Three on Canton
Afternoon Tea,  兩個人醫吓肚,  酒店餐廳

茶迷必食! 尖沙嘴歎皇室御用Twinings茗茶High Tea



    春天來臨,早前又心思思想同閨蜜歎返個High Tea,今次試試以茶品為主題嘅下午茶。港威酒店Three on Canton以茶入饌,與Twinings聯乘推出川寧浪漫英倫下午茶,以格雷伯爵同仕女伯爵戀愛為靈感,等大家可以一嚐茶葉甜點,似足品味拍拖酸甜歷程,充滿甜味之餘亦帶有Fresh嘅感覺。Miss A向來好茶,茶味有苦有甘有甜,甘香味最令人喜愛,尤以啖啖回甘味更吸引。

    近來忙住抗疫,無得去旅行,唯有同閨蜜兩個人歎住英國皇室御用Twinings茗茶主題嘅High Tea先,當飛咗去英倫啦,行入酒店餐廳要量足兩次體溫,安全啲好。今次呢款以Twinings茗茶炮製嘅下午茶,絕對係茶迷必食!

    飲品有特別以Twinings炮製嘅2款Cocktails同2款Mocktails,The Mist同Lady in Red都係Cocktail,而Bella同Natural就係Mocktail,由於小編想飲Strawberry口味,所以詢問一下店員可否點Lady in Red而唔落酒精,最後只係唔落Vodka,無咗上面啲泡沫感,下面同樣有青檸加蔓越莓汁、士多啤梨醬同純煎茶嘅綠茶,混合起嚟士多啤梨嘅甜味最重,茶味稍輕,不過帶有些微甘香味同酸味。而閨蜜只點選咗一壺Twinings嘅金毫英式早餐原片紅茶,茶味香醇,其實可以揀嘅Twinings茶有6款,仲俾埋個計時沙漏,方便飲用最好沖泡時間嘅茶,似足皇室飲御用Twinings茶一樣。

    今次呢款下午茶好特別,除咗有4款鹹點同7款甜品外,仲有一坨棉花糖,而頂頭嘅棉花糖竟然會轉色!其實只係入面擺放咗一支會發光嘅棒,薄紗般嘅棉花糖就會透出些微粉紅光茫。店員特別提醒棉花糖要先食,否則好快就會溶化,於是小編要用超快速度影完相,棉花糖剛好未完全溶化。棉花糖通常拍拖食最Sweet,原來呢坨棉花糖都幾大舊,兩個人食咗幾分鐘都未食完,小編靈機一觸,將棉花糖放於Lady in Red杯子上,感覺變成另一杯特飲,不時見到將棉花糖放在飲品上就變成一杯賣得較貴嘅特飲,而家呢杯應該可以叫Lady in Red特飲掛?

    食完棉花糖,可以慢食下面幾款同樣以茶入饌嘅鹹點同甜品啦!上面一層係4款鹹點,而下面一層就係7款甜品連英式鬆餅。

    鹹點最特別係温泉鵪鶉蛋配巴馬火腿,頂頭有少許爆珠感,下面係竹炭麵包,中間係充滿鹹香嘅巴馬火腿,火腿上面係流心鵪鶉蛋,蛋汁濃郁,一啖有入口充滿層次感。

    另一款為香煎帶子配熱情果莎莎醬,亦有果味爆珠感,帶子有鮮甜味,微微煎過略帶油香。而鴨胸鵝肝慕絲綠茶千層餅則層層相間,同時以脆餅同濃香鴨胸同鵝肝軟心作餡,極邪惡!最後一款鹹點有甘菊花醃三文魚,魚脂味豐嘅三文魚伴以甘菊花清香味,甘菊花中和咗三文魚嘅魚油味。

    至於甜品陣容就更豐富,當中伯爵紅茶杏桃朱古力慕絲蛋糕同仕女伯爵紅茶檸檬蛋白蛋糕都係重點推介。前者以伯爵紅茶、75度黑朱古力同可可葉炮製,小編雖然唔食朱古力,但閨蜜話入口滿滿香濃伯爵紅茶味,慕絲蛋糕質感幼滑,朱古力味雖然濃郁,但就唔算太甜膩。而後者以伯爵紅茶製作蛋白蛋糕,表面舖有檸檬,底層係伯爵紅茶蛋糕,質感鬆軟,有軟綿綿泡沫感,入口勁fresh,蛋糕上再加插蝴蝶造型裝飾,粉飾整件蛋糕,睇落更Girly!

    而High Tea必備嘅傳統英式鬆餅亦包含在內,正常地配上奶油忌廉同士多啤梨果醬,兩者都一小樽上枱,即使唔落cream同jam,鬆餅亦已有內餡,入餡有蘋果味,餡料有軟綿感。

    甜品仲有舖有一塊塊芒果肉嘅熱情果芒果白朱古力法式泡芙,舖有粉紅銀萡嘅玫瑰果洛神花蛋糕配馬卡龍,酸甜味充足嘅白桃紅莓吉士忌廉蛋糕。最後,小編比較喜歡嘅係啖啖清香味嘅茉莉茶蘋果啫喱凍,上面微甜,最底層係酸甜嘅柚子蓉,建議要一羹勺到底,要同時食奶凍同柚子蓉。

    川寧浪漫英倫下午茶 / Twinings grey love in London afternoon tea

    供應日期﹕2020年2月6日至4月30日,每位都可獲贈Twining茶包,4款會Random送出
    供應時間﹕15:00-17:00
    價錢﹕$388/1位用、$528/2位

    E.A.Tips﹕Openrice預訂可享75折優惠,但Miss A用海港城Coupon,每張可減$50,每$100可減足$50,最終使用5張Coupon,價錢幾乎變成半價優惠,每人只需約$165。

    Three on Canton

    地址﹕尖沙嘴廣東道13號海港城港威酒店3樓
    營業時間﹕06:30 – 00:00
    電話﹕21137828

    延伸閱讀﹕旺角歎High Tea遊走東京 每位送招財貓公仔

    Δ 版權為E.A.Two 兩個人醫吓肚所有,歡迎轉貼連結,勿全篇文章轉載

    Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


    鄰近車公廟!沙田大圍廢校轉化綠色空間 環保博物館將藝術融入生活
    全港3間分店!復古裝潢還原屋邨走廊賣懷舊點心 老馮茶居不如用一款點心單飛?
    藜麥紅白米飯配滋補燉湯 大角嘴$48健康港式便當
    荃灣清靜秘密花園 大會堂劇院咖啡店歎下午茶
    大角嘴街坊刺身壽司專門店 丼飯全日供應最平$40
    元朗錦田路邊大排檔毗連公園街市 超高水準街坊醉雞麵/海南雞飯回頭率高
    荃灣人氣新式大排檔旗艦店 與時並進改良舊餸菜吸斯文客人?
    石崗軍營賞楓!雷公田起步遊200年歷史甲龍古道 直搗川龍家樂徑眺青馬/昂船洲大橋【秋季紅葉2021】
    大角嘴高水準台式手工芋圓店月底將結業 滿$100送2件芒果糯米糍
    【年糕巡禮2022】新年最黃賀年糕點完整名單!近50間港九新界實體店連網店年糕蘿蔔糕即刻預訂!
    野餐隨行【大嶼山及離島篇】有View有草地!全港100個近鬧市近食肆安心野餐點 梗有一個喺左近!
    野餐隨行【港島篇】有View有草地!全港100個近鬧市近食肆安心野餐點 梗有一個喺左近!
    野餐隨行【新界篇】有View有草地!全港100個近鬧市近食肆安心野餐點 梗有一個喺左近!
    野餐隨行【九龍篇】有View有草地!全港100個近鬧市近食肆安心野餐點 梗有一個喺左近!
    荔枝角程班長台灣美食宣佈即將結業 台灣味牛肉麵營業至3月!
    露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘