食完飯直落食糖水是常識吧？平時同朋友食完飯，通常都會想搵間糖水舖繼續食，食嘅未必只有糖水，反而係想同朋友相處更多時間。不過，你識咁諗時人哋都係咁諗，好多糖水舖喺飯後時間都係逼爆，人流有時比食晚飯嘅餐廳仲多，等候時間仲長。不妨試吓搵搵位置比較偏僻嘅糖水舖啦，呢間糖水舖係因社運而得悉，雖然睇落好隔涉，實際上巴士直達，而且水準不俗。
糖水舖以小甜將命名，據了解喺上年7月開張，位置靠近沙田圍，附近有沙田城門河同圓洲角公園，各式糖水甜品都大眾化，符合香港人口味，而且價錢相宜，兩個人食好抵食，小店似乎係小品經營，糖水一般等5至10mins左右就上枱。
原個椰皇燉北海道3.6牛乳楊枝甘美露 $60 係招牌之一，價錢已經係餐牌內偏貴嘅甜品，平啲$20至$30都有交易。份量驟眼睇唔算多，不過入口層次感豐富，表面既有芒果粒粒、楊枝甘露、煙韌嘅小丸子，底下更有香甜又充滿奶香味嘅燉奶。燉奶質感滑溜，配搭各種配料好有咬口，而且香甜不膩，食完燉奶，仲可以挖埋椰皇肉嚟食，有三個胃可以一試，睇你挖唔挖得晒啦！
另一款試嘅係榴槤綿綿冰 $45 配搭各種配料如椰果、白玉、粒粒爆珠等，好有台式風格，綿綿冰質感望落好柔軟，軟綿綿好有冰感，加上淋有少量糖漿，互相融合好療癒。小編雖然唔食榴槤，但都聞到上枱時好重榴槤味，鍾意食榴槤嘅朋友可以一試。
室內比平時啲糖水舖狹窄，但座位仍有一定距離，做足抗疫措施以膠片分隔食客，不過分隔完室內空間更不足。附近糖水舖唔多，經過沙田城門河附近不妨拍拖去Sweet一Sweet啦！
E.A.Tips﹕留意外賣自取可享全單85折優惠，如果嫌小店窄，可以外賣返去慢愎歎。
交通﹕從沙田圍巴士總站步行僅2分鐘腳程，從港鐵沙田圍站步行都要10分鐘。
小甜將
| 地址﹕ | 沙田崗背街9-11號全輝中心B座16號舖 |
| 營業時間﹕ | 16:00–01:30 |
| 電話﹕ | 3482 1108 |
在〈沙田河畔街坊糖水舖 平價飯後甜品〉中有 3 則留言
留言功能已關閉。