2021-07-24

從油麻地搬入馬灣 私房菜變街坊店 隱藏Cafe大玩熱沙咖啡

Coffee on the Sand 熱沙咖啡


曾經喺油麻地樓上舖食過一間好特別嘅私房菜,以土耳其菜式為主,最令小編印象深刻係一份限量嘅土耳其烤雞配紅白米飯,今次喺馬灣影完相後發現嘅一間隱藏Cafe,正正係呢間土耳其私房菜搬遷到馬灣,值得拍拖去撐枱腳。

靠一張餐廳獨有嘅名信片,令小編記得呢間Cafe,室內佈置貫徹上年油麻地裝潢,都係滿佈土耳其裝飾,包括充滿土耳其色彩燈飾、杯具、枱布、牆壁等,當中銅製咖啡壺、水壺都好精緻,各種拼貼都滿滿土耳其風格,令本來似外國小島嘅馬灣更添異國風情。

餐廳似乎轉換咗模式,唔再係一年前以人頭計嘅私房菜,而係逐樣叫,感覺即時變成街坊店。而上述提到嘅土耳其烤雞變成可以直接叫,一份價錢$98,不過小編今次想試吓上次未試過嘅菜式。

原舊薯仔上枱嘅雞肉焗薯 $68,可以營造芝士拉絲感,將雞肉粒粒融入焗薯內,滿口芝士、牛油、肉碎、生菜、粟米粒等餡料,充滿薯香,毫不簡單。焗薯即叫即整,新鮮熱辣辣上枱,連薯皮都食得,好有薯香味,焗薯本身幼滑之餘,獨有醬汁令整體更香口惹味。

廚房特色牛肉或雞肉薄餅 $158,叫咗份雞肉Pizza,兩個人每人兩大件Pizza,份量充足。Pizza餅底好薄,真係薄餅,邊緣微脆,餅底柔軟,餅底黏滿特色醬汁,貌似茄醬,Pizza面舖有滿滿餡料,包括粒粒雞肉、芝士、生菜、蕃茄、青瓜、粟米等,芝士係半溶狀態,蔬菜有清新感,芝士香就好惹味,入口相當豐富。

特色園池素雞飯 $88,賣相一流,色彩繽紛好吸睛,狀似盆栽,數一數包含五種新鮮蔬菜,店主稱呢款係健康素食之一,夠晒健康,食得有營,最啱素食情侶拍拖去試吓。有土耳其醬鷹嘴豆醬汁,亦有羽衣甘藍、青豆、生菜、紫椰菜、翠玉瓜等5款蔬菜,亦有粟米、紅蘿蔔絲、紅椒、洋蔥等配料,配搭有肉感嘅素雞,唔會太清寡,底層重隱藏咗糙米飯,層次豐富。整體有微酸味,幾開胃,好Fresh,加入糙米飯令人有飽肚感,唔會得唔多飽肚嘅蔬菜,好有田園風。

飲品既有土耳其茶,加$30可以試試熱沙咖啡,加$50重有精品咖啡,加$25重有水果特飲,包括Fruit Punch,有新鮮水果,蘋果、橙、百香果等,有果香,微甜,味道天然,適合食到最尾Refresh吓。

話明熱沙咖啡,重點當然要試試熱沙上煮土耳其咖啡。餐廳中央有一個咖啡枱,咖啡師非常熱情不斷介紹咖啡知識,包含順時針或逆時針轉一下咖啡杯、咖啡加幾多水、少少水都會影響味道,甚至送多杯比咖啡更香醇幼滑嘅鴛鴦俾我哋飲。唔少網民都誤以為咖啡師係店主,記者後來直接問從廚房出嚟嘅真實店主,fact check後先知原來咖啡師只係客席形式,並唔係店主。

咖啡師不斷為客人沖唔同種類嘅咖啡,基本咖啡粉都研磨得好幼細,有哥倫比亞、越南、埃塞俄比亞、巴西、紅牡丹等咖啡豆。土耳其咖啡味道濃郁,層次豐富,比一般咖啡香醇,有啲有咖啡渣而有啲無咖啡渣。有一種咖啡味從製作期間不斷演變,最後愈來愈清,到凍咗會有澀味;另一種咖啡有啖啖花香味,咖啡味濃而苦,略帶微酸,比較濃稠,攤得耐杯底咖啡渣會有起沙感覺。

至於何為熱沙咖啡?其實只係一款土耳其咖啡,煮咖啡時將咖啡壺放入熱沙堆裏面,不斷利用預熱沙堆烹煮咖啡,直到沙堆中間嘅咖啡壺內嘅咖啡沸騰,咖啡油浮於表面,然後就可以倒入土耳其風格嘅精緻小杯內,比起港式咖啡更有特色,咖啡濃厚,甘香帶微甜,入口細滑,滿滿咖啡香,絕對值得去一嚐土耳其文化,店主亦歡迎客人自己去試吓玩熱沙咖啡。

E.A.Tips﹕

(1)逢星期一至五都有特種精品咖啡細品工作坊,方便一邊玩熱沙咖啡,一邊食各款菜式,咖啡班就自由定價。
(2)小店以街坊為主,星期六、日會比較多人,而且每星期會有一日不定期休息,所以建議要先預約。
(3)熱沙上土耳其咖啡最好等咖啡渣沉殿後先飲,否則會飲到滿口咖啡渣,而且可以飲到最原始嘅味道,而店主提到咖啡渣亦可以用嚟占卜。
(4)如果係未沖好嘅熱沙咖啡,會變成港式咖啡或Espresso,味道苦澀又濃郁,所以記得照咖啡師或店主嘅方法,烹煮到適當時候先拎出咖啡壺,咁先會係土耳其咖啡嘅味道。
(5)可以從門口旁邊corner位自助形式攞餐具堂食使用,未必需要問店主。
(6)從葵芳新都會廣場旁邊或青衣市中心可以乘搭珀麗灣巴士,車程僅約20分鐘,有24小時通宵巴士。
(7)門口重有個好Chill嘅打卡位,去唔到旅行唯有去吓異國風嘅小店頂住癮先啦。

延伸閱讀﹕隱世樓上Cafe上枱先知食乜 土耳其私房菜超驚喜

延伸閱讀﹕馬灣小島米線街坊店 靠邊款秘製小食取勝?

熱沙咖啡

馬灣珀林路大街村東11號地舖
12:00 – 21:00
9027 6970

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?
離奧海城僅3分鐘步程!大角嘴全新街坊早餐店 每日啡一啡飽肚套餐$40有找
西貢驚現地下鐵路站!全新牛肉小食店毗鄰碼頭 驚喜酥脆炸麵+5款口味Shake Shake薯條
環瞰270度全海景添情調! 北角海逸君綽酒店歎限定龍蝦主題四重奏下午茶
大埔廣福道新開業壽司店歎高水準午市定食 新鮮刺身生蠔都有「良鮨」
「東方威尼斯」水鄉小島賞無遮擋醉人日落 大澳珍珠形寶珠潭藏海星紅蟹仔 迆遊虎山浪漫紅木橋打卡
商場舖搬街邊舖!元朗巷弄爆辣冷麵海量芫荽 6級辣度你試到第幾級?
文青Cafe?大排檔? 沙田逾60年雲吞麵老店一度告急
勇闖港版吳哥窟尋大潭廢堡「天空之城」 20分鐘輕鬆折返赤柱沙灘
上水安圃村季夏搶眼小黃菊花海 原野羊群恍如港版清境農場 直闖日式藤原豆腐店打卡兼遊新田魚塘觀鳥睇日落【2021賞花地圖】
每日只做5款主食! 大角嘴商場限量日本牛丼 沖繩小島料理心機爆滿
大角嘴街坊海南雞秘店 低調泰式雞飯2個版本4種口味
九龍灣商場尋寶 最平$3/件壽司 經濟型必揀平價丼飯
西貢小黃屋前身係村校? 1小時遊客家小島鹽田梓 15分鐘船程訪碩果僅存曬鹽場