我愛伊斯坦堡 隱世樓上Cafe 上枱先知

隱世樓上Cafe上枱先知食乜 土耳其私房菜超驚喜



呢間我愛伊斯坦堡主打係土耳其特色私房菜,位置喺旺角樓上舖,由位置到菜式都勁神秘,唔上枱都唔知嗰日食乜,好有驚喜感,最啱拍拖俾驚喜另一半。

室內佈置好有土耳其風格,好似一秒穿越咗去土耳其咁, 一定要預約先有得食

首先要揀咗食邊個價錢嘅餐先,揀一個價錢就全枱斷人頭計,每位都俾果個價錢,份量都會對應人數,兩個人都可以食,小編當日5個人揀咗$250,所以有5樣嘢,店員提我哋有咩特別需要,同有咩唔食得都可以講低。

飲品就有5款可擇,Miss A比較推介土耳其咖啡(熱)、土耳其石榴茶(凍)。土耳其石榴茶 味性酸甜幾開胃,又可以解膩。

土耳其咖啡 即係沙上咖啡,喺沙爐上面煮,係土耳其最傳統烹煮咖啡方式,Miss A覺得咖啡味偏甜,仲可以試試自己整沙上咖啡。

土耳其特色沙律菜 好開胃醒神,有蕃茄、青瓜、乾果、羽衣甘藍、薄荷等,加上淋埋蘋果醋,更加酸甜開胃。

土耳其芝士拉絲薄餅 舖滿濃濃芝士,以土耳其牛肉腸做餡,薄餅比較薄容易入口。

土耳其炒羊肉 有羊肉、茄子、薯仔、洋蔥、蕃茄、青瓜、乳酪等,新鮮之餘,羊肉竟無膻味,反而好香。

秘製招牌燒雞配紅白米飯 嘅燒雞係餐廳招牌菜之一,特別配乳酪蘸雞,燒雞加上少少酸味,燒雞事前已醃製好,唔會太鹹,外皮幾脆,雞肉好嫩滑,又軟腍,焦香脆皮好香口惹味。

烤焗芝士啡菇 大蘑菇嚟架,上面好多芝士,烤焗完嘅芝士溶咗落蘑菇度特別香濃。

當日有朋友生日,預約時已向餐廳提出,所以有小小嘅壽星禮遇。

我愛伊斯坦堡
地址﹕旺角通菜街11號1樓A室(於Adidas旁樓梯直上)
營業時間﹕13:30 – 17:00;19:30 – 22:00*
價錢﹕每位$178/$200/$250/$300/$350/$520(視乎菜式數目)
電話﹕6800 7776(whatsapp預約) 每星期不定期休息一天

延伸閱讀﹕從油麻地搬入馬灣 私房菜變街坊店 隱藏Cafe大玩熱沙咖啡

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈隱世樓上Cafe上枱先知食乜 土耳其私房菜超驚喜〉中有 1 則留言

留言功能已關閉。