2021-03-02

西灣河$43臘味雞油飯 醉雞重酒香藥材香

沁沁麵


行到西灣河,一般人只會諗到太安樓掃街,而事實上區內重有好多小店值得兩個人拍拖試吓,呢間沁沁麵就係其中之一。

餐廳以廣東粵菜為主,港式味濃,店內裝潢簡約,乾淨企理,以開放式廚房設計,主打分別有沁沁麵、沁沁飯,包含人蔘雞湯麵、香港製造臘味飯。

第一款招牌係沁沁麵 $43,即係秘製人蔘雞湯麵,配菜有一堆肉絲半隻溏心蛋3舊西蘭花2大舊黑木耳,配上海拉麵,湯底雖略有人蔘雞湯味,望落呈淺啡色,尚算清澈,內含紅棗、杞子,味道唔太鹹,幾甘甜,少有油份,反而略嫌人蔘、雞味都唔太重。麵條偏軟,味道亦淡,無咩特別,但適合佐麵,反而配料有驚喜,除咗肉絲較嚡,黑木耳帶酸甜味,爽口夠開胃,尤其係半隻滷水味溏心蛋,半熟狀加蛋黃甜香,滷香十足,好入味。

而另一款招牌嘅就係沁沁飯 $43,即係秘製臘味雞油焗飯,配菜有臘腸潤腸臘鴨滑雞件,每樣2件,飯粒為泰國香米,臘味香味同雞酒均勻滲透飯粒內,糯米飯入口煙韌,飯粒乾爽分明,沾滿醬油,飯內亦有香料味道,雖有油香,但整體油份唔重。滑雞夠軟嫩,臘味雖鹹味甚重,但適合佐飯,臘腸、潤腸軟硬度適中,臘鴨質感唔太結實,可以咬下。

賣相一流嘅醉雞卷賣$25,大小不一有6件,雞肉已經去骨,啖啖肉,每件切片,切成圓形上碟,加入酒香味濃嘅雞汁,雞卷既有淡淡輕微酒香,似花雕酒,亦有少許藥材味,雞肉爽滑鮮甜。

加$5有自家製羅漢果茶,的確夠濃郁,味道甘甜,無砂糖味,溫熱潤喉,一來適合配搭油飯、湯麵,二來生津解渴,三來半價非常抵飲。


E.A.Tips﹕


(1)由太安樓步行過去,經筲箕灣道,腳程只係5分鐘內。

(2)埋單無加一,外賣可用落單紙點餐,不過其實直接去counter點餐就得。

(3)叫飲品記得可以嗌走飲管。


沁沁麫

西灣河西灣河街112號地下
星期一全日休息;星期二至日 11:30 – 22:00
2728 9438

Please Like & Follow & Subscribe /
歡迎讚好、追蹤、訂閱