中環小店台菜日食紅燒牛肉Crossover日式烏龍麵

疫情緩和，無得再Home Office，唔少香港人又開始繼續返工，中環OL又係時候要出街搵食啦。位處中環嘅小店一起食堂係一間日式台灣菜餐廳，以台式美食製成日式便當，既可品嚐台灣美食，又可以感受日式風情。

一起食堂係一間小黃店，比較低調，經過餐廳而唔做research未必會發現係一間良心小店，餐廳位處中環心臟地帶，交通方便，兩個人拍拖假期行吓中區又得，亦好方便OL們平日Lunch Time搵食。

餐廳以台式美食為主，但室內裝潢則有日式風格，內籠深長，木質主調、日式燈籠都有日本意境。室內空間唔多，僅有約20個座位，抗疫期間座位有分隔，而疫情未完結情況下，就未需要好似之前咁大排長龍。點餐只需喺點餐紙劃上剔號即可，以中環地段嚟講，價錢尚算合理，而且係幾有誠意，主打粉麵、飯都係台式為主，如牛肉麵、魯肉飯、鹽酥雞、花枝丸等，日式美食就有招牌原條蒲燒鰻魚飯，另有幾款台式茶飲、小食同甜品，最驚喜係反而唔做最出名嘅珍珠奶茶。

台灣菜紅燒牛肉麵（微辣）$89 係必食菜式之一，好似一款套餐，連前菜同甜品，最特別之處就係Fusion嚟，賣相吸引，以台式紅燒牛肉配搭日式烏龍麵！以烏龍麵作麵底，條條煙韌滑溜，質感彈牙，好掛湯，牛肉大大舊，部位係牛助條，有三、四舊，唔係好似牛腩咁淋，筋位有咬口、牛肉有肉汁，但有少少韌，入口唔會好鹹，而且附送紅蘿蔔同白蘿蔔，蘿蔔軟身又清甜之餘，亦滷得好入味。紅燒湯底聲稱入口微辣，但實際上係唔辣，湯頭清澈無味精，味道鮮甜，唔會好鹹，清爽有肉香，牛味好濃郁。