜杯頂有一球雪白雲呢嗱雪糕，懸浮喺梳打水上，杯底係青蘋果口味梳打水，當雪糕逐漸溶化時，會有部份從杯邊緣溢出，十足十落雪情境，如果挑選藍色，的確會似足富士山，賣相一流。梳打水配雪糕，中間有少量忌廉，入口刺激，雪糕唔算太甜，梳打水好解渴，青蘋果味比較清新，飲到最尾雪糕溶於青蘋果梳打水內，入口略帶creamy，有啲似青蘋果味奶昔。
另一杯特別嘅飲料係秘密花園水果茶 $68，茶中相當足料，有士多啤梨、藍莓、火龍果、檸檬、青檸、奇異果，水果新鮮，採用嘅水果都係偏酸甜，果香味十足，有啖啖花香味，入口清新，味道唔會太甜之餘，都有茶香味。呢杯並非一般Cafe嘅水果茶，而係一杯兩個人都未必飲得晒嘅巨型水果茶，唔單止啱打卡用，仲適合拍拖情侶一齊飲一杯呢！
美食推介有濃味野海鮮喇沙天使麵 $110，擺盤好有心思，用火箭菜點綴增加色澤，入口的確味道濃郁，有啖啖椰香味，喇沙味好突出，味道唔辣亦唔會太甜，醬汁好有黏稠感，令麵條、海鮮同配料都掛汁，海鮮份量唔算太多，蝦同魷魚幾爽口彈牙，蟹柳同豆卜最掛汁，吸收晒醬汁精華，天使麵亦同樣掛汁，質感順滑，醬汁調味值得一讚，似足食正宗喇沙一樣。
另一款係命運賭城小食拼盤（$92small、$126large），似乎的確似足賭場輪盤一樣，食到邊款小食就要睇自己嘅運氣，炸薯波、炸薯角、炸薯條、炸薯餅、炸魚手指、炸魷魚圈、炸洋蔥圈、焗波特菇、原味雞翼等全部Random提供。我哋運氣得到嘅係炸薯角、炸魚手指、炸洋蔥圈、原味雞翼，上枱至影完相、拍完片仲熱辣辣，雞翼好入味，脆皮好似好乾，但內裏仍然juicy，而炸魚手指就欠缺沙律醬，其他普遍炸粉唔厚，表皮香脆，唔係太油膩，但好香口，份量都唔少，比坊間嘅小食拼盤抵食。
| e.a.tips （1）想避開排隊，建議避開正常食飯時間去，夜晚18:00前或20:30後會多啲位，但留意餐廳收10:00至10:30。 （2）人流多嘅時候，用餐時間會限時90mins，每人至少消費一杯飲品。 （3）留意餐牌有優惠，落order時講啲嘢，每樣小食可以減$5。 （4）最好事前預先Book位，避免乾等。 （5）富士山下系列飲料最好早啲飲，雪糕溶化後味道會有變化。 （6）人均大概HKD150至HKD200左右，兩個人約HKD300至HKD350埋單。 |
交通﹕位置喺時代廣場背後，由時代廣場步行僅3至5分鐘腳程。
Little Vegas
地址﹕銅鑼灣耀華街3號百樂中心25樓
營業時間﹕星期一 18:00 – 22:30；星期二至四 12:00 – 15:30、18:00 – 22:00；星期五至日 12:00 – 15:30、18:00 – 22:30
電話﹕2622 2369
延伸閱讀 ﹕銅鑼灣吉列牛超軟嫩 忌廉烏冬勁Creamy
在〈人氣餐廳Little Vegas神還原賭場 走入迷你拉斯維加斯〉中有 5 則留言
留言功能已關閉。