2021-05-17

【黃店巡禮】西灣河掃街食乜好? 太安樓以外3間外賣店

【黃店巡禮】西灣河 掃街 3間外賣店


提到筲箕灣一帶,唔少人都會諗到東大街掃街,而提到隔離西灣河,更多人會諗到去太安樓掃街。除咗太安樓,其實西灣河重有咩外賣店抵食呢?事實上,西灣河的確重有唔少小店,今次就先提及3間平價又抵食嘅外賣店,方便拍拖情侶去外賣店掃街醫吓肚啦!

(1)黃金雞

小巷內嘅黃金雞,位置比較隱蔽,但牌匾至室內都以金黃色為主,相當搶眼。小店以泰式雞飯為主打,每盒雞飯最平$40,包例湯,以紙盒盛載,份量充足,價錢大眾化,係區內一間街坊店。雞飯配有兩款醬汁,既有純醬油,亦有辛辣醬,白飯轉為油飯更有驚喜。而秘製牛腩飯亦有水準,尤其牛腩稔身又入味,白飯底內有乾坤,醬汁黏滿白飯底,最啱撈飯。

延伸閱讀﹕西灣河小巷$40泰式黃金雞飯 大大盒油飯再送雞湯

(2)斗來香

呢間小食店同太安樓內差唔多,以港式小食為主,價錢平,$50買到好多小食,重有套餐可擇。街頭小食有燒賣、魚蛋、腸粉、牛肉球等,重有大大舊粢飯、懷舊白糖糕、黃糖糕同砵仔糕等,飲品有豆漿、黑芝麻豆漿、無糖豆漿、檸檬薏米水、涼茶等。

延伸閱讀﹕西灣河街坊店斗來香賣懷舊小食 掃街唔使去太安樓

(3)沁沁麵

至於沁沁麵就係3間當中堂食座位比較多嘅一間,Takeaway會分開麵底同湯頭,夠晒細心。菜式以廣東粵式為主,較重港式味道,招牌有沁沁麵、沁沁飯,即係人蔘雞湯麵、香港製造臘味飯。湯麵湯底濃郁,麵底偏淡,配料充足;而焗飯重臘味香味之餘,亦有雞味、酒味。小食當中必食之選有醉雞卷,油香濃厚,有藥材味,雞肉軟嫩鮮甜。

延伸閱讀﹕西灣河$43臘味雞油飯 醉雞重酒香藥材香

     

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱