石硤尾公園廢棄水池藏韓國粉色少女打卡牆南昌街現星洲娘惹式格仔彩虹屋

[sig_post_pv label=””] 個人瀏覽過

石硤尾區內表面平平無奇，但其實區內一樣有適合拍拖情侶打卡嘅影相位，除咗南山邨遊樂場，兩個人可以走入公園內迆吓，找尋韓式粉調場景影吓相，若然唔想夏天攀山涉水兼汗如雨下，行吓公園都係好事。

延伸閱讀﹕【野餐隨行】石硤尾池畔叢林小餐廳歎日式超靚便當街角文具店兼賣醉雞麻醬蕎麥麵

延伸閱讀﹕【野餐隨行】石硤尾驚現時光倒流價飯餐！10分鐘攀登配水庫遊樂場野餐龍翔道清靜秘地觀九龍市景

被劃為深水埗區嘅石硤尾公園，橫越石硤尾至九龍塘，面積有近8公頃，地方偌大，設施甚多，足球場欖球場更連有看台，而看台亦以粉色為主調，用色搶眼。而網球場附近更有一個粉紅色為主調嘅廢棄水池，四野無人感覺似世外桃園。

水池有兩層，本來係噴泉或池塘，目前已經無再使用，頓成廢棄地方，但公園水池內欄杆、圍牆、樓梯扶手皆染成粉紅色，頓變相當IG-able嘅場景。而水池旁邊亦有大量粉藍、粉紅相間牆身，粉嫩奪目，韓風滿滿，充滿少女感，配合光影、草木更有效果。

由石硤尾公園走向深水埗方向，於南昌街會發現上年底剛入伙嘅南昌街組合屋，從外面觀望，每間相同大小嘅窗口下被髹上不規則嘅紅、黃、綠、灰色格仔相間，外牆搶眼，有如新加坡娘惹式彩虹屋。呢幢彩色格仔建築物似足包含彩繪窗戶嘅新加坡舊禧街警察局、新加坡坤城路住宅建築，甚至新加坡如切（joo chiat）嘅華人社區。

E.A.Tips :

(1) 乘搭巴士路線2B, 2E, 2F, 86, 86A, 86C, 87B, 886, 214 可於南昌街，然後進入石硤尾公園，但要向上而行；但乘搭巴士路線2B, 2F, 86C, E22 於歌和老街落車，進入石硤尾公園，可直接先走水池附近粉色打卡位。

(2) 石硤尾公園為休憩公園，謹記保持安靜，勿喧嘩騷擾他人。

(3) 垃圾要放入垃圾桶內。

(4) 從石硤尾公園歌和老街入口進入，會見到大量粉藍、粉紅相間牆身，前行就係廢棄水池，位置正對香港城市大學宿舍。

(5) 石硤尾公園離南昌街組合屋僅15分鐘腳程，建議先走石硤尾公園，向下行即達南昌街組合屋。

(6) 石硤尾公園內嚴禁吸煙，除咗吸煙區。