Alibi – Wine Dine Be Social 旺角
Afternoon Tea,  兩個人醫吓肚

旺角歎High Tea遊走東京 每位送招財貓公仔



    武漢肺炎肆虐,3月無得去日韓台賞櫻,唯有將啲錢留喺香港食好啲啦。今次就歎個東京櫻花主題下午茶,香港康得思酒店Alibi – Wine Dine Be Social與國際兒童社會企業PAPINEE聯乘推出推奇幻旅程下午茶東京賞櫻篇,有5款鹹點同5款甜品,當中仲有清酒鮑魚同2杯櫻花綻放雞尾酒,不過小編同閨蜜兩個人都唔飲酒,所以只飲茶類飲品。

    呢個主題已經去到第4篇章,由墨西哥到倫敦,以至紐約,而家去到東京,未有得去旅行住,唯有食住旅行主題High Tea當環遊世界先啦。

    5款惹味鹹點甚吸睛,當中有清酒鮑魚伴海膽沙巴翁,Sabayon有時會灑在甜品上,今次配鹹點同樣得宜,清酒鮑魚入口鮮甜,口感煙韌,當冷盤寧舍清新,加上海膽同Sabayon醬汁伴勻,製成濃稠綿密醬汁,有啖啖酒香同鮮甜香味。

    而三文魚伴紫蘇及柚子醬亦好開胃,三文魚上有些微酸酸甜甜嘅柚子醬,入口清新。烤果仁香菇鹹批驟眼看以為係迷你葡撻,估唔到原來係一個鹹點嚟,撻內釀有果仁同菇菌類,層次豐富。至於味噌黑鱈魚伴牛油果蓉放置喺匙羹內,牛油果蓉墊底,上面係味噌黑鱈魚,入口唔似魚類,似帶子口感,黑鱈魚味道偏濃,配搭牛油果蓉令整體入口無膩感,帶有些微清新感。而燒汁手撕OBE草飼草牛肋骨法包就係法包中間釀入肉碎,將加入燒汁嘅牛肋骨肉碎伴勻,然後作法包餡料,牛肋骨肉碎同法包一濃一淡配搭得宜。

    食完鹹點就到5款Sweet Sweet甜品,甜品最啱同情人拍拖去食。歎High Tea必備嘅當然係傳統英式焗鬆餅,今次伴有奶油忌廉同焙茶蘋果醬,特別推介蘋果醬,搽上鬆餅上可減低鬆餅嘅膩感,蘋果清新味道中和鬆餅焗出嚟嘅香濃牛油味。

    其他4款甜品當中包含櫻花主題嘅士多啤梨卷蛋,即係一件士多啤梨蛋糕,中央餡料有一個心形設計,最啱各位少女打卡之用,似乎只有呢款甜品同櫻花主題有直接關係。而黑芝麻意式奶凍以小杯盛載,上面舖有芝麻脆餅同一個朱古力香唇,下面就係黑芝麻意式奶凍,黑芝麻液體同奶凍混合後,奶凍入口有啖啖芝麻香,入口甜而不膩。仲有一款沖繩紫薯撻,撻內釀入紫薯蓉,入口綿密又滑溜,亦有紫薯本身嘅香甜味,上面仲有心形朱古力作點綴。至於綠茶紅豆歌劇院蛋糕上面亦有Love字樣,以綠茶炮製嘅蛋糕,啖啖日本綠茶風味。

    奇幻旅程下午茶﹕東京賞櫻篇
    供應日期﹕2020年2月1日至3月31日
    供應時間﹕15:00 – 17:30
    價錢﹕$488/2人*(每日限售10份),可配2杯櫻花綻放雞尾酒
    *每位都有以招財貓為藍本嘅「PAPINEE小貓菲利思動物玩偶」乙隻(價值$258)

    E.A.Tips﹕Openrice預訂可享85折優惠,但必須用credit card付款,折後每人只需$228。
    兌換方法﹕向餐廳店員出示Online優惠券或列印本

    Alibi – Wine Dine Be Social

    地址﹕旺角上海街555號香港康得思酒店5樓
    營業時間﹕星期一至四 10:00 – 01:00;星期五至六 10:00 – 02:00;星期日 10:00 – 01:00
    電話﹕3552 3028

    延伸閱讀﹕茶迷必食! 尖沙嘴歎皇室御用Twinings茗茶High Tea

    Δ 版權為E.A.Two 兩個人醫吓肚所有,歡迎轉貼連結,勿全篇文章轉載

    Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


    【野餐隨行】元朗國公園大草地歎超靚韓式吐司 款款內餡含400次滑蛋
    30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
    新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
    陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
    全港3間分店!油麻地樓上泰國菜用App買外賣享9折優惠 芒果糯米飯宛如當地水準
    【野餐隨行】北角潮州飯店高水準鹵水鵝片 尋海旁小型狗公園野餐
    蕃茄濃湯海量茄蓉! 長洲火車頭酸辣小窩餸菜自由配搭
    【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
    石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛
    葵涌點心燉湯專門店同區2間分店!10款足料燉湯+11款黏軟蒸飯任揀
    元朗燒味人龍店賣燒鵝燒鴨叉燒塞爆飯盒 一盒雙拼飯低至$30平過酒樓!
    隱藏中環橫街窄巷 OL至愛健康越式三文治
    禮頓山古典復興教堂登一級歷史建築 銅鑼灣鬧市秘道通往避風塘
    皇冠郵筒起步!柴灣屋邨後山藏舊式鐵滑梯 引水道側百年英式石橋點解叫猛鬼橋?
    九龍寨城舊區半日遊!市建局即將拆卸重建 窺探二戰後舊式建築物 賈炳達道休息站處處
    【野餐隨行】沙田瀝源超隱秘街市小店 蒸點心/雲吞麵加添自家製辣椒油火花十足