[sp_html5video category=”3755″]
太古食肆唔多，同路人更少，工廈內就隱藏一間值得幫襯嘅小店，甫出𨋢門已經見到有客人排隊，驟眼睇似足一間文青咖啡店，實際上係一間自助式飯堂，價格合理，既適合拍拖去食，更加啱附近嘅打工仔，記者略嫌出餐比較慢。
呢間自助飯堂屬樓上舖，裝潢同文青Cafe無異，以湖水藍、木質為主調，裝潢簡潔，面積寬廣，周末人流雖多，枱櫈之間都有一定空間。餐廳雖然係叫「師父飯堂」，但並唔係提供中餐嘅普通飯堂，而係主打西餐，以飯麵為主，無餐湯或餐包，凍飲加$2，凍檸茶茶底唔澀，但好多冰。門口同店內都有小黑板，以手寫方式寫上當日餐牌，價錢唔太貴，人均約$60，兩個人約$120，似Cafe，不過餐廳除咗收銀之外係零服務，要乜架生或調味料就請去櫃台前自取。
辣椒檸檬雞肉意粉 $65係室內小黑板餐牌中嘅精選，意粉份量好多，比一般文青Cafe多足足一倍。意粉質感爽滑彈牙，唔係平價意粉貨色，意粉乾爽，有水準，配合雞肉粒更飽肚，配料重有車厘茄、紫洋蔥、香草，只係意粉擺盤上賣相一般。意粉入口偏辣，辣椒份量唔少，檸檬清香味比較弱，但辛辣度夠，好醒胃，調味充足，夠惹味，嗜辣者必食！
厚切豬扒野菜沙律配飯 $62係門口小黑板餐牌中挑選，以白飯為基底，相比意粉，份量唔多，大概只有女仔拳頭般大，男士可能未必夠。沙律菜份量唔少，感覺幾新鮮，有低卡感，淋有胡麻醬調味。而豬扒煎好就厚切上枱，優點係夠大塊，醃得唔算鹹，只係味道唔太突出，但肉質夠稔。
E.A.Tips﹕
（1）枱面並無餐牌，要出收銀處攞，嫌麻煩可以直接睇門口同店內小黑板先。
（2）餐廳以半自助式設計，需自己去收銀處落單，可以憑單到櫃台攞食物，都有店員會送餐、收餐嘅。
（3）星期一至五最後落單時間為20:30，每日都無加一服務費。
（4）餐廳有Uber Eats，可以隨時叫外賣。
（5）可以預先打電話落Order，唔需要等咁耐。
（6）手寫餐牌每日都唔同，幾有新鮮感。
（7）中午時間會比較多人，可能要等至少15分鐘，門口黑板上亦有小字條寫明「如趕時間，下次先食」，建議一開門就去或者下晝時間先去，2點後會少人啲。
（8）餐廳雖採用以小麥製嘅環保飲管，但飲咗兩啖已經爛咗，唔建議用，唔用好過用。
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
師父飯堂
太古英皇道1065號東達中心13樓1301A室 
星期一至五 11:30 – 15:30、18:00 – 21:00；星期六 09:00 – 17:00；星期日、公眾假期全日休息 
3615 1492
在〈太古工廈藏打工仔半自助飯堂 大大碟意粉有水準〉中有 2 則留言
留言功能已關閉。