西灣河有一間藏於小巷嘅小店，以黃金雞命名嘅小店，顧名思義係主打泰式雞飯，由年輕人主理，確實值得一試。一盒飯價錢只係$40，包例湯，座位唔多，大多都係外賣， 每盒飯盒都以紙盒盛載，份量恰當，兩個人拍拖去一人一盒，轉埋油飯都唔過$100！
延伸閱讀﹕西灣河$43臘味雞油飯 醉雞重酒香藥材香
目前招牌黃金雞飯賣$40，加$10轉油飯，送例湯，價錢大眾化，包含2款醬汁，一款純醬油，一款偏辛辣。將白飯改為油飯，比雞肉驚喜，飯量唔少，大概有一至兩碗飯，油飯呈金黃，似黃薑味，飯粒乾爽有咬口，而且香口。不過，以普通$40雞飯嚟講，無加$10轉雞髀肉，雞皮爽滑，雞肉係雞胸肉、雞翼，所以一定唔會用滑溜嚟形容雞肉，雞味唔濃，但雞翼幾入味，雞胸白肉總算唔嚡口，亦算厚肉，而且啖啖肉，無骨落地，除咗雞翼。
至於醬汁，純醬油一邊比較穩陣，雞肉蘸上醬油有鹹鮮味，而泰式辣醬就含薑、蒜蓉，雞肉蘸上就更香口，最好係2種醬汁一齊蘸，層次更豐富。而配菜打破一般用青瓜、蕃茄仔嘅雞飯準則，以大量紅蘿蔔絲、豆苗點綴，蘿蔔絲帶酸甜味，幾清爽，相對青瓜原來幾開胃。至於附送嘅例湯就係一杯雞湯，入口的確有雞湯味，只係有幾分油膩，但似雞骨熬煮出嚟嘅湯，略有鹹味。
另一招牌秘製牛腩飯 $40，同樣送例湯，白飯軟硬度適中，相對油飯，白飯帶微黏，並非完全乾爽狀態。牛腩份量適中，腩肉軟稔，夠厚身，半肥半瘦，感覺牛脂適可宜止，炆嘅時間足夠，醬汁入味，幾濃郁，似五香牛腩。本來以為要乾哽白飯，點知原來內藏乾坤，飯底有腩汁，底層白飯黏滿醬汁，再用嚟撈飯的確一流！
E.A.Tips﹕
（1）乘搭電車到西灣河海富街，轉入海利街，步行到小店僅1至2分鐘腳程。
（2）店內有少量寄賣嘅食品，如杏仁酥、蝴蝶酥、烏龍茶，新年將至，更有毋忘初心利是封。
（3）建議自備餐盒或講聲唔要餐具，減少使用飯盒、餐具。
（4）飯盒僅為紙盒設計，保溫力唔高，最好盡快食用。
（5）另有小食，如香茅雞翼、芝士薯波、雞軟骨等。
黃金雞
筲箕灣海利街6號海利大廈地舖 
星期一至二 12:00 – 15:00、18:00 – 22:00；星期三全日休息；星期四至日 12:00 – 15:00、18:00 – 22:00 
9765 6029
在〈西灣河小巷$40泰式黃金雞飯 大大盒油飯再送雞湯〉中有 2 則留言
留言功能已關閉。