曾大屋+吳園

到訪沙田圍神秘古老大宅 有一座係一級歷史建築?



好少人會行沙田圍,但沙田圍其實都有唔少有特色嘅地方,部份建築更加被標籤為歷史建築物,當中曾大屋同吳園就係其中之一,充滿古老大宅味道,拍拖兩個人不妨去呢啲特別嘅地方影吓相啦。

曾大屋又叫曾氏大屋,位處位處沙田圍同車公廟之間,靠近博康邨,屬於香港一級歷史建築物,為客家圍村,由1848年興建至1867年,廿年終建成,曾大屋由曾貫萬創建,從廣東省五華縣到香港靠石廠致富,興建大屋俾市民居住,二戰時曾收留逃難嘅人,故被尊稱為曾大屋。

整間大屋有99個單位,取長長久久嘅好意頭,面積約6000方呎,以花崗石、青磚、精選木材砌成圍牆,風格貌似廣東五華老家,四角築有鑊耳型三層高碉堡,上面既有槍孔,亦有瞭望台,以防盜賊。曾經有護城河、吊橋、風水池,目前已遭拆去。

圍村有三個大門口,包括安富門、尊榮門、一貫世居門,以中門最大,頂碘呈圓拱形,旁邊為麻石舖成,門上門閂以酸枝木同鐵枝製成,仲有鐵門。村內大廳分上、中、下三個廳,以天井分隔,再以左、右兩邊橫屋相連,似棋盤狀。大廳內仲擺放有曾貫萬71歲壽辰嘅12幅木刻壽屏。

目前,大宅有越150年歷史,唔少村民已經移居海外,仍然擇地而居嘅曾氏子孫唔多,卻多咗外姓人居住,不過村落保存得唔錯,驟眼睇大屋呈長形,狀似一個堡壘,幾有觀賞價值。

另一個神秘大宅就係僅兩、三分鐘腳程嘅吳園,吳園同曾大屋一樣係香港嘅古老建築物,不過吳園目前就無人居住,係一個已被廢置嘅大宅,帶有陰森感覺,有幾分似鬼屋。

吳園靠近大涌橋城門河,由宋朝起代代經商嘅商人吳子美喺清末1920年興建,樓高兩層嘅高大屋,以鋼筋混凝土、花崗石等建造,加上屋頂正門有古典圓柱裝飾,建築設計突破傳統,以中西方建築融合,喺當時嚟講係幾先進同特別,屋頂仲有三角形簷牆,牆上亦刻有吳園二字,目前睇保留得唔錯。

大宅喺日治時期曾被日軍佔用,經戰後先歸還,其後為租住之用。不過由1970年代後,無人再喺吳園居住,最後因日久失修而荒廢。

十年前,吳園終被評為三級歷史建築,故呢座大宅就繼續保存落去,經過沙田城門河時不妨去行吓、影吓相啦!

交通﹕巴士路線86A/89B可到達沙田圍,行5至10mins可達曾大屋或吳園。

延伸閱讀﹕沙田河畔街坊糖水舖 平價飯後甜品

延伸閱讀﹕沙田圍文青Cafe藏日式包廂 焦糖瑪琪朵香甜不膩

E.A.Tips﹕

(1)建議先行曾大屋,再去吳園,前者靠近沙田圍巴士路線同港鐵站,後者靠近城門河,往返沙田亦方便。

(2)曾大屋同吳園附近都有住宅,前者更加仍然有村民居住,記得要保持安靜。

曾大屋

沙田山下圍(博康邨旁邊)

吳園

沙田大涌橋路21號

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈到訪沙田圍神秘古老大宅 有一座係一級歷史建築?〉中有 2 則留言

留言功能已關閉。