2021-03-02

港島7黃店入選《米芝蓮指南2021》必比登推介 北角突襲封區內摘星餐廳 實試正宗新加坡肉骨茶

古月+米芝蓮2021港島7黃店


噚晚(28日),政府7點3發稿宣佈封鎖北角東發大廈,但7點正已有一大群警員於北角拉起封鎖線,由英皇道跑到錦屏街,圍封東發大廈A座至D座,封鎖線內嘅居民被禁足,並必須於29日凌晨2點前進行強制檢測。事有湊巧,東發大廈位處錦屏街後街,該小巷內9成皆為良心店,其中1間良心店於2日前更獲選為《米芝蓮指南2021》必比登推介餐廳,今次突襲封區到底係咪巧合?

日前,米芝蓮宣佈《香港澳門米芝蓮指南 2021》完整得獎名單,兩地內有277家餐廳、54間住宿地點、2間米芝蓮綠星餐廳,有10間係初之入選。今屆米芝蓮指南包含必比登推介名單,推舉澳門幣或港幣$400以下價位而物有所值嘅餐廳,價錢可享3款餐點,但不含飲品,有63間香港餐廳、7間澳門餐廳入選,有7間為新入選餐廳。當中,有7間本土良心店成功晉身摘星餐廳,獲得星級肯定。

過往米芝蓮推介之作,好多時候都令人出現黑人問號樣,不時聽見有人跟住搵食之後大嗌中伏,到底係咪真係伏味濃?今次既然俾7間良心店入選,就搵間試一試。7間良心店包括有北角古月、西環嚐囍煲仔小菜、中環Cornerstone、天后八寶清湯腩、中環吃什麼、西環阿元來了、西環波記,所有星級餐廳都集中於港島區域,有興趣可以兩個人拍拖試吓吖!(編按﹕碌到底話你知位置)

今次記者於突襲封區前幾日走入其中一間摘星餐廳,小店位於北角錦屏街小巷內,屬星馬菜餐廳,以古月命名,開業6年,室內牆身以3D手繪壁畫設計,活潑生動。而菜式則以星馬名菜肉骨茶、拉茶為主,另有招牌菜辣椒板麵,2016年起已獲得米芝蓮星級餐廳榮譽,至今已連續5年打入必比登推介。更值得食精神嘅係支持人人平等,據稱部份員工係聽障人士,包括弱聽或聾人。

古月名稱嘅意思大概係想表達以古月粉為主,即胡椒粉,大概係主打新加坡正宗肉骨茶,必揀嘅係古月招牌肉骨茶 $80,以古月茶配米粉或白飯。一碗肉骨茶唔算大碗,同白飯比例為1:1,內含3至4舊肉同大舊蒜頭,生蒜有微甜味,1大3小嘅肉一咬就離骨,肉質夠稔身,入口鬆化,有肉香,肥瘦適中,蘸上辣椒豉油會更鮮味。湯底重胡椒味,以生蒜、胡椒作湯,香料、藥材味唔明顯,湯底清澈,胡椒味重,佐飯會無咁辣,幾暖胃,做法為正統新加坡肉骨茶。

部份網民批評胡椒味太多,入口太辣,好嗆喉,小編反而認為只係本地人食唔慣,有少許飲食常識就會知道肉骨茶至少有分2個派別,新加坡大多流行潮州派,而馬來西亞就流行福建派。潮州派肉骨茶顏色偏淺,湯頭重胡椒味;而福建派則顏色較深,藥材味較重,同時加入豉油作調味。

蝦麵 $82,配米粉或摻摻,蝦麵有2隻去殼後變蝦米嘅馬來西亞海蝦,不過就已挑蝦腸,另有瘦叉燒、魚丸、肉丸、魚片、豆卜,除咗豆卜吸付湯汁,其他配料一般,麵條算乾爽彈牙,但偏軟身,同時似鹼水麵,湯底略有鮮甜味,特別在於一匙羹叄巴醬,辛香味令湯底畫龍點睛,只係湯底內蝦味唔夠重。

三色奶茶 $30 色調吸睛,顧名思義分三層,茶底加入煉奶、椰糖,上層有濃郁紅茶同冰粒,攪拌後味道細緻,茶膽香濃,奶茶入口柔滑,有香甜味,同砂糖味唔一樣,比港式奶茶或茶走甜,都係本地人未必飲得慣嘅馬拉奶茶。

事實上,錦屏街後街內嘅餐廳有9成都為良心小店,除咗古月,重包括北豆Bar & Grill、現Cafe Gen、Villa Villa、酒盗Shuto、青藏牛肉麵,今朝(29號)7點解禁,解封後記得去大力懲罰呀!

E.A.Tips﹕

(1)其實肉骨茶可以無限加湯。

(2)購買外賣主食會同時享飲品半價優惠。
(3)小店只接受現金付款,無電子支付。

(4)人流比較多,最好挑選適當時候去,避開食飯時間。

(5)書局街轉入錦屏街,小巷較窄,見有香花路指示牌樓梯後,右邊有條內街。

延伸閱讀﹕鰂魚涌足料鮮蝦濃湯麵 湯底濃郁麵條掛湯【有片】

古月

北角錦屏街後街29號A舖地下
星期一至六 12:00 – 21:30;星期日全日休息
3568 4530

7間米芝蓮港島區良心店地圖﹕

錦屏街後街良心店地圖﹕

Please Like & Follow & Subscribe /
歡迎讚好、追蹤、訂閱