大潭水塘 零難度 睇羅馬式石橋
兩個人影吓相,  港島

零難度遊走大潭水塘 羅馬式百年石橋宛如外國



秋天係行山季節,嫌行山太多人,可以行吓水塘,相對目前日日人頭湧湧嘅大東山、千島湖等,大潭水塘人流比較正常,係其中一個靠近市區兼唔辛苦嘅路線,可以兩個人輕鬆睇風景,大潭水務文物徑可環瞰薄扶林,又可以拍拖影吓相。

大潭水務文物徑向來係受歡迎嘅路徑,可舒舒服服上水塘睇水塘風景之餘,亦可觀賞大量三級至一級歷史建築,包括行到大潭篤水塘嘅4座石橋。而4個水塘由1888年到1917年建造,為早期港島主要食水來源,有21項水務設施都係香港法定古蹟。順住路線,會經過大潭上水塘、大潭副水塘、大潭中水塘、大潭篤水塘,各水塘相當空曠,景觀優美,波平如鏡,輕易拍攝超靚天空之鏡,配合黃昏日落光線,更壯觀。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

延伸閱讀﹕太古工廈藏打工仔半自助飯堂 大大碟意粉有水準

行大潭水塘主要睇水壩同石橋,從鰂魚涌或太古起步,經鰂魚涌樹木研習徑,可沿路上山,若從前者為起點,可經香港柏架山道自然徑,後者為起點則經鰂魚涌水塘花園,兩者都會經過鰂魚涌樹木研習徑。而太古起步先會順便睇埋戰時爐灶,腳程約20分鐘,戰時爐灶本來屬二戰前預計同日軍作戰而建造,作用係俾市民喺戰亂期間煮食,但港島瞬間失守,所以未有使用過,位置喺大潭郊野公園內。

穿過戰時爐灶,繼續向前行,可沿柏架山道行,唔係康柏郊遊徑,經柏架山道/東區自然步道可去到柏架山道燒烤區及康山燒烤地點,再去到大風坳涼亭。行上涼亭需時較長,大概30至45分鐘,亦係唯一需要少量體力嘅地方,沿途既有水泥路,亦有少量山路,但都係容易步行嘅山徑。

從大風坳涼亭會見到幾個分岔路口,左邊去柏架山,右邊去畢拿山,而前面有道閘向下行先係直通往水塘目的地嘅路線,去到大潭上水塘石橋、石砌輸水道約需30分鐘。大潭上水塘水壩高約90呎,屬比較少需要向上行嘅水壩,唔少人都會喺上水塘石橋打卡、拍拖睇風景,今次帶大家行吓水壩底,有另一番風景,場面更能彰顯水壩雄偉感覺。

再由大潭上水塘石橋行到大潭副水塘工人宿舍,經旁邊小路進入,10分鐘內可以搵到大潭水塘紅磚屋,小屋既有頹廢感,又可以影吓相。

大潭副水塘水壩行到大潭中水塘水壩,亦只係約10分鐘,然後步行去大潭篤水塘之前嘅大潭篤水塘燒烤區又再10分鐘,再行多10至15分鐘,大潭篤水塘石橋就近在眼前。 大潭郊野公園內佈滿燒烤場,去到大潭篤水塘,基本上行過一個燒烤場,就有一道石橋,合共有4道石橋。大潭篤水塘石橋以拱形設計,有石柱承托,包括三孔橋、四孔橋,由花崗石建造,十足羅馬式風格,有幾分異國風。

沿路出返大潭郊野公園南門,腳程只係5分鐘,出口有公廁、小巴站、巴士站、汽水機,非常方便。再帶大家行埋另一邊景觀,先越過大潭道,沿大潭水塘道向下行,途經大潭童軍中心,直行到尾會見到另一間紅磚屋,屋頂滿滿中式瓦片,其實係大潭篤原水抽水站第2號員工宿舍,為倉庫式建築,最初僅以蒸氣機推動運作,而門口被封鎖,只能於閘外拍攝。由巴士站行落底,腳程約10至15分鐘,再向海邊行會去到大潭灣碼頭,景觀遼闊,可飽覽大潭灣一帶海岸風景,碼頭不時有釣客垂釣。

返回大潭水塘道,繼續沿海邊無名小路行,沿路會見到往蓮鶴仙觀上船碼頭同BBQ場地,行到盡頭即可以到達大潭篤水塘水壩底部,腳程約5分鐘。水壩同樣由花崗石建造石柱,亦有12道半圓拱形溢洪水道,從呢個角度睇水壩會更壯觀、更有氣派,值得駐足欣賞。

延伸閱讀﹕【蝴蝶群舞】零難度上香港仔水塘 推介人跡罕至神秘位打卡 1小時直通灣仔鬧市超易行

E.A.Tips﹕

(1)可於鰂魚涌或太古市區作起點,沿鰂魚涌樹木研習徑,經香港柏架山道、大風坳涼亭,行落大潭水塘,然後直行到大潭郊野公園南門為終點;或者調轉由大潭郊野公園出發,就要行上山;又或者由銅鑼灣直接搭的士去陽明山莊落車,車費約$50,沿大潭水塘道直接shortcut上大潭上水塘石橋。

(2)大潭郊野公園南門有幾條巴士同小巴路線,14/314號巴士、16A/16M/16X小巴可去赤柱、舂坎角方向,而當中14號巴士可直接出返西灣河。

(3)大潭水塘紅磚屋花叢有好多高到上大腿嘅尖草,著棉質褲隨時會黐滿花叢掉落嘅尖細小刺,有微微痕癢感。

(4)如果去大潭篤水塘水壩底,微微細雨會更有Feel,雨季先會睇到瀑布景象,不過大雨下有一定危險度,而海邊小路不時有狗,同樣需要小心安全。
(5)路段初段有樹蔭,水壩、石橋都無遮擋,記得帶齊防曬、防蚊用品。
(6)謹記愛護環境,自己垃圾自己帶走。

大潭水塘

大潭水塘
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


鄰近車公廟!沙田大圍廢校轉化綠色空間 環保博物館將藝術融入生活
全港3間分店!復古裝潢還原屋邨走廊賣懷舊點心 老馮茶居不如用一款點心單飛?
藜麥紅白米飯配滋補燉湯 大角嘴$48健康港式便當
荃灣清靜秘密花園 大會堂劇院咖啡店歎下午茶
大角嘴街坊刺身壽司專門店 丼飯全日供應最平$40
元朗錦田路邊大排檔毗連公園街市 超高水準街坊醉雞麵/海南雞飯回頭率高
荃灣人氣新式大排檔旗艦店 與時並進改良舊餸菜吸斯文客人?
石崗軍營賞楓!雷公田起步遊200年歷史甲龍古道 直搗川龍家樂徑眺青馬/昂船洲大橋【秋季紅葉2021】
大角嘴高水準台式手工芋圓店月底將結業 滿$100送2件芒果糯米糍
【年糕巡禮2022】新年最黃賀年糕點完整名單!近50間港九新界實體店連網店年糕蘿蔔糕即刻預訂!
野餐隨行【大嶼山及離島篇】有View有草地!全港100個近鬧市近食肆安心野餐點 梗有一個喺左近!
野餐隨行【港島篇】有View有草地!全港100個近鬧市近食肆安心野餐點 梗有一個喺左近!
野餐隨行【新界篇】有View有草地!全港100個近鬧市近食肆安心野餐點 梗有一個喺左近!
野餐隨行【九龍篇】有View有草地!全港100個近鬧市近食肆安心野餐點 梗有一個喺左近!
荔枝角程班長台灣美食宣佈即將結業 台灣味牛肉麵營業至3月!
露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘