全港7間兩餸飯專門店良心地圖！港九新界遍地開花間間平靚正低至$32！（最新消息﹕5月鰂魚涌有新店）

近年兩餸飯掀起熱潮，店舖愈開愈多，開親都大排長龍，兩餸飯嘅優勢係平靚正，大件夾抵食，有住家飯感覺之餘，亦係糧尾之選，喺物價高企而人工永遠唔會加嘅香港地嚟講，性價比特別高，就連前藝人河國榮亦一度支持兩餸飯。事實上，香港兩餸飯本身出自60年代工廠食堂，係正宗本土菜式，並唔係來自北方，以訛傳訛之說不能盡信。兩餸飯唔等如頹飯，大多數菜式選擇多元化，鑊氣小炒應有盡有，價錢低廉，經濟實惠，二、三十蚊就搞掂一餐，就算拍拖兩個人亦隨時只係50至60蚊左右，家庭亦可以當作加餸。

「香港兩餸飯地圖」合共有逾300間賣兩餸飯嘅店舖，不過兩餸飯、三餸飯到底有幾多間係值得支持？編輯就為大家推介全港最有良心嘅兩餸飯，製作真正嘅香港兩餸飯地圖，港九新界的確遍地開花，只係希望大家能夠更加識揀識食。

新界區

屯門﹕齊記美食

新界區嘅兩餸飯基本上由「齊字頭」囊括，原先售賣人氣熱狗嘅「齊柏林熱狗店」（Zeppelin Hot Dog），由上年開設「齊記美食」（Cafe de Zep）開始涉足兩餸飯市場，至今已經開設四間分店，由屯門虹橋元祖店到殺入元朗鬧市，以致近月插旗九龍區新蒲崗，近日（4月22日）甚至於屯門友愛邨試業，似乎雄心滿滿，貫徹其連鎖店模式。

店舖最大優點係開足星期一至日，而非如其他兩餸飯般只於星期一至五營業，分店價錢相同，兩餸飯$36、三餸飯$42，每加一款餸$8，同時包一款飲品，為其他兩餸飯店少見。菜式有15至20款，包含咖哩雞、椒鹽豬扒、菠蘿咕嚕肉、三杯雞、肉碎蒸水蛋、麻婆豆腐、酥炸雞翼、蕃茄炒蛋、瑤柱西蘭花、羅漢齋豆卜、西芹炒雞柳、豆角炒牛肉、洋蔥牛柳、蓮藕土魷煎肉餅、香煎雞扒等，當中咖哩雞絕對係首選，另有一兩款甚為驚喜。

飯盒僅為普通發泡膠飯盒，大面積放白飯，細面積放一款餸，第二款餸則放白飯之上，如果有第三款餸，就同樣擺放白飯上面，如同將飯盒分成三等份。呢種擺放方式最大問題在於飯餸醬汁、材料會混淆不清，比如咖哩汁會將旁邊餸菜染黃，改變本身餸菜味道，而美觀度亦會下降。

延伸閱讀﹕【野餐隨行】齊柏林涉足兩餸飯開足4間分店屯門蝴蝶灣草地野餐兼探索一代革命之父一級歷史建築公園

九龍區

石硤尾﹕膳心小館

要數九龍區第一間選擇，必定係相對早期出現嘅兩餸飯、三餸飯專門店「膳心小館」，2020年由牛頭角搬到石硤尾，當日兩、三餸飯價錢為$38至$42，而今日2022年嘅價錢為$39至$43，兩、三年間只係輕輕加$1，編輯可以作證。本身膳心小館係一間良心社企，有唔少義賣活動，店舖更會賣兩、三餸飯，款式有時會唔一樣，當日選擇有濃香慢煮咖哩雞、蝦醬豆卜腩片、古法沙薑雞翼、XO醬翠肉瓜炒魚片頭、避風塘爆豬扒、豆豉鯪魚炒時菜、蓮藕炆豬手，亦可以買淨餸，一餸至三餸價錢為$40至$110。除咗飯底比較乾硬，基本餸菜都算不過不失，唔算特別有鑊氣，就家常小菜風味。而例湯則為蓮藕甘筍煲豬骨湯，湯水勺到碗中有九成滿，屬住家湯，而非味精湯，材料適中。

延伸閱讀﹕社企餐廳兩餸飯$38 膳心小館搬到石硤尾

太子﹕青花亭

原為一間打卡咖啡店嘅「青花亭」，一直以來都係以裝潢、擺盤為主打，近月眼見兩餸飯成為熱潮而特別加入兩餸飯行列，供應時段則只限17:30至20:00，菜式如麻婆豆腐、滷水雞翼、蒜蓉炒時菜、蝦仁炒蛋、欖菜苦瓜肉碎、辣椒豬扒、粟米魚塊、韭菜炒海鮮等都算係住家菜款式，約有8款餸菜。每盒兩餸飯至三餸飯價錢由$46至$52，如果要加餸就要加$12，淨餸道賣$50至$60，另有車仔意粉可擇。不過編輯想試嘅時候，撞正店舖暫時停止供應兩餸飯，等下次再補上。

大角嘴﹕鮮餸便當

大角嘴亦早有一間以港式飯餸為主打嘅便當店「鮮餸便當」，雖然只有單餸飯，似乎唔太入圍兩餸飯標準，但編輯認為亦係港式飯餸類別，可以多個選擇。有指該店大廚曾為米芝蓮三星中菜館主廚，質素不容忽視，每盒便當價錢為$48，餸菜有泰式檸檬雞、日式咖哩吉列魚柳、台式豬軟骨美味滷蛋等10款餸菜可擇。小店有別於坊間兩餸飯，包含前菜、主菜、甜品，飯粒馮藜麥紅白米飯，比白米飯更健康，而且有燉湯或飲品，恍如一份套餐。燉湯每日有唔同款式，如蟲草花圓肉烏豆、無花果甘筍椰子薏米南北杏，養生燉湯鮮甜又足料，加$10又有綿滑甜品腰果露，以編輯實試嚟講，似乎大角嘴呢間飯餸水準較高而穩定。

延伸閱讀﹕藜麥紅白米飯配滋補燉湯大角嘴$48健康港式便當

港島區

鰂魚涌﹕香港人兩餸飯

至於港島區則為聚集兩餸飯之地，其中最受歡迎嘅係位於鰂魚涌嘅「香港人兩餸飯」，雖然只係位處小巷內，但平時經常大排長龍。星期一至五有約11款餸，每日轉換，而星期六就會以Random方式提供餸菜款式，飯餸水準甚高，但最大優點並唔係味道，而係照顧埋飯盒美觀度。

一盒兩餸飯$32，一盒三餸飯$40，一盒四餸飯$48，價錢實惠，不單飯量充足，而每款餸亦有足夠份量，絕非一般頹飯，當日星期六菜式包含有菜脯肉碎煎蛋、咸香煎肉餅、魚香茄子、黑椒薯仔牛柳粒、生炒骨、麻婆豆腐、蝦米紹菜炒粉絲、雜菇扒小棠菜、西芹雲耳炒雞柳、滷水雞翼、京都豬扒，編輯所挑選嘅餸菜水準大多都好平均，未見劣食。

此兩餸飯店最大優點係連美觀度都考究埋，店員係聽完客人所有選擇先會開始勺餸菜，放上合適位置，而飯盒有三格，大格放白飯，旁邊相等面積小格就擺放兩款餸菜，而三餸飯就會將第三款餸放置於白飯表面，令每一款醬汁都唔會互相混淆、污染，亦可避免餸菜重疊嘅情況，感覺受到尊重，而且美觀度馬上大升。

延伸閱讀﹕【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭

上環﹕吉利餐室 → 鰂魚涌﹕TBC

本來位處上環嘅「吉利餐室」，原本叫「珍姐冰室」，據悉招牌作為泰式水門雞飯，亦曾一度涉足兩餸飯市場，當時每日有8款餸菜，每盒兩餸飯$42，一直受到該區街坊歡迎，當中香煎肉餅、生炸雞扒、吉列豬扒為人氣之選，而頭抽撈飯亦受少數人歡迎。但最近該店已於上環結束營業，但據編輯親身查詢，吉利餐室原班人馬會於鰂魚涌重新開業，店舖目前正於裝修當中，未正式營業，不過就唔係叫上述兩個店名。

編輯實地引證，於鰂魚涌街頭確實見到一間貌似兩餸飯裝潢及內籠嘅小店，位置離同區嘅香港人兩餸飯不遠。據了解，小店會於5月初開業，想試吓就要密切留意啦！

金鐘﹕美樂小食

港島區最後一間兩餸飯店，亦係開業最耐嘅一間，由2008年至今已有逾10年，一直躲藏於金鐘海富商場內，每盒兩餸飯$46，價錢唔包括要另加$6嘅湯水，每日堅持有8款餸，菜單幾乎日日不同，餸菜款式包含咸蛋蒸肉餅、麻婆豆腐、粟米肉粒、雲耳蒸雞、西芹雞柳等，一直標榜「家庭式住家餸」、「絕無味精」、「少油」。的而且確，餸菜喺醬汁、油份方面係抵制得宜，整體並唔油膩，而醬汁又唔會太濃稠，肉類都係挑選比較瘦削嘅肉質。

延伸閱讀﹕香港中區兩餸飯推介！金鐘海富商場美樂小食賣平民健康住家菜

新界區

屯門﹕齊記美食

齊記美食

九龍區

石硤尾﹕膳心小館

膳心小館

太子﹕青花亭

青花亭

大角嘴﹕鮮餸便當

鮮餸便當

港島區

鰂魚涌﹕香港人兩餸飯

香港人兩餸飯

上環﹕吉利餐室 → 鰂魚涌﹕TBC

TBC

金鐘﹕美樂小食

美樂小食

在〈全港7間兩餸飯專門店良心地圖！港九新界遍地開花間間平靚正低至$32！（最新消息﹕5月鰂魚涌有新店）〉中有 1 則留言