在禁堂食令下，所有人只可以買外賣。既然都係食飯盒，不妨行多兩步幫襯下良心店啦。
社企餐廳膳心小館上月於石硤尾開分店，原店喺牛頭角，向來定期派飯，係一間良心店，惜5月尾被房署拒絕續約，需於今年11月結業。
上月餐廳搬到石硤尾，由深水埗黃金電腦商場前行約5mins即達，今次餐廳主打兩餸飯、三餸飯，每日唔同款式，日日有6至7款餸菜任君選擇，絕對係區內街坊平價飯之選。
餐廳內既有快餐，亦有兩餸飯、三餸飯，南瓜蒸排骨、蝦乾蒸肉餅、咖哩薯仔炆雞、翠玉瓜炒雞柳、蕃茄煮蛋、蒜蓉炒時菜，基本都係家常小菜，每款都奉送例湯，價錢僅$38至$42，兩個人食都只係$80，最啱拍拖、結婚後嘅無飯情侶或家庭。款款充滿鑊氣嘅餸菜，份量充足，足夠給予街坊溫飽。
款款充滿鑊氣嘅餸菜，份量充足 
另外，餐廳有售賣大熱嘅蛋卷、杏仁餅等，同樣受到街坊歡迎。
據悉，膳心小館前身其實係九龍城裁判法院內嘅簡單小廚，由2015年起開業，同香港防止虐待長者協會合作提供免費飯盒俾長者，後來因租約期滿於2018年搬到牛頭角彩頤居，易名膳心小館。餐廳面積唔大，空間有限，後來位置增加，仲加入駐場專業咖啡師、蛋糕師，每逢節日更有聚會，可見經營者嘅善心。直至上月，再因租約問題需要搬遷，就喺石硤尾開設分店。
膳心小館
地址﹕石硤尾白田街13號石硤尾邨美葵樓地下G06號舖
在〈社企餐廳兩餸飯$38 膳心小館搬到石硤尾〉中有 3 則留言
留言功能已關閉。