2021-04-10

北角配水庫背後藏山路捷徑 快閃觀景台300度盡覽港九無敵靚景

北角配水庫遊樂場+賽西湖公園+ 金督馳馬徑觀景台


港島區有唔少山徑,但大多都要花時間同體力上山,其實配水庫遊樂場背後都有捷徑可以走到山上,今次介紹嘅北角山徑,甚至可以於高點全方位環瞰半個香港,適合兩個人拍拖上山閒遊。

從山腳北角書局街或北角台作起點,沿路樓梯,首先經過天后廟道二號花園,沿天后廟道走,對面馬路為北角配水庫遊樂場。內裏只有一個依山而建嘅半山籃球場、加建嘅兒童遊樂場同足球場,附近有蘇浙公學、名校中華基督教會桂華山中學,被斜坡圍繞。

要行到山路捷徑入口漫翠小園,需經過賽西湖公園,既可順道遊覽賽西湖公園,內有七姊妹水塘,媲美杭州西湖,亦可沿公園外行人路而走,5分鐘內可達藏於休憩處背後嘅山徑入口。若掠過賽西湖公園,可從側面入口對面嘅漫翠小園直接進入山徑。

沿路直行,分岔路口分別為寶聯徑、郊野公園,只需沿郊野公園方向行,一直靠左,沿樓梯直上,路段為水泥路,輕鬆易行。其後樓梯再有分岔路口,繼續沿左邊樓梯上山。嚴格嚟講寶聯徑對上應該統稱為鰂魚涌緩跑徑,中段會見到涼亭。前行至郊野公園路牌,可見分別通往寶馬山道、柏架山道、金督馳馬徑嘅山徑,另有一道直長階梯通往觀景台。

位處港島東區半山位置嘅金督馳馬徑,全長其實有9km,本來由黃泥涌樹本研習徑至大潭郊遊徑,穿梭大坑道、渣甸山山腰至畢拉山。金督馳馬徑源自1925至1930年嘅香港第19任總督金文泰,有傳係由於金文泰經常於此地騎馬、郊遊,位於香港仔嘅同金夫人馳馬徑一樣有正式路牌。

只需沿觀景台方向走,3分鐘內可直上頂端鳥瞰港島東至九龍半島風景,景觀極遼闊,只有背後一少部份被樹木遮擋,既可同時遠眺維多利亞港、飛鵝山、大老山、獅子山、大帽山、畢架山,東至鯉魚門、五桂山、觀塘、啟德遊輪碼頭、九龍灣,以致土瓜灣避風塘、黃埔、紅磡、尖沙嘴,約300度景觀全部一覽無遺。

路段可以隨時沿路折返,亦可沿金督馳馬徑繼續前行到寶馬山或紅香爐峰,甚至大潭水塘,不過支路繁多,需謹記循邊個方向走,以免迷路。

E.A.Tips﹕

(1)乘搭電車到書局街落車;又或巴士路線8H,10,18,18P,18X,23,27,38, 41A,42,42C,63,65,77,77A, 81,81A,81P,85,85A,99, 102P,110,671,962C,962E,969C, 25,25A,27,81A琴行街、英皇道落車;或小巴路線56,65,69, 49M號於港鐵北角站落車,亦有咪錶停車位,可以書局街為起點。

(2)巴士路線27,41A、小巴路線49M可直達北角配水庫遊樂場,甚至蘇浙公學,靠近寶馬山道賽西湖公園。

(3)愛護環境,謹記自己垃圾自己帶走。

(4)路段樹蔭唔少,但觀景台則較少遮蔭位。
(5)上山路段不時有野豬,唔好挑釁,要保持距離,注意安全。

北角配水庫遊樂場

北角
07:00-18:00

賽西湖公園

北角寶馬山道
07:00-23:00

金督馳馬徑觀景台

鰂魚涌緩跑徑
24hours

Please Like & Follow & Subscribe /
歡迎讚好、追蹤、訂閱